Rwamagana: RCS yibukije imfungwa n’abagororwa uburenganzira bwabo

Yanditswe na Hakizimana Jean Paul
Kuya 6 Ukuboza 2018 saa 09:39
Yasuwe :
0 0

Urwego rw’Igihugu rushinzwe imfungwa n’abagororwa (RCS) rwibukije abagorowa ko nubwo bafunzwe bagifite uburenganzira bwo kudahohoterwa no kubona serivisi nziza.

Byagarutsweho ku wa Kabiri muri gereza ya Nsinda ubwo hatangizwaga ubukangurambaga bugamije kwereka abagororwa uburenganzira bwabo. Ni igikorwa gifite insanganyamatsiko igira iti “Uri umwere igihe cyose utarahamwa n’icyaha.”

Ni ubukangurambaga RCS yafatanyije n’imiryango nka RBJ (Rwanda Bridge to Justice), Umuryango ufasha abagororwa bahungabanye (DIDE) ndetse na Komisiyo y’ubumwe n’ubwiyunge.

Bwatangirirye muri gereza ya Nsinda ifungiwemo abarenga ibihumbi 12, ikaba ari nayo ya mbere mu Rwanda ifungiyemo abagororwa benshi.

Komiseri muri RCS ukuriye ishami rishinzwe ibikorwa byo kugorora Jean Bosco Kabanda yavuze ko leta y’u Rwanda ikora uko ishoboye ngo umugororwa abone ibyo agenewe byose ndetse uburenganzira bwe bwubahirizwe.

Yagize ati ”Leta igerageza gukora byinshi kugira ngo yubahirize uburenganzira bw’abagororwa birimo nko kuba dosiye y’umugororwa yuzuye, abona amafunguro, aho aryama, ubuvuzi agakora siporo n’ibindi byinshi bituma adafatwa nabi.”

“Ikindi iyo twemerera imiryango nk’iyi ngiyi itari iya leta kuza hano bakinjira mu magereza mukaganira, nabwo tuba turi kubahiriza ya mategeko.”

Umuyobozi w’umuryango RBJ ufasha imfungwa n’abagororwa kubona ubutabera Me. Bugingo Jean Bosco yabwiye imfungwa n’abagororwa ko bakwiye kumenya uburenganzira bwabo igihe cyose.

Ati ”Uburenganzira bw’umuntu mugomba kumenya ko butangira kubahirizwa mu gihe wahamagajwe cyangwa wafashwe n’inzego zibishinzwe kuko uba ukiri umwere, ntabwo butangira kubahirizwa igihe wakatiwe n’inkiko. Turabasaba kumenya uburenganzira bwanyu mukamenya ko mu gihe mutarakatirwa n’inkiko muba mukiri abere.”

Yakomeje avuga ko impamvu batangiye ubu bukangurambaga basanze hari benshi mu bagororwa baba batazi uburenganzira bwabo, biyemeza gukora ubukangurambaga kugira ngo babubamenyeshe aho bibaye ngombwa babavuganire.

Murenzi Emmanuel ugororerwa muri gereza ya Nsinda yabwiye IGIHE ko bibashimisha kubona leta n’imiryango itandukanye bakomeza kubatekereza mu gihe bari muri gereza.

Ati ”Ni iby’agaciro kubona badutekereza bakaza kudusobanurira ibijyanye n’uburenganzira bwacu, muri gereza usangamo abantu batandukanye barimo abazi uburenganzira bwabo n’abandi baba batabuzi. Rero babandi batabuzi iyo duhurijwe hamwe gutya hari byinshi bamenya kubijyanye n’uburenganzira bwabo kuburyo bibagirira umumaro.”

Gashumba Augustin we yavuze ko muri gereza bafitemo abagororwa bafite ubumenyi mu mategeko bagerageza guhugura bagenzi babo baba batarakatirwa n’inkiko, ku buryo bajya kuburana hari byinshi bazi ku mategeko kandi bikanabafasha kutarenganywa.

Gereza ya Nsinda ifungiwemo abarenga ibihumbi 12
Komiseri muri RCS ukuriye ishami rishinzwe ibikorwa byo kugorora Jean Bosco Kabanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza