Rwaza: Abaturiye hafi y’ahubatswe Paruwasi mu myaka ijana ishize bageze kuki?

Yanditswe na Ishimwe Israel
Kuya 29 Kanama 2016 saa 12:29
Yasuwe :
0 0

Abaturage bo mu murenge wa Rwaza, mu karere ka Musanze, bavuga ko nubwo ubukirisitu bwageze iwabo ku ikubitiro ndetse n’amashuri akahubakwa mbere, ngo nta terambere byabazaniye mu myaka isaga ijana hubatswe Paruwasi ya Rwaza.

Aba baturage bemeza ko abantu benshi bahize batagarutse ngo bahateze imbere kandi na Kiliziya Gatolika ihafite ubutaka bunini ngo na yo ntabwo ibubyaza umusaruro ngo biteze imbere abahatuye.

Rwaza ni yo paruwasi Gatolika ya 3 yashinzwe mu Rwanda, nyuma ya Save iri mu Ntara y’Amajyepfo na Zaza yo mu Burasirazuba. Icyo gihe hari ku itariki 20/11/1903 ubwo iyo misiyoni yashingwaga n’abapadiri, inaba paruwasi ya mbere ishinzwe mu gace k’Amajyaruguru.

Bamwe mu baturage bavuga ko nubwo aho iyi paruwasi iherereye bahafata nk’ubutaka butagatifu ngo nta nyungu ifatika habagirira.

Nshimiyimana Anastase yagize ati “Aha hantu tuhafata nk’ubutaka butagatifu, ariko n’abize hano bose nta n’umwe wahagarutse ngo ahageze iterambere, ntacyo tubona twe byatumariye.”

Yankurije Stephanie we avuga ko ubutaka bwa kiliziya burimo amashyamba gusa.

Yagize ati “Kiliziya ntacyo yakoze kuko ahantu hose usanga ari amashyamba yayo gusa, bakwiye kuhubaka nk’amahoteli natwe tukahabona imirimo ndetse n’amashuri makuru abatuye Rwaza ntibajye kwiga kure kandi nta wadutanze kuyoboka kiliziya gatolika.”

Umushumba wa Diyoseze Gatolika ya Ruhengeri, Musenyeri Harorimana Vincent avuga ko iryo terambere barota rizabageraho ku bufatanye kuko batangiye iyo gahunda yo guteza imbere abakirisitu babo bashimangira ihame ry’uko Roho nzima itura mu mubiri muzima.

Yagize ati “Dufite imishinga myinshi y’iterambere muri kariya gace ka Rwaza ariko birasaba ubufatanye. Twe twiteguye guhuriza hamwe abize hariya ndetse n’abahavuka, igisigaye ni ukubishyira mu bikorwa maze iterambere rikagera hose no mu cyaro.”

Rwaza ni imwe mu ma paruwasi 13 agize diyoseze Gatolika ya Ruhengeri iherereye mu gace kazwi nk’Ubugarura katari ak’amakoro ku buryo usanga ubutaka bwarakomeye cyane kubuhinga bitoroshye.

Kugeza ubu iyo paruwasi ibarurwamo abapadiri 50 bayivukamo, abasenyeri 2 n’abandi bihayimana barimo ababikira n’abafurere.

Abaturage bavuga ko abo bose bagombye gusubiza amaso inyuma bakahateza imbere hakagaragara mu ruhando rw’ahantu hazwi koko habanje ubukirisitu.

Umushumba wa Diyoseze Gatolika ya Ruhengeri, Musenyeri Harorimana Vincent

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza