Kwamamaza

Rwezamenyo:Ntibahuza n’ubuyobozi butabemerera gukora amasaha 24/24

Yanditswe kuya 16-07-2016 saa 16:24' na Thamimu Hakizimana


Mu gihe umujyi wa Kigali ukataje mu iterambere ari nako ushishikariza abantu gutanga serivisi mu masaha yose y’umunsi, abacururiza mu tubari duherereye mu Kagari ka Rwezamenyo ya I , mu Murenge wa Rwezamenyo ,Akarere ka Nyarugenge baravuga ko babangamiwe cyane n’ubuyobozi bubabuza gukora amasaha yose.

Abafite utubari muri aka Kagari ka Rwezamenyo ya I, ahitwa i Matimba no kuri Cosmos baganiriye na IGIHE bavuga ko babangamirwa cyane n’uburyo bategetswe ko buri gihe bazajya batangira gucuruza saa Sita z’amanywa kugeza saa yine z’ijoro mu gihe gahunda ya Leta ihora ishishikariza abaturage cyane cyane bo mu Mujyi wa Kigali gukora amasaha 24/24.

Mutuyimana (izina ryahinduwe kubera impamvu z’umutekano we) avuga ko nta kintu kimubabaza nk’ukuntu imisoro batanga ihora yiyongera mu gihe badakora amasaha yose nkuko babyifuza.

Yagize ati “ Turiha amafaranga y’imisoro kandi ahora yiyongera ikindi tukongeraho ay’isuku n’ay’umutekano nk’uko bikwiye, mu gihe twe dukora amasa agera ku 10 gusa ku munsi.”

Undi yagize ati “ Ariko ko inzego nkuru z’ubuyobozi bw’umujyi wa Kigali zihora zivuga ngo dukore amasaha yose ngo umutekano urahari nta kibazo.Twe kuki batubuza kwishakira amafaranga adutunga ariko bo bagashaka ko ayo bashatse yose tuyabaha igihe bayashakiye? Kuki se ahubwo twe batatugabanyiriza amafaranga y’imisoro tubaha kandi tudacuruza amasaha yose nk’ayabandi.”

Umunyamabanga Nshingwabikorwa w’Umurenge wa Rwezamenyo Mutarugera Dieudonne we avuga ko iki cyemezo cyafashwe kubera impamvu z’umutekano muke ugaragara muri aka gace ndetse n’urugomo rukunze gukorwa n’abasinzi baho.

Yagize ati “ Ngira ngo ikibazo gihari ni icy’umutekano kuko iyo bacuruje bakageza mu gitondo usanga abantu basinda bakarwana bigateza umutekano muke ku buryo no mu minsi ishize hari n’indaya yatewe icyuma irapfa.”

Yongeyeho ko uyu mwanzuro wanafashwe mu rwego rwo kurwanya urusaku ruturuka mu tubari dutandukanye two mu Murenge wa Rwezamenyo mu masaha y’ijoro cyane cyane ko bibuza abaturage gusinzira.

Meya w’Umujyi wa Kigali, Monique Mukaruliza na we avuga ko nubwo abanyarwanda cyane cyane abaturiye Umujyi wa Kigali bahora bashishikarizwa gukora amasaha 24/24 kugira ngo bikorwe ubuyobozi bubanza bukareba umutekano w’aho hantu uko umeze.

Yagize ati “ Nibyo iyo gahunda yo gukora amasaha 24/24 irahari, ariko tubanza kureba n’aho igiye gukorerwa uko hameze. Umutekano waho umeze gute? Kuko iyo nta mutekano byose biba bidashoboka.”

Yakomeje asaba abaturage bo muri uyu murenge kubanza kwicungira umutekano hakorwa irondo ku bufatanye na polisi n’ingabo abantu bakabanza bagatekana noneho gukora amasaha 24/24 bikabona kuza bifite umutekano usesuye.

Bamwe mu bahatuye batangira kunywa inzoga mu gitondo cya kare, igicamunsi kikagera basinze
Agace ka Rwezamenyo gakunze kugaragaramo imirwano ya hato na hato y'abasinzi
Tumwe mu tubari two mu murenge wa Rwezamenyo turataka igihombo kubera kutemererwa gukora amasaha yose

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 29 Ugushyingo 2016
Copyright © 2009 -2014 - IGIHE Ltd - All Rights Reserved