Rwanda Day: Perezida Kagame yongeye gusabwa kwiyamamaza muri 2017

Yanditswe na Kanamugire Emmanuel
Kuya 25 Nzeri 2016 saa 01:20
Yasuwe :
0 0

Mu birori by’umunsi w’ubudasa ‘Rwanda Cultural Day’ byabereye i San Francisco muri Leta ya California, Abanyarwanda bahawe impanuro n’Umukuru w’Igihugu nyuma bahabwa umwanya wo kubaza ibibazo no gutanga ibitekerezo byarushaho kubaka igihugu.

Umwaka ushize Abanyarwanda basabye ko Itegeko Nshinga rya Repubulika y’u Rwanda ryo mu 2003 rivugururwa, birakorwa ndetse bishimangirwa na referendumu.

Perezida Kagame na we nyuma yo gusabwa n’Abanyarwanda kuzakomeza kubayobora na nyuma ya 2017, mu ntangiriro z’uyu mwaka yashimangiye ko adashobora kubyanga, icyakora yaba we ku giti cye cyangwa ishyaka aturukamo rya FPR-Inkotanyi ntibaremeza niba bazamutangaho umukandida.

Ibi byatumye muri Rwanda Cultural Day, Lorys Munderere ubarizwa muri Diaspora yo mu Bubiligi amusaba ko yaziyamamaza.

Yagize ati“Ku bazi amateka muribuka habayeho abagabo ba Roosevert, ba DeGaule na ba Churchill, mu bihe bikomeye abagabo bakomeye nibo bashyiraho inzego zikomeye zikura igihugu mu bihe bikomeye, niyo mpamvu Nyakubahwa mbasaba kuziyamamaza muri 2017.”

Munderere yakomeje avuga ko yumva Abanyarwanda bari bakwiye guha Perezida Kagame umudali w’ishimwe, batarinze gutegereza imidali y’ishimwe ahabwa n’Abanyamahanga.

Umukuru w’Igihugu yamusubije ko umudali mwiza ari ibikorwa by’Abanyarwanda bibateza imbere.

Ati“Umudali mwiza ni ibikorwa bibateza imbere, nimutera imbere niwo mudali mwiza.”

Nubwo nta gisubizo Perezida Kagame yamuhaye ku migambi ye mu matora y’Umukuru w’Igihugu ateganyijwe muri Kanama umwaka utaha, aherutse guca amarenga ko aziyamamaza agakomeza kuyobora Abanyarwanda nk’uko babyifuza.

Yavuze ko Abanyarwanda bagaragaje mu buryo bwumvikana amahitamo y’ibyo bifuriza ejo hazaza h’igihugu, bityo ko inzira yo kuvugurura Itegeko Nshinga yatanze umwanya wo kureba koko niba ibyo Abanyarwanda bashakaga guhindura bishyira mu gaciro.

Ati “ Mwansabye kuzakomeza kuyobora igihugu nyuma ya 2017, nkurikije uburemere bwabyo n’imyumvikanire mwabihaye nta kuntu ntabyemera ubwo hasigaye inzira zisanzwe bigomba kunyuramo igihe nikigera.”

Asubiza abamusabira umudali yavuze ko umudali mwiza ari ibikorwa biteza imbere abaturage

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza