Kwamamaza

Rwanda Day: Minisitiri Mushikiwabo yaratiye amahanga ibanga ry’umuco Nyarwanda

Yanditswe kuya 25-09-2016 saa 03:01' na Rabbi Malo Umucunguzi na Mazimpaka Jean Pierre


Minisitiri w’Ububanyi n’Amahanga w’u Rwanda, Louise Mushikiwabo, yagaragaje ko mu Kinyarwanda harimo indangagaciro nyinshi zigaragaza ubushake bw’Abanyarwanda, haba mu kwiteza imbere ndetse no guharanira kuba ku isonga.

Mu kiganiro cyabimburiye ibindi muri Rwanda Day mu Mujyi wa San Francisco kuri uyu wa Gatandatu tariki 24 Nzeri 2016, Minisitiri Mushikiwabo yavuze ko nko mu mazina nyarwanda harimo ibisobanuro bigaragaza icyerekezo Abanyarwanda bafite.

Ati “Uzabona mu rurimi rwacu amagambo menshi agaragaza ukwifuza kuba ku isonga. Mu mazina y’abantu dufite uzabonamo inyota yo gushaka gukora ibiruse ibisanzwe. Uzabisanga mu mibereho ya buri munsi, kugaragaza guhatana, inyota yo kuba aba mbere, gushaka kugera ku bintu birenze ibyitezwe, ndatekereza ko ari kimwe mu bigaragaza ko dukeneye kuruta uko tumeze ubu.

“Kutarushwa, kudasumbwa, ni amazina dusasanga mu muco wacu.”

Umuyobozi w’Ikigo cy’Igihugu cy’Imiyoborere, RGB, Prof Shyaka Anastase, yavuze ko nko mu migani y’Ikinyarwanda yahanzwe n’abakurambere, usanga umugani umwe ungana igitabo cyose kandi ikagaragaza imitekerererze y’Abanyarwanda.

Ati “Iyo umwe avuze ngo ‘agahugu katagira umuco karacika’, bivuze ko umuco ari ishingiro ry’ubukungu bw’igihugu icyo aricyo cyose. Iyo umuntu avuze ngo ‘u Rwanda ntiruterwa ruratera, bivuga umutekano w’igihugu no gusigasira umusingi wo kucyubaka’.

“Iyo bavuze ngo imbuto y’umugisha yera ku muruho, ni ukuvuga ngo gukora cyane niwo musingi w’ahazaza heza. Iyo bavuze ngo ‘ineza ikurenza impinga’, ni ukuvuga ngo umuco nyarwanda ushimangira gutanga serivisi nziza.”

Prof Shyaka yavuze ko iyo ngingo ishobora guhuzwa no kuba u Rwanda rukomeza kuyobora ibindi bihugu mu bijyanye no koroshya ubucuruzi.

Raporo igaragaza uko ibihugu birushanya mu koroshya ubucuruzi mu 2015, yashyize u Rwanda ku mwanya wa kabiri muri Afurika nyuma y’Ibirwa bya Maurice, ndetse ruza ku mwanya wa 62 ku Isi.

Prof Shyaka kandi yakomoje ku ndirimbo ivuga ngo ‘Ubukene bw’akarande si isezerano’, bigaragaza ko u Rwanda rudashaka ubukene ndetse hari n’umugani uvuga ngo “Uwaba muzima yakamirwa n’amaboko, bigaragaza ko “ukwihaza ari inshingano y’Abanyarwanda.”

Minisitiri Mushikiwabo yavuze ko nko mu mazina nyarwanda harimo ibisobanuro bigaragaza icyerekezo Abanyarwanda bafite

Amafoto: Mazimpaka Jean Pierre

Mazimpaka Jean Pierre - San Francisco na Rabbi Malo Umucunguzi - Kigali


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved