Rutsiro: Barinubira urugendo rw’amasaha atatu bakora bagiye ku ishuri

Yanditswe na Mukwaya olivier
Kuya 21 Gicurasi 2018 saa 08:58
Yasuwe :
0 0

Bamwe mu bana bahagarariye abandi mu matsinda aharanira uburenganzira bwabo mu mirenge igize Akarere ka Rutsiro bavuga ko kutagira amashuri muri buri kagari bituma bakora urugendo rw’amasaha atatu bagiye ku ishuri.

Babitanagje mu minsi ishize ubwo baganirizwaga ku mikoreshereze y’ingengo y’imari kugira ngo bajye bagira uruhare mu kugena icyo ikoreshwa.

Ntirandekura Pascal wo mu murenge wa Boneza yavuze ko bafite ikibazo cyo gukora urugendo rurerure ndetse n’icy’ubucucike mu mashuri gituma batiga neza kubera kubyigana.

Ati “ Ndasaba ko batwongerera ibyumba kuko mu ishuri twigamo turi abana 82 tukicara ku ntebe turi bane tubyigana, ugasanga umwana yanditse ibintu bitari byo kubera gukomana. Banadufashije buri kagari kakagira ishuri byadufasha. Nk’ubu njye iyo ngiye kenshi nsanga isomo rya mbere barirangije kuko binsaba amasaha atatu ngo ngereyo.”

Niyongabire Joseline wo mu Murenge wa Kivumu na we yasabye ko nibura buri kagali kagira ishuri.

Yagize ati “Njye niga kure cyane ku buryo nkoresha isaha imwe n’igice kugerayo kandi nabwo mba ngiye kwiga mu kandi kagari kuko iwacu nta shuri tugira, bigatuma twicara tubyigana kubera ubwinshi bw’abana. Turasaba ko batwongerera ibyumba by’amashuri, buri kagari kakagira ishuri’’.

Umuhuzabikorwa w’umushinga Children Voice Today ari nawo uhugura aba bana bahagarariye abandi, Mukarugomwa Ritha yavuze ko ibyifuzo by’abana bizakemuka kuko byamenyeshejwe inzego bireba.

Ati “Twe ikibazo turakizi kandi mu gihe tumaze dukorera hano abana babibwiye abayobozi ndetse no mu byo basabye ko bizajya mu ngengo y’imari itaha nabyo, ubu biri mu karere turizera ko bizacyemuka mu ngengo y’imari itaha’’

Umuyobozi Wungirije Ushinzwe Imibereho Myiza mu Karere ka Rutsiro, Butasi Jean Herman, yavuze ko ibyo abana babasabye bazabishyira mu bikorwa.

Ati “Iyo dutegura ingengo y’imari abaturage baba bagomba kubigiramo uruhare kandi ibyiciro byose. Abana twakiriye ibyifuzo byabo kenshi na kenshi usanga ari ibijyanye n’uburenganzira bwabo cyane cyane kwiga. Nkuko umwaka ushize twabahaye arenga miliyari ndakeka uyu mwaka utaha aziyongera ibibazo batanze bigakemuka’’.

Ingengo y’imari y’Akarere ka Rutsiro mu 2017/2018 ingana na 14 619 693 032 Frw. Muri yo angana na 1 993 328 917 Frw azakoreshwa mu gukura abana b’inzererezi ku muhanda, kubaka amavuriro, kurinda abana imirimo ivunanye no kubaka amashuri y’incuke nk’uko abana babyifuje.

Abana b'i Rutsiro bavuga ko ibyumba by'amasuri ari bike
Umuyobozi Wungirije Ushinzwe Imibereho Myiza mu Karere ka Rutsiro, Butasi Jean Herman, yavuze ko ibyo abana babasabye bazabishyira mu bikorwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza