00:00:00 IGIHE NETWORK KN KINYARWANDA EN ENGLISH FR FRANCAIS

RwandAir yatangije ingendo zijya i Lubumbashi

Yanditswe na Iradukunda Serge
Kuya 29 Nzeri 2021 saa 05:54
Yasuwe :
0 0

Sosiyete Nyarwanda ikora ingendo zo mu kirere, RwandAir, yatangije ku mugaragaro ingendo zijya mu Mujyi wa Lubumbashi muri Repubulika Iharanira Demokarasi ya Congo.

Lubumbashi ni umujyi wa gatatu ukomeye muri Repubulika Iharanira Demokarasi ya Congo. Uherereye mu Majyepfo ashyira Uburasirazuba bw’iki gihugu, ukaba uhana imbibi na Zambia.

Muri Kanama 2021 ni bwo RwandAir yatangaje ko ishaka kongera uyu mujyi mu byerekezo bitandukanye indege zayo zijyamo.

Ni inzozi zabaye impamo kuri uyu wa Gatatu, tariki ya 29 Nzeri 2021, kuko aribwo indege ya mbere ya RwandAir yahagurutse ku Kibuga Mpuzamahanga cy’Indege cya Kigali yerekeza muri uyu Mujyi ukungahaye ku mabuye y’agaciro.

Kuba RwandAir yatangiye gukorera ingendo muri uyu mujyi, ni ibintu Minisitiri wungirije ushinzwe Ubwikorezi muri iki gihugu, Marc Ekila Likombo, yemeza ko bishimangira umuhate w’abakuru b’ibihugu byombi wo kurushaho guteza imbere umubano hagati y’ibihugu byombi.

Umubare w’abagenzi bitabiriye uru rugendo rwa mbere ntiwari munini ariko wabonaga bose bishimiye kuba babonye uburyo bworoshye buzafasha kujya bagirira ingendo hagati y’Umujyi wa Kigali na Lubumbashi.

Biteganyijwe ko buri cyumweru indege ya RwandAir izajya igirira ingendo ebyiri i Lubumbashi.

Ubwo iyi ndege yari igeze ku Kibuga Mpuzamahanga cy’Indege cya Lubumbashi yakiriwe mu birori bikomeye byari byanitabiriwe na Ambasaderi w’u Rwanda muri RDC, Vincent Karega.

Nyuma ibi birori byakomereje muri ‘Pullman Hotel Lubumbashi’ ahabereye umuhango wo gukata cake nk’ikimenyetso cyo gutangiza ku mugaragaro ingendo za RwandAir muri uyu mujyi.

Lubumbashi ni umujyi uri ku buso bwa 747 km², imibare yo mu 2015 igaragaza ko uyu mujyi wari utuwe n’abaturage miliyoni 1.794.

Lubumbashi ifatwa nk’Umurwa Mukuru w’Intara ya Haut-Katanga ndetse ni umwe mu mijyi igendwa cyane muri RDC cyane ko unafatwa nk’igicumbi cy’ubucukuzi bw’amabuye y’agaciro bukorerwa muri iki gihugu.

Muri Werurwe 2019, ni bwo u Rwanda na RDC, byasinyanye amasezerano yo gufungurirana ikirere. RwandAir yahise itangira gukora ingendo eshatu mu Cyumweru za Kigali-Kinshasa, aho kuri ubu ijya cyangwa ikava ku Kibuga cy’Indege Mpuzamahanga cya N’Djili kiri i Kinshasa. Biteganyijwe ko uyu mwaka uzarangira RwandAir itangije n’ingendo zijya i Goma.

Indege ya RwandAir ubwo yiteguraga guhaguruka ku Kibuga Mpuzamahanga cy'Indege cya Kigali
Byari ibyishimo ku bagenzi bajyanye na RwandAir mu rugendo rwayo rwa mbere i Lubumbashi
Indege ya RwandAir yerekeza i Lubumbashi
Indege ya RwandAir yakiriwe mu muhango uzwi nka 'Water salute' usanzwe ukorerwa indege nshya, iyatangiye icyerekezo gishya ndetse n'igihe umupilote agiye mu kiruhuko cy'izabukuru
I Lubumbashi RwandAir yakiriwe n'abayobozi batandukanye barimo na Ambasaderi w'u Rwanda muri RDC, Vincent Karega
Muri ‘Pullman Hotel Lubumbashi’ habereye umuhango wo kwakira RwandAir
Hari hateguwe umutsima na 'Moët & Chandon Brut Impérial NV Champagne'

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .