Rwamagana:Abanyeshuri bo muri ASPEJ batswe telefoni barigaragambya

Yanditswe na Kanamugire Emmanuel
Kuya 8 Nzeri 2016 saa 07:39
Yasuwe : XX
0

Abanyeshuri bo mu ishuri ryisumbuye rya Muhazi(Lycée du Lac Muhazi) rizwi nka ASPEJ riherereye mu Murenge wa Muhazi mu karere ka Rwamagana baravugwaho kwigaragambya nyuma yo kwamburwa telefoni bakirirwa batariye.

Ibyo bibazo byagaragaye nyuma y’umukwabu wakozwe n’ubuyobozi bw’ikigo wo gusaka telefoni waje gufatirwamo izigera kuri 80 abo banyeshuri bari batunze mu buryo butemewe.

Ahagana mu ma saa kumi n’imwe z’umugoroba zo ku wa Gatatu tariki ya 7 Nzeri 2016, bamwe mu banyeshuri bakoze ikimeze nk’imyigaragambyo , bava mu kigo bagera ku muhanda uturanye n’icyo kigo nyuma basubirayo.

Mu kiganiro IGIHE yagiranye n’Umuyobozi wa ASPEJ, Murekatete Alphonsine yavuze ko icyo kibazo bagihosheje, ndetse bakaba basaba abanyeshuri kubahiriza amategeko y’ikigo ndetse n’amabwiriza ababyeyi baba barumvikanyeho.

Yagize ati” Ababyeyi bemeje ko umunyeshuri uzajya ufatanwa telefoni azajya yirukanwa, ariko ntabwo twabirukanye izo twafashe tuzazibika ababyeyi nibaza kuzifata umwaka urangiye twongere kubibutsa kubahiriza ibyo twemeranyijwe.”

Ubuyobozi bw’icyo kigo buvuga ko byakozwe n’abanyeshuri bagera ku ijana , nyuma buza kubihosha. Inzego z’umutekano zirimo polisi n’ingabo z’igihugu ndetse n’Umuyobozi w’Akarere ka Rwamagana bakaba baganirije abo banyeshuri babasobanurira ko nta myigaragambyo yemewe mu Rwanda, ko ushaka kuyikora abisabira uruhushya.

Ubuyobozi bw’ikigo ntibuhuza n’abahaye amakuru IGIHE bo bavuga ko abanyeshuri biriwe batagaburiwe kugeza saa mbiri z’ijoro ariko ubuyobozi bw’iryo shuri bukavuga ko bariye mu ma saa kumi n’igice z’umugoroba, nabwo kandi ngo ni abahungu bakeya, kuko ngo abakobwa bari bariye kare.

Uwo muyobozi yavuze ko abanyeshuri bafite telefoni bashyiriweho y’ikigo ku buryo bidakwiye ko buri wese atunga telefoni ye kuko ngo zishobora kubarangaza, zikanabararura, dore ko ngo abenshi bazikoreshaga bacungaga abayobozi baryamye, bakarara bazivugiraho ijoro ryose.

Ku ruhande rw’ababyeyi, Perezida wa komite y’ababyeyi akaba ahagarariye n’icyo kigo mu mategeko,Rutaremara Valens yavuze ko nk’ababyeyi bumvikanye ko abazajya bafatanwa telefoni bazajya birukanwa.

Uwo muyobozi yavuze ko bazagirana inama n’ababyeyi yo kongera kubibutsa gushyira mu bikorwa ibyo bumvikanye ku bijyanye no gutunga izo telefoni n’ubwo usanga abanyeshuri benshi batazihabwa n’ababyeyi.

Hari bamwe bavuga ko telefoni zifashwe n’ikigo zidasubizwa abanyeshuri, ariko ubuyobozi bw’ikigo bwabihakanye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza