Rutsiro: Amashuri atagaburira abanyeshuri bose yasabwe gukemura icyo kibazo

Yanditswe na Prudence Kwizera
Kuya 10 Gicurasi 2018 saa 08:08
Yasuwe :
0 0

Minisiteri y’Uburezi yashimye ubufatanye n’umurava biranga abarezi n’ababyeyi barerera ku Rwunge rw’Amashuri rwa Vumbi ruherereye mu Murenge wa Mushonyi mu Karere ka Rutsiro isaba ko bafatanya bagakemura ikibazo cya bamwe mu bana bahiga badahabwa ifunguro rya saa sita.

Itsinda ry’abakozi ba Minisiteri y’Uburezi basuye iryo shuri muri gahunda yo gukora ubukangurambaga bugamije kuzamura ireme ry’uburezi. Basanze hari ibikorwa byinshi byiza ubuyobozi bw’ishuri n’ababyeyi baharerera bakoze bafatanyije.

Bimwe muri ibyo bikorwa ni igikoni cyo gutekeramo biyubakiye batanze umusanzu, ibyumba bitatu by’amashuri n’uruzitiro rw’ishuri.

Ababyeyi n’ubuyobozi bw’ishuri bavuga ko bagiye inama basanga ari bo bagomba gufata iya mbere mu kwikemurira ibibazo bafite biyemeza kwegeranya imbaraga.

Umubyeyi witwa Rwanzegushira Joseph uhafite abana babiri yagize ati“Igitekerezo kijya gutangira cyaturutse mu nama y’ababyeyi n’ubuyobozi bw’ishuri tuganira uko ishuri ryavugururwa twiyemeza gutanga imisanzu uko twifite”.

Ababyeyi baharerera bavuga ko kuba bariyemeje ubufatanye n’ishuri ari uko bazi neza akamaro ko kwigisha abana babo no kubafasha kugira imyigire myiza.

Umuyobozi w’Urwunge rw’Amashuri rwa Vumbi, Twagiramungu Anastase, avuga ko ibyumba by’amashuri n’igikoni byubatswe bitwaye amafaranga agera kuri miliyoni icyenda aturutse mu misanzu yatanzwe n’ababyeyi.

Ati “Ibyo byumba bitatu byadutwaye miliyoni zigera kuri zirindwi kongeraho n’izo zigera kuri ebyiri zubatse igikoni. Umusanzu w’ababyeyi turawushima cyane kandi dushima n’inama tugirwa n’ubuyobozi bw’inzego z’ibanze”.

Twagiramungu Anastase akomeza avuga ko kuri ubu bafite intego yo gutangira kuvugurura ibindi byumba by’amashuri bitatu bishaje kuko ababyeyi biyemeje kujya batanga amafaranga 500 y’umusanzu kuri buri umwe kandi babitangiye ku buryo umwaka utaha kuvugurura bizatangira.

Minisiteri y’Uburezi yabasabye ko bita no ku kibazo cy’abana birirwa batariye

N’ubwo iryo shuri ryageze kuri byinshi byiza, haracyari ikibazo cya bamwe mu bana birirwa batariye kuko ababyeyi babo batitabira kubatangira amafaranga abibemerera.

Ubuyobozi bw’ishuri butangaza ko mu banyeshuri 811 bahiga abahabwa ifunguro rya saa sita ari 456 gusa abandi bakabwirirwa.

Umukozi mu Kigo cy’Igihugu gishinzwe Uburezi (REB), Mutsinzi Antoine, wari uyoboye itsinda ryabasuye, yasabye ko ubufatanye buranga ishuri n’ababyeyi baharerera buba umuti w’icyo kibazo cy’abana birirwa batariye.

Yagize ati “Iki ni ikigo cyo gushimwa dushima n’uruhare rw’ababyeyi aho bishyira hamwe bagakora ibikorwa nka biriya. Icyo twabagiriyeho inama ni ukugira ngo bongere umubare w’abana barya kuko uracyari muto, twabagiriye inama yo gukorana n’inzego z’ibanze kugira ngo umubare w’ababyeyi batanga amafaranga wiyongere”.

Mutsinzi Antoine yavuze ko mu Rwunge rw’Amashuri rwa Vumbi bahabonye imirima basaba ubuyobozi bw’ishuri ko bwayibyaza umusaruro ihingwamo imboga n’ibindi byafasha mu mirire y’abanyeshuri.

Gahunda yo kugaburira abana biga mu burezi bw’ibanze bw’imyaka 12 imaze imyaka igera kuri itatu itangiye ariko hirya no hino mu turere iracyagaragaramo ibibazo kuko usanga ababyeyi bamwe batitabira gutangira abana babo amafaranga yo kugura ibiryo.

Gahunda ya Minisiteri y’Uburezi yo gukora ubukangurambaga bugamije kuzamura ireme ry’uburezi, icyiciro cyayo cya kabiri yatangiye taliki ya 02 izasozwa ku ya 15 Gicurasi 2018.

Ifite insanganyamatsiko igira iti “Imyigire myiza n’indangagaciro no guhanga ibishya ni ishingiro ry’uburezi bufite ireme”.

Bamwe mu banyeshuri biga mu Rwunge rw'Amashuri rwa Vumbi
Igikoni ababyeyi barerera ku Rwunge rw’Amashuri rwa Vumbi biyubakiye kugira ngo kijye cyifashishwa mu gutekera abana babo
Ibyumba by'amashuri bishaje ababyeyi barerera ku Rwunge rw’Amashuri rwa Vumbi biyemeje ko bagiye kuvugurura
Itsinda ry’abakozi ba Minisiteri y’Uburezi basuye Urwunge rw’Amashuri rwa Vumbi bareba uko Mudasobwa zatanzwe na Leta zikoreshwa
Umukozi mu Kigo cy’Igihugu gishinzwe Uburezi (REB), Mutsinzi Antoine, aganira n'abarezi bigisha mu Rwunge rw'amashuri rwa Vumbi
Mutsinzi Antoine yasabye abanyeshuri kwiga bashyizeho umwete kuko Leta n'ababyeyi babashyigikiye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza