Kwamamaza

Rusizi:Yirukanywe anamburwa utwe bamushinja kuniga ihene

Yanditswe kuya 25-10-2016 saa 20:53' na Sitio Ndoli


Kabendera Theophile uri mu kigero cy’imyaka 15, yirukanwe ndetse anamburwa amafaranga n’abo yakoreraga akazi ko mu rugo ashinjwa kwica ihene ayinize.

Kabendera uvuka mu Murenge wa Cyato, mu Karere ka Nyamasheke, yakoraga mu Mudugudu wa Murangi, mu Kagali ka Kamurera mu Murenge wa Kamembe.

Avuga ko yarangije amashuri abanza mu 2014 ariko abura amafaranga y’ibikoresho by’ishuri ahita afata umwanzuro wo kujya gukora akazi ko mu rugo.

Muri uyu mwaka nibwo uyu mwana yabonye akazi ko kuragira no kwahirira amatungo mu rugo rwa Nzeyimana Modeste rurehereye mu Mudugudu wa Murangi, mu Kagali ka Kamurera, mu Murenge wa Kamembe avuye mu rundi rugo baturanye yabanjemo.

Kuri uyu wa 24 Ukwakira 2016 mu masaha ya saa tanu z’ijoro ngo nibwo abajura baje mu cyumba yararagamo cyegeranye n’ikibamo ihene maze bashaka kuziba imbwa iramoka nyir’urugo arasohoka ba bajura bari bamaze kuniga ihene baca mu gikoni barasohoka bariruka.

Avuga ko aba bajura baza yababonye nubwo bari bipfutse mu maso, maze ngo agira ubwoba bwo kuvuga bitewe n’uko bari bitwaje ibyuma.

Uyu mwana agira ati “Babanje kutwiba ihene, iri joro abajura baraza imbwa iramoka, umusaza arabyuka mpita mvuza induru abajura bariruka ariko babanje kwica ihene bayinize."

Akomeza avuga ko nyuma y’aho abo bajura babashakishije bakabura bahise bemeza ko ari uyu mwana wishe iyi hene, bananzura ko yirukanwa muri iryo joro, bamwambura amafaranga ibihumbi 20 yari afite ndetse baranamukubita.

Yagize ati “ Bahise bambaza ibibazo nkabasubiza uko nabibonye ariko umwe ankubita ikibatiri cy’umupanga ku itako bankingirana mu gikoni barankubita, umuyobozi w’umudugudu aravuga ngo nibanyirukane mve muri aka karere. Bafashe amafaranga ibihumbi 20 yanjye yari mu myenda, barayasigarana bampa ibihumbi bibiri gusa ngo andi bayafatiriye.”

Nzeyimana Modetse wakoreshaga uyu mwana, yabwiye IGIHE ko yamwirukanye saa kumi z’ijoro ndetse amwaka amafaranga ibihumbi 18 kuko yamwiciye ihene, amusigira ibihumbi bine by’itike gusa.

Ati “Nijoro imbwa yamotse ndabyuka, nawe arabyuka avuza induru ngo baranyishe, nzunguruka inzu abantu ndababura, arambwira ngo ihene barayishe. Mpamagara umuturanyi nawe ahamagara umuyobozi w’umudugudu n’ushinzwe amakuru. Turabashaka turababura.”

“Iyo hene bari bayinize. Namwambuye ibihumbi 18, namuhaye itike y’ibihumbi bine ndamuherekeza mugeza muri gare.”

Gahonga Callixte, umuyobozi w’uyu mudugudu wa Murangi, avuga ko bavuganye n’uyu mugabo ko yirukana uyu mwana mu gitondo, gusa ngo ntibemeje ko ari we wishe iyo hene.

Ati “ Hari hafi saa saba, ariko nababwiye ngo bamureke bamusezerere mu gitondo ubwo nahise nzamuka ntabwo namenye uko bamusezereye. Iyo hene ko atari uwo mwana wayishe ayo mafaranga yayamwakiye iki? Gusa twasanze ntaho abajura banyuze ariko bamwambura ayo mafaranga ntabwo nari mpari.”

Umunyamabanga Nshingwabikorwa w’Umurenge wa Kamembe, Ntivuguruzwa Gervais, yavuze ko uyu mwana agomba gusubizwa amafaranga yose yatswe n’abo yakoreraga, bahitamo kumwirukana bakabikora. Avuga kandi ko nyuma yo gusubizwa aya mafaranga, ngo uyu mwana niyumva hari irindi hohoterwa yakorewe yageza ikibazo cye muri polisi ikagikemura.

Ubusanzwe mu Rwanda itegeko ribuza umuntu wese gukoresha umwana uri munsi y’imyaka 18.

Uyu mwana ahakana ko ari we wanize iyo hene

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved