Rwamagana: Ikirombe cy’amabuye y’agaciro cyagwiriye bane cyabaye gifunzwe

Yanditswe na Mukaneza M.Ange
Kuya 10 Mata 2018 saa 10:38
Yasuwe :
0 0

Ubuyobozi bw’Ikigo PIRAN Resources Limited, gicukura amabuye y’agaciro mu kirombe giherutse kugwira abakozi bane mu Karere ka Rwamagana, bwatangaje ko bwabaye buhagaritse imirimo kubera impamvu z’umutekano.

Ku wa 31 Werurwe 2018, ahagana sa tanu z’igitondo nibwo abantu batanu baguweho n’ikirombe mu Murenge wa Mwurire, ku bw’amahirwe umwe aza kuvamo ari muzima atanga amakuru.

Nyuma y’iminsi itatu bane bari basigayemo na bo baje gukurwamo ari bazima. Igikorwa cyagezweho ku bufatanye bw’abantu bagera ku 150 barimo abapolisi, abaturage ndetse n’abacukura amabuye y’agaciro mu kirombe cya Rutongo.

Umwe muri bo witwa Gilbert Gasigwa yavuze ko batabashaga kumenya niba ari nijoro cyangwa ku manywa, icyizere cyo kubaho bari bafite akaba ari ikimenyetso bohererezwaga n’abaje kubatabara.

Kugira ngo babashe kumenya aho baherereye, abaje gutabara bahondaga ku ibuye inshuro imwe, abaheze mu kirombe bakabasubiza barihonda inshuro eshatu.

Umuyobozi mukuru wa PIRAN, John Sanderson, yabwiye The Newtimes ko iyi mpanuka yabereye mu kirombe cya gasegereti giherereye mu Murenge wa Mwurire, yatumye bafata umwanzuro wo kongera gusubiramo ibirebana n’umutekano birinda ko byakongera kubaho.

Ati “ Twabaye duhagaritse ibikorwa byo gucukura mu birombe byacu bya Mwurire na Musha. Turashaka kubanza gusuzuma ibirebana n’umutekano ndetse n’ingaruka zishobora kugera ku bacukuzi bacu."

Sanderson yavuze ko raporo izakorwa n’impande zihuriweho izanonosorwa neza ndetse ikazifashishwa mu kurushaho kunoza ibirebana n’umutekano mu birombe byabo.

Ikirombe cya Mwurire cyatangiye gucukurwamo amabuye y’agaciro mu gihe cy’abakoloni b’Ababiligi, bivugwa ko hari aho usanga kirimo ibinogo.

Hari amakuru avuga ko iriya mpanuka yatewe n’uko abacukuzi baba batazi ko birimo, bityo umwe akaba yarakuruye ibuye ryari ripfutse kimwe mu binogo byari hejuru yabo, bigatuma inzira rukumbi bagombaga gusohokeramo yifunga.

Umuvugizi wa Polisi y’u Rwanda mu Ntara y’i Burasirazuba, Chief Inspector of Police (CIP) Theobald Kanamugire, na we yatangaje ko bakomeje gukorana n’abacukuzi kugira ngo barebe ko impanuka zibera mu birombe zagabanuka cyangwa zikirindwa.

Ubuyobozi bw’ikigo PIRAN cyo muri Afurika y’Epfo buvuga ko bateganya gushora miliyoni eshanu z’amadolari mu buryo bugezweho bwo gucukura amabuye y’agaciro no guha abakozi amahugurwa.

Umuyobozi mukuru wa PIRAN Resources Limited, John Sanderson, yavuze ko impanuka yabereye mu kirombe cya gasegereti giherereye mu Murenge wa Mwurire, yatumye bafata umwanzuro wo kongera gusubiramo ibirebana n’umutekano birinda ko byakongera kubaho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza