Irangizwa ry’urubanza rw’umwana wa Semutwa wandujwe SIDA ryabaye agatereranzamba

Yanditswe na Ishimwe Israel
Kuya 22 Ugushyingo 2016 saa 04:28
Yasuwe : XX
0

Semutwa Aloys avuga ko imyaka isaga itanu ishize atarahabwa indishyi ya miliyoni 40 z’amafaranga y’u Rwanda yatsindiye mu rubanza yaregagamo uwahohoteye umwana we, akamusambanya akanamwanduza agakoko gatera SIDA.

Urukiko rwisumbuye rwa Gasabo rwanzuye ko uyu mugabo atsinze urubanza yaburanaga rw’umwana we ndetse yemererwa n’indishyi y’akababaro, ku itariki ya 27 Nyakanga 2011.

Iki kibazo giherutse no gushyikirizwa Umuyobozi Mukuru w’Ikigo gishinzwe kugenzura Iyubahirizwa ry’Uburinganire n’Ubwuzuzanye, Rose Rwabuhihi, ubwo yasuraga Akarere ka Bugesera mu ntangiriro z’Ugushyingo mu rugendo rwari rugamije kureba uko ihame ry’uburinganire rihagaze.

Umugabo wafashe ku ngufu umwana wa Semutwa, yaje gukatirwa igifungo cya burundu, ariko nta mutungo yigengaho yari afite, uretse isambu y’umuryango yari ahuriyeho n’abandi bavandimwe be.

Semutwa ati “Njyewe ntanga ikirego mu rukiko yari ataragurisha isambu, urubanza rusomwa atarayigurisha hanyuma mu gihe ntegereje ya minsi 30 igenwa n’amategeko ngo barebe ko yajurira nibwo abavandimwe be bagurishije iyo sambu.”

Umuhuzabikorwa wa Serivisi itanga ubujyanama mu by’amategeko mu Karere ka Bugesera, Mukabisanana Yvette, avuga ko ikibazo cya Semutwa cyasuzumwe n’inzego zinyuranye.

Yagize ati “Na bariya baguze, baravuze bati ikibazo turacyumva koko kirahangayikishije, ariko mu rwego rw’amategeko twaguze mu buryo bwemewe. Dusanga ikiri bukorwe ari ukwigisha abaguze nabo kandi ikibazo baracyakiriye bumva ko ari nk’icyabo, baravuga bati reka twemere duhombe 1/5 kingana n’umugabane uriya muntu ufunze yagombye kubona.”

Akomeza avuga ko bakimara kwemera guhomba isambu baguze, bahaye Semutwa umugabane w’uwahohoteye umwana we undi arawanga.

Ubuyobozi bw’Akarere bwahuje umusaza n’abaguze isambu y’umuryango w’uwahohoteye umwana we, akanamwanduza agakoko gatera SIDA, umusaza yanga aho bamuhaye, avuga ko ari ku gishanga mu gihe ashaka ku muhanda.

Uretse uyu musaza, muri aka gace hanagaragazwa ko mu manza z’abana bahohoterwa kenshi n’abashumba, ababarera n’abandi usanga kubona imitungo ivaho indishyi ari ikibazo kuko n’iyo bafite baca inyuma bakayigurisha.

Umuyobozi Mukuru w’Ikigo gishinzwe kugenzura Iyubahirizwa ry’Uburinganire n’Ubwuzuzanye, Rose Rwabuhihi, yatangaje ko iki kibazo gihangayikishije ariko bagiye kugikurikirana no kurushaho kugikorera ubuvugizi.

Hirya no hino mu bibazo by’abaturage, hakunze kuzamo n’ibijyanye n’irangizwa ry’imanza aho usanga urubanza rumaze igihe rwaraciwe nyamara intambwe yo kururangiza ntigerweho ku mpamvu zinyuranye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza