00:00:00 IGIHE NETWORK KN KINYARWANDA EN ENGLISH FR FRANCAIS

Rutsiro: Abarwayi igihumbi b’igicuri bahawe imashini zidoda

Yanditswe na Nsanzimana Erneste
Kuya 7 Ugushyingo 2021 saa 04:05
Yasuwe :
0 0

Abarwayi b’igicuri barenga igihumbi bo mu karere ka Rutsiro nyuma gufashwa guhindura imyumvire ku ndwara y’igicuri bahawe imashini zidoda kugira ngo zibafashe kwiteza imbere.

Aba barwayi bari bamaze imyaka itanu bakurikiranwa n’umuryango wita ku buzima, Humanity Inclusion, aho bahawe amahugurwa ku ndwara y’igicuri, ikiyitera n’uko ivurwa. Aba barwayi bavuga ko mbere bari bazi ko igicuri ari amarozi.

Hategekimana Edouard wo mu murenge wa Ruhango avuga ko kubera uburwayi bw’igicuri yajyaga yiheza mu bandi, ariko ngo nyuma yo gusobanurirwa iyi ndwara ntabwo yongeye kwitinya no kwigunga.

Ati “Kubera uburwayi bw’igicuri mbere narihishaga, ngatinya kujya aho abandi bari, hakaba abambona bakavuga ko ari amarozi, cyangwa se ari ubugizi bwa nabi bikaba byanateranya abantu baturanye cyangwa se abo mu miryango”.

Yakomeje avuga ko nyuma yo kwibumbira mu matsinda bakajya baganirizwa ku ndwara y’igicuri, bamenye ko ari indwara iterwa no kuba umwana yaravutse ananiwe, indwara y’uruhererekane mu miryango, igaterwa no kuba umuntu yarakoze impanuka akagusha umutwe, nanone kandi ikabasha ishobora guturuka malariya y’igikatu.

Nyirahuku Vestine ufite umwana urwara igicuri avuga ko amatsinda y’abarwayi b’igicuri yamufashije akajya abona amafaranga yo kuvuza umwana we bitamugoye. Ngo imashini bahawe izamufasha gukomeza kuvuza umwana we.

Yagize ati “Mu myaka tumaranye bakomeje kutwitaho ntacyo twababuranye. Iyi mashini ngiye kuyibyaza umusaruro. Ubu abantu bari kumva ko igicuri kivurwa kigakira, mu gihe mbere bakitiranyaga n’amarozi cyangwa se amashitani”.

Mukandanga Odette, umuyobozi w’umushinga wita ku buzima bw’umubyeyi n’umwana, avuga ko bahisemo gufasha abarwayi b’igicuri nyuma yo kumenya ko aba barwayi bagorwa no kwivuva ndetse ko hari umubare munini w’abantu barwaye igicuri batinya kujya ahagaragara.

Ati “Nyuma yo kubashaka twabakoreye amatsinda kugira ngo tubakure mu kato no kwigunga. Baraza bagahurira kwa muganga kugira ngo baganire ku burwayi bwabo. Twahaye amahugurwa abaganga yo kubitaho, kugira ngo buri wese yumve ko Atari ikibazo kihariye afite”.

Mukandanga avuga ko nyuma yo kubafasha mu buryo bw’isangamitima bahisemo kubaha imashini zidoda kugira ngo bage babona uko bakomeza kubona uko bivuza.

Ati “Gahunda yo gufasha aba barwayi yari imyaka 5, twatangiye kubafasha muri 2017. Bamwe baheraga mu bikari bagatinya kujya aho abandi bari, abandi bagatinya kujya mu isoko. Ubu imyumvire yarahindutse, babasha gusohoka bakajya aho abandi bari. Twahisemo gusoza umushinga tubaha imashini kugira ngo babashe kugira icyo bakora aho batuye”.

Umuyobozi w’Ishami ry’Ubuzima mu karere Rutsiro, Nirere Nkurikiyinka Etienne, yavuze ko umuntu urwaye igicuri adakwiye guheranwa n’agahinda kuko igicuri ari uburwayi buvurwa bugakira.

Ati “Iyo abantu bahuje ibibazo bahuye usanga bica ubwigunge, ikindi cya kabiri umuntu yumva neza y’uko Leta imuri iruhande, Leta ni umubyeyi iramufasha muri gahunda z’iterambere, aho kugira ngo abantu bage bavuga ngo barwaye uburwayi bw’uburogano. Icyo tuzi neza ni uko igicuri kivurwa kigakira. Umuntu urwaye igicuri ashobora gukora nk’abandi akiteza imbere nk’uko abandi Banyarwanda batera imbere”.

Mu karere ka Rutsiro habarurwa abarwayi b’igicuri barenga igihumbi, bibumbuye mu matsinda 80. Buri tsinda ryahawe imashini imwe n’ibitenge byo gutangiriraho badoda. Uyu mushinga watwaye miliyoni zisaga 200, zirimo miliyoni 12 zaguze imashini zidoda.

Abarwayi igicuri bahawe imashini zo kubafasha kwiteza imbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .