Kwamamaza

SACCO zarindishwaga ibibando, mu kwezi kumwe zishobora guhabwa imbunda

Yanditswe kuya 13-10-2016 saa 13:48' na Emma-Marie Umurerwa


Mu bihe bishize hakunze kumvikana ubujura bunyuranye bwibasiraga Ibigo by’Imari by’Umurenge SACCO, bagasiga bishe abarinzi babyo bitewe n’uko nta ntwaro babaga bafite ngo bahangane nabo. Ubu noneho ngo umutekano w’ibi bigo ugiye gukazwa.

Ibi byatangarijwe mu nama yateranye kuri uyu wa kane tariki 13 Ukwakira 2016, ihuje abayobozi ba za SACCO 416 mu gihugu n’ubuyobozi bw’Ikigo cy’Igihugu gishinzwe guteza imbere Amakoperative (RCA).

Umuyobozi wa RCA, Apollo Munanura, avuga ko guhera mu kwezi gutaha bifuza ko Imirenge SACCO yazaba ifite umutekano uhamye.

Yagize ati "Gutangirana n’ukwezi kwa 11 (Ugushyingo), twifuza ko umutekano w’Imirenge SACCO waba ucunzwe neza. Twavuganye n’Ikigo cya ISCO (yahoze ari Intersec) ngo ibafashe, twashatse ikigo gifite ubushobozi n’ibikoresho. Ni igihe cyo gushyiraho uburinzi bufatika, niyo yaba umurinzi umwe ku munsi ariko ufite imbunda n’amahugurwa ahagije."

RCA yahisemo ko Sacco zirindwa na ISCO

Umuyobozi ushinzwe ishami ry’uburinzi muri ISCO, Harera James, yasobanuriye abayobozi b’Imirenge Sacco amavu n’amavuko ndetse n’uburambe bw’iki kigo, abizeza ko batazabatenguha.

Yagize “Ku bakiriya basanzwe muri rusange, ushinzwe umutekano ufite imbunda yishyurwa amafaranga ibihumbi 180 ku kwezi hatarimo umusoro ku nyungu (TVA) udafite imbunda ni amafaranga ibihumbi 120 hatarimo umusoro ku nyungu. Kubera ibiganiro twagiranye na RCA batugaragarije ikibazo cy’ubushobozi bwa za Sacco [...] igiciro twarakigabanyije tugeza ku mafaranga ibihumbi 160 hatarimo TVA.”

Bamwe mu bayobozi ba Sacco bagaragaje impungenge

Hakizimana Jean de Dieu, Visi Perezida wa Sacco ya Kanombe yagize ati “Niba ucunga umutekano w’ikigo gishobora kunguka miliyari 20 ku mwaka, ukaza gucunga uw’ikigo gishobora kunguka miliyoni ebyiri, eshatu, eshanu, wajya kugicungira umutekano ukamanukaho ibihumbi 20 […] aho niho nagiriye impungenge, aho mwabanje gutekereza uburyo Sacco zunguka?”

Yakomeje avuga ko nta muntu wanga icyiza, ahubwo ngo buri wese aracyifuza ariko hari igihe kimunanira.

Ati “Nagize impungenge ku biciro, Sacco murazizi nagiraga ngo tugereranye hamwe no kwitanga no kwitangira igihugu dufashe Sacco zitere imbere kuko hari igihe muzazisaba ibyo zishobora kubona”.

Abandi bakomeje batanga ibitekererezo, bagaragazaga ko Sacco zikiyubaka zitarabona ubushobozi bwo kwishyura abashinzwe umutekano amafaranga menshi, mu gihe hari abatangaga icyifuzo cy’uko abanyamuryango bagira uruhare mu kwishyura abashinzwe umutekano bafite ibikoresho byabugenewe.

RCA yakuriye inzira ku murima abifuza inkunga

Ku kifuzo cy’uko Ikigo cy’Igihugu gishinzwe Amakoperative cyakunganira Sacco kubona amafaranga yo kwishyura abashinzwe umutekano, Umuyobozi wa RCA yababwiye ko bagomba kwishakamo ubushobozi.

Yagize ati “Gutera inkunga ntabwo bikigezweho muri iyi minsi, iyo ni imyumvire idakwiye kuba irangwa mu Mirenge Sacco, ishobora kurangwa mu makoperative ya yandi acuruza ibindi bintu. Mukwiriye kwishakamo ibisubizo.”

Ku wa 29 Nzeri uyu mwaka, Umurenge SACCO ’Imbaduko’ wo mu Murenge wa Burega, mu Karere ka Rulindo, yatewe n’abajura bayicucura amafaranga y’u Rwanda 4,926,530 banica umwe mu baharindaga bamuteraguye ibyuma.

Umuyobozi wa RCA, Munanura Apollo, avuga ko mu kwezi gutaha bifuza ko Imirenge SACCO yaba icunzwe neza
Bamwe mu bayobozi b'Imirenge Sacco bitabiriye iyi nama
Abayobora Imirenge SACCO basabwe gutandukana n'umuco wo kunyereza umutungo w'abanyamuryango

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved