Kwamamaza

Rusizi:Umunyeshuri udatanze agahimbazamusyi ka mwarimu bamuha ibihano

Yanditswe kuya 29-09-2016 saa 07:32' na Sitio Ndoli


Ababyeyi batandukanye bo mu Murenge wa Butare bavuga ko abana babo bahabwa ibihano birimo kwirukanwa,gupfukama no gukubitwa iyo badatanze amafaranga y’agahimbazamusyi k’abarimu.

Aba babyeyi bemeza ko abana babo basigaye banga kujya ku ishuri batabahaye ayo mafaranga kubera ibihano abarimu babaha ndetse bamwe bagahitamo kwirirwa mu ishyamba.

Faina Mukarugwamo ati “Njye mfite abana batandatu, iyo ntayabonye barabanza bakamupfukamisha nyuma bakabirukana bakamara iminsi itatu cyangwa ine batajya ku ishuri. Urumva ko hari aho batanasubira mu ishuri bikabaviramo ingaruka yo kurireka bakiri bato.”

Ntirivamunda Evariste we ati “Ayo mafaranga tuyafiteho ikibazo, ko twumva leta yayakuyeho ariko twe bakayadusaba? Nk’ubu umwana yabyutse arira ngo arajyayo ari uko ayabonye kubera ubwoba bwo gupfukama. ”

Iki kibazo gituma bamwe mu bana bata ishuri

Ngwijabanzi Elias ushinzwe iterambere ry’umudugudu wa Buganza avuga ko akenshi iyo bari gushaka abana bataye ishuri mu mudugudu, abana n’ababyeyi bababwira ko byaturutse ku kubura amafaranga ibihumbi bibiri by’agahimbazamushyi k’abarimu basabwa buri gihembwe, nabo bagasanga ari ikibazo kibakomereye.

Umuyobozi w’Akarere ka Rusizi Harerimana Frederic, avuga ko agahimbazamusyi gashyirwaho n’ababyeyi ahubwo icyitemewe ari ukwirukana umwana, ari na cyo ngo bagiye gukurikirana.

Ati “Oya ntabwo tuvuga ngo agahimbazamusyi ntabwo kemewe kuko gashyirwaho n’ababyeyi bitewe n’icyo bifuza kugeraho mu kigo runaka. Bashobora kugenera umwarimu agahimbazamusyi, ibyo ni uburenganzira bwabo,biri mu bushobozi bwabo bitewe ni uko babibonye.Ahubwo ikitemewe ni ukwirukana umwana kubera yo, umwana agomba kwiga amasaha yose, iminsi yose yagenwe, hagera igihe cyo kwishyuza agahimbazamusyi hakishyuzwa ababyeyi. Icyo ni cyo tugomba gushishikariza abayobora ibigo by’amashuri n’abayobozi begereye abaturage ko nta mwana ugomba kuvutswa uburenganzira bwo kwiga kubera agahimbazamusyi.”

Gusa ibyo Meya avuga binyuranye n’ibyo Caritas Mukandasira, Umuyobozi w’Intara y’Uburengerazuba yavuze ubwo aheruka mu murenge wa Cyato,mu karere ka Nyamasheke.

Ati “ Njyewe ni bwo mbyumvise, Minisiteri y’Uburezi yavuze ko ‘prime’ zavuyeho,nanjye niko nari mbizi, natunguwe no kumva hari aho zikiri, igikorwa ni ugukurikirana tukareba abo bantu baka ayo mafaranga bayakira iki?, nidusanga koko barayatse mu buryo butaribwo bashobora no kuyagarura.”

Mu turere twa Rusizi na Nyamasheke, hagaragara ikibazo cy’abana benshi bata ishuri bakajya gukora mu mirima y’icyayi, gufasha abarobyi mu kiyaga cya Kivu no kurinda inyoni mu mirima y’umuceri, ababyeyi bakavuga ko n’agahimbazamusyi kari mu mpamvu ituma abana bata ishuri.

Ababyeyi bavuga ko agahimbazamusyi gakomeje gutuma abana babo bata amashuri

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Tuesday 6 Ukuboza 2016
Copyright © 2009 -2014 - IGIHE Ltd - All Rights Reserved