Rwamagana: Bahawe amazi meza basabwa kunoza isuku no kuyafata neza

Yanditswe na Sekamana Mathias
Kuya 4 Nyakanga 2019 saa 06:32
Yasuwe :
0 0

Abaturage bo mu Mudugudu wa Rambura, Akagari ka Nyagasambu, Umurenge wa Fumbwe mu Karere ka Rwamagana, bahawe amazi meza basabwa kunoza isuku mu ngo zabo no ku mubiri kugira ngo barusheho kugira imibereho myiza.

Aba baturage bahawe ivomero ryatwaye amafaranga agera kuri miliyoni umunani ryubatswe na Wasac, mu mudugudu wa AVEGA Agahozo watujwemo imiryango 25 y’abagizwe imfubyi n’abapfakazi na Jenoside yakorewe Abatutsi mu 1994.

Usibye iyi miryango, iri vomero rizakoreshwa n’izindi ngo zigera kuri 37 zo mu mudugudu wa Rambura, ndetse n’abasengera kuri ADEPR Nyagasambu.

Umuyobozi Mukuru wa WASAC Eng. Muzora Aimée, yasabye abaturage bo muri Rambura kurushaho kwita ku isuku kuko aya mazi ari muri gahunda nziza za leta zo kunoza imibereho myiza y’umuturage.

Yagize ati “Turabasaba kurushaho kunoza isuku mu ngo no ku mubiri. Iki ni igikorwa kiri muri gahunda nziza ya leta yo kwita ku mibereho myiza y’umuturage. Amazi ni ubuzima.Turabasaba kubungabunga ibi bikorwa remezo”.

Abaturage bo mu mudugudu wa Rambura nabo bishimiye ko begerejwe amazi, bavuga ko agiye kubafasha kunoza isuku.

Musindikazi Odette utuye muri uyu mudugudu yagize ati “Turishimye, twavomaga Gahondohondo kandi nkanjye utagira abana tubana byangoraga, none bazanye amazi mu irembo iwanjye.Tuzajya dufura byoroshye tunywe n’amazi meza.

Katabarwa Emmanuel, umwe mu bagizwe imfubyi na Jenoside utuye muri uyu mudugudu, yavuze ko bagiye kujya bakoreshaga amazi meza kuko akenshi bakoreshaga amazi y’igishanga.

Ati “Ubuzima bugiye kuba bwiza, twavomaga amazi mabi hano hepfo mu gishanga, twashaka ayo kunywa tukajya Gahondohondo, turishimye”.

Nyuma y’uko aba baturage bagaragaje kandi ko iri vomero ridahagije, WASAC yasabye ubuyobozi bw’Akarere ka Rwamagana ko bwayishakira ahandi hakubakwa irindi vomo kugira ngo birinde inkomati, ubuyobozi buhita bunabona ubutaka hakaba hagiye gukurikiraho kuryubaka.

Umuyobozi w’Akarere ka Rwamagana Mbonyumuvunyi Radjab, yasabye abaturage ba Fumbwe gufata neza ibikorwa remezo bagezwaho.

Ati “Turabasaba gufata neza ibikorwa remezo bikabafasha kugira imibereho myiza.Turashimira Wasac kuba yarahisemo kuzana iki gikorwa i Nyagasambu mu karere kacu ka Rwamagana”.

Iki gikorwa cyahuriranye n’umunsi wo gusoza iminsi 100 yo kwibuka Jenoside yakorewe abatutsi mu 1994, kikaba kiri no muri gahunda yo gufata mu mugongo abacitse ku icumu.

Fumbwe ni umwe mu mirenge igize akarere ka Rwamagana, ukaba utuwe n’abaturage bagera ku 26 338. Ufite ubuso bwa kilometero kare 44.

Abaturage bahise batangira kuvoma ako kanya
Abatuye mu mudugudu wa Rambura bahawe amazi meza basabwa kuyitaho
Eng. Muzora yasabye abaturage ba Rambura kurushaho kunoza isuku
Ubwo Eng Muzora yafunguraga aya mazi ku mugaragaro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza