Rutsiro: Ishuri ryatangije amatsinda yo kwizigama, umunyeshuri w’inkwakuzi yarengeje ibihumbi 240 Fw

Yanditswe na Evariste Nsengimana
Kuya 22 Ukwakira 2018 saa 08:26
Yasuwe :
0 0

Mukashema Marie Claire, umunyeshuri w’imyaka 13, ntagisabiriza ababyeyi be amafaranga y’isabune n’amavuta, nyuma yo kuyoboka gahunda yo kwizigamira yatangijwe n’Urwunge rw’Amashuri rwa Congo Nil i Rutsiro.

Mu 2016 nibwo abiga kuri iki kigo giherereye mu Murenge wa Gihango, batangiye gushishikarizwa kwizigamira mu matsinda, hagamijwe kugabanya abata ishuri babuze ibikoresho by’ibanze.

Bakoze amatsinda ajyanye n’ubushobozi bwabo muri gahunda bise ‘Mfite icyerekezo’.

Umwarimu ukurikira iyi gahunda, Usanase Marie France, yabwiye IGIHE ko bizigama mu buryo butandukanye, ku buryo hari n’ushobora kuzana 5000 Frw mu cyumweru.

Iyo ubaze mu myaka ishize, usanga uwizigamaga 5000 Frw mu cyumweru, yaba yarabikije asaga ibihumbi 500 Frw ariko hari ubwo bahura n’ibibazo bakabikemura cyangwa bakaguramo n’amatungo.

Mukashema wiga mu mwaka wa kabiri w’icyiciro cya mbere cy’ayisumbuye, yabwiye IGIHE ko yatangiye kwizigama yiga mu wa Gatandatu w’abanza mu 2016, ubu amaze kugira ibihumbi 240 Frw.

Ati “Nabanje gutekereza nkabona ayo naryaga ku munsi ari menshi. Nkomeza kuzigama, ageze mu bihumbi 25 Frw, mama yampa 100 Frw ngo ngure irindazi nkaribika, ubu ngeze mu bihumbi 240 Frw.”

Uyu mwana ateganya ko aramutse arangije icyiciro cya mbere cy’amashuri yisumbuye akabura amikoro, yakwifashisha ayo yizigamye agakomeza amasomo ye.

Ati “Hari igihe nabaga mfite nk’akarima ngahinga, ibyeze nkabijyana mu isoko, ayo nkuyemo nkayabika. Hari n’itsinda ry’ababyinyi mbamo, iyo twagiye ahantu kubyina, bakaduha amafaranga, mpita nyongeraho.”

Umubyeyi wa Mukashema, Nyiransengimana Marie Rose, yavuze ko uretse ayo mafaranga yizigamye, afite n’ihene ebyiri n’inkwavu eshatu, bifite agaciro k’asaga ibihumbi 50 Frw byavuye mu kwizigama.

Ati “Iyo umuhaye 100 Frw, araribika, namuha irindi ngo agure nk’irindazi ahita abika, yarangiza akayajyana. Konti hari aho imugejeje. Nk’ubu ashobora kwigurira udukweto, umwenda ntabimuguriye.”

Muri iki kigo hari amatsinda 12 yo kwizigamira y’abanyeshuri biga mu cyiciro rusange, rimwe rigizwe n’abari hagati ya 25 na 30.

Iyi gahunda nubwo yiganje mu cyiciro rusange, hari abandi bana bayibwiye iwabo, bafata umwanzuro wo kubazigamira mu bigo by’imari.

Ishimwe Teta Raissa, wiga mu mwaka wa Kane w’amashuri abanza, yabwiye IGIHE ko yasabye iwabo kumubikiriza, bamufunguriza Konti mu Murenge Sacco, ubu iriho ibihumbi 470 Frw.

Ati “Nanjye iyo mbonye amafaranga nyaha mama akayashyiraho. Ejo bundi nabatijwe, bampaye ibihumbi 17 Frw, mama ajya kuyambikiriza.”
Tuyishime Marceline na Rukundo Jean de Dieu, biga mu mwaka wa Kabiri. Bafite kuri Konti umwe irimo ibihumbi 11 Frw undi 6000 Frw.

Bavuze ko uretse amatungo baguzemo, umwe inkoko undi inkwavu esheshatu nta kindi bafite.

Umuyobozi w’Urwunge rw’Amashuri rwa Congo Nil, Padiri Paul Maniragaba, yahishuriye IGIHE ko kuva iyi gahunda itangijwe, abanyeshuri batakirivamo.

Ati “Umwe washoboraga kugira ipfunwe ryo kubura ikintu akagishaka hanze, uwo ntakirivamo kuko bafite n’amatsinda baganiriramo. Niyo yakibuze, yakivuga. Umwarimu ubishinzwe akaba yamuha ku mafaranga bizigama, akazayagarura.”

Ubuyobozi bw’iki kigo, buvuga ko iyi gahunda ishobora kuba igisubizo ku bana bata ishuri ku buryo n’ibindi bigo byayifashisha.

Kuri iki kigo, hari abanyeshuri 25 barimo abakobwa 16 bari bataye ishuri umwaka ushize. Ni mu gihe uyu mwaba bane aribo baritaye. Abagera kuri 12 mu baritaye umwaka ushize barigarutsemo kubera iyi gahunda.

Ishimwe Teta Raissa wiga mu mwaka wa Kane w’amashuri abanza, yabwiye IGIHE ko yasabye iwabo kumubikiriza, bamufunguriza Konti mu Murenge Sacco, ubu iriho ibihumbi 470 Frw
Iyi gahunda yatumye abana bari barataye ishuri barigarukamo
Mu rugo kwa Mukashema Marie Claire
Mukashema Marie Claire amaze kwizigama ibihumbi 240 Frw
Mukashema Marie Claire n'umubyeyi we Nyiransengimana Rose Marie bari gusobanura uko abona amafaranga yizigama
Rukundo Jean de Dieu kwizigama byamufashije kwigurira inkwavu esheshatu

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza