Kwamamaza

Rwamagana: Bahangayikishijwe n’imbwa zibaca ruhinganyuma zigataburura imibiri y’ababo

Yanditswe kuya 6-09-2016 saa 13:54' na Thamimu Hakizimana


Abaturage bo Kagari ka Ruhunda, Umurenge wa Gishari ho mu Karere ka Rwamagana baravuga ko bahangayikishijwe cyane n’imbwa zitaburura imibiri y’ababo kubera irimbi ryabo riri ku rutare bituma badacukura imva zujuje igipimo.

Iri rimbi riherereye mu Kagari ka Ruhunda ryaguzwe mu misanzu y’abaturage ingana na miliyoni zisaga eshatu z’amafaranga y’u Rwanda kuko buri muturage wo muri aka kagari yatanze ibihumbi bitanu.

Aba baturage bemeza ko babangamiwe n’uko aho iryo rimbi riherereye ari ku rutare kuko mu gihe baje gushyingura usanga n’abacukura nta muntu ujya urenza metero y’ubujyakuzimu kubera uburyo ubutaka bwaho bukomera.

Bamwe mu baganiriye na Radiyo Flash FM, bemeza ko kudacukura metero irenze imwe bituma usanga mu masaha ya nimugoroba hari imbwa ziza zigataburura imibiri y’abashyinguwe muri iryo rimbi bityo bagasaba ubuyobozi kubashakira aho ryimurirwa.

Umwe yagize ati “ Dufite impungenge kuko urumva nko kujugunya uwawe, si ukumushyingura. Umuntu ntabwo aba yizeye umutekano we. Turasaba ubuyobozi ko bwadufasha rikimurwa abacu bakajya bashyingurwa mu cyubahiro.”

Undi mugore ati “Kuhacukura byonyine ni ikibazo kuko twagiyeyo abantu birabananira birirwayo; ariko wowe uzi gushyingura umuntu wawe ukazasanga imbwa zaramuriye?”

Ubuyobozi bw’umurenge wa Gishari bwateye utwatsi ibyo abaturage bavuga

Umunyamabanga Nshingwabikorwa w’Umurenge wa Gishari, Marc Rushimisha , we avuga ko ibivugwa n’aba baturage atari ukuri kuko ngo na we yahageze agasanga nta kibazo hatwaye.

Yagize ati “ Kugeza uyu munsi nta na rimwe nigeze numva ko imbwa zagiye ku irimbi zijya gutaburura, ni ahantu nyobora urumva sinabiyoberwa. Njye navuga ko nta shingiro bifite kubera ko maze kubikurikirana, negereye Umunyamabanga Nshingwabikora w’Akagari mubaza uko irimbi ryaguzwe arabinsobanurira ananyereka inzego bafatanyije kurigura nsanga byanyuze mu buryo bwemewe n’amategeko.”

Yakomeje atangaza ko kugira ngo iri rimbi rigurwe habanje kubaho ibiganiro hagati n’abaturage ndetse hanatorwa komite yabo igomba gukurikirana ibijyanye na gahunda yo kurigura ku buryo na nyuma baje gushyikiriza imyanzuro njyanama y’ako Kagari bishyirwa mu bikorwa ku buryo yemeza ko ibyakozwe byose byakoranywe ubushishozi.

Muri 2013 nibwo Minisiteri y’Ubutegetsi bw’Igihugu yatangaje ko nta Munyarwanda wemerewe gushyingura ahandi hantu hatari mu irimbi rusange hashingiwe ku itegeko ry’imicungire n’imikoreshereze y’amarimbi ryasohotse muri uwo mwaka.

Bahangayikishijwe n'imibiri y'ababo itabururwa n'imbwa

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved