Kwamamaza

RwandAir irageza mu Rwanda indege ya mbere nini

Yanditswe kuya 28-09-2016 saa 08:05' na Ntakirutimana Deus


Sosiyete Nyarwanda ikora ingendo zo mu Kirere, RwandAir irageza mu Rwanda muri iki gitondo, indege nshya ya Airbus 330 izakora ingendo zigana mu Burayi n’aho itageraga muri Aziya.

Iyo ndege y’imyanya 244 imaze igihe kitageze ku mwaka irimo gukorwa irasesekara mu Rwanda hagati ya saa yine na saa tanu z’uyu munsi tariki ya 28 Nzeri 2016, nk’uko Umuyobozi Mukuru wa RwandAir,John Mirenge yabitangaje.

Mirenge ari mu Bufaransa aho yagiye gusura iyo ndege mu ruganda rwayikoraga, yavuze ko imeze neza ndetse barangije no kuyishakira izina rifite amateka mu Rwanda.

Ati “Irasa neza cyane, izina ryayo ni ‘Ubumwe’, uyu mwaka igihe cyose bamaze bayikora byari byiza ko dutegereza kuko imeze neza cyane.”

Iyo ndenge ngo iratangira ingendo zayo mu cyumweru gitaha yerekeza muri bimwe mu byerekezo indege za RwandAir zitaganagamo.

Ati “Tuzayikoresha mu ngendo zijya mu Burayi no muri Aziya, nko mu Buhinde n’i Dubai. Mu cyumweru gitaha izatangira kujya i Dubai, mu minsi mike tuzajya i Burayi nyuma yaho tujye muri Aziya yo hagati mu Buhinde.”

Iyi ndege kandi izakurikirwa n’indi ifite imyanya 274 izagere mu Rwanda mu Ugushyingo 2016, nayo izafasha muri izo ngendo.

Abanyarwanda n’abatwarwa na RwandAir bashonje bahishiwe kuko ngo irimo kureba uburyo yagura izindi ndege zisumbuyeho mu gihe cya vuba.

Mirenge ati “ Turi mu biganiro byo kureba uburyo mu gihe cya hafi twagira izindi ndege tuzana tugakomeza kwagura ingendo ku Isi hose.”

Iyo ndege ije gukemura ibibazo RwandAir yahuraga nabyo byo kubura aho itwara imwe mu mizigo ndetse no kudatwara abagenzi bose bifuzaga kujya mu mahanga, ariko ngo ikibazo kirakemutse ndetse ngo mu buryo bwa burundu.

Ambasaderi w’u Rwanda mu Bufaransa, Jacques Kabale yavuze ko iyo ndege izaborohereza mu kazi kabo mu gihe yatangiye kugana i Burayi kuko izafasha guhuza mu buryo bworoshye ibihugu by’aho n’u Rwanda.

RwandAir ikorera ingendo mu mijyi 18 irimo Nairobi, Entebbe, Mombasa, Bujumbura, Lusaka, Juba, Douala, Dar es Salaam, Kilimanjaro, Johannesburg, Dubai, Lagos, Libreville,Cotonou na Brazzaville.

Iyi ndege nshya ya Airbus 330 niyo nini RwandAir itunze kugeza ubu

Mu ntangiriro z’uyu mwaka yatangaje ko iteganya kwagura ibikorwa byayo ku masoko y’i Burayi, itangiza ingendo mu Mijyi ya Londres mu Bwongereza n’i Paris mu Bufaransa, mu Buhinde no mu Mujyi wa Guangzhou mu Bushinwa bitarenze umwaka utaha.

Mirenge kandi yari yatangaje ko no muri Afurika bagiye kwagura izo ngendo ikajya mu Mijyi nka Abidjan muri Côte d’Ivoire, Harare muri Zimbabwe, Lilongwe muri Malawi, Khartoum muri Sudani n’i Bamako muri Mali.

Ikindi igiye gukora ngo ni ukongera indege esheshatu ku umunani yari isanganywe zikaba 14.

Uyu mwaka RwandAir yashyizwe ku rutonde rw’amasosiyeti y’indege ku isi afite umutekano, nyuma yo gukorerwa ubugenzuzi n’Ikigo Mpuzamahanga (IATA) gishinzwe indege zitwara abantu n’ibintu.

Iitsinda ry'abayobozi n'abakozi b'Ikigo gishinzwe Indege za gisivili mu Rwanda (RCCA) bagiye kwakira iyo ndege
Abanyamakuru batandukanye i Toulouse mu Bufaransa baganira na John Mirenge uyobora RwandAir
Mirenge na Ambasaderi Kabale mu kiganiro n'abanyamakuru

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved