Kwamamaza

Akarere ka Rusizi kahishuye ibanga ryagafashije kuza mu myanya y’imbere mu mihigo

Yanditswe kuya 20-09-2016 saa 15:32' na Kwizera Prudence


Ubuyobozi bw’Akarere ka Rusizi n’abafatanyabikorwa bako bemeza ko gukorera hamwe nk’ikipe no guhanahana amakuru ku buryo bwihuse ndetse no kwegera abaturage bakumva ibibazo byabo bakanabikemura, ari bimwe mu by’ibanze byabafashije kwesa neza imihigo bari biyemeje.

Muri uyu mwaka w’imihigo wa 2015-2016, Akarere ka Rusizi kabaye aka kane n’amanota 78.36% kavuye ku mwanya wa 27 mu mwaka wa 2014-2015, intambwe ifatika ubuyobozi bwishimira.

Rusizi ni kamwe mu turere turindwi tugize Intara y’ Iburengerazuba, kagizwe n’imirenge 18, utugari 94, imidugudu 596; kakaba gatuwe n’abaturage barenga ibihumbi 400, nk’uko imibare yo mu ibarura rusange ryo muri 2012 ibigaragaza.

Imiterere y’aka karere, ubukungu gafite ndetse n’amahirwe aturuka mu bihugu by’ibituranyi, benshi babishingiraho bahamya ko nta mpamvu abagatuye bakwiye gusigara inyuma mu iterambere ry’igihugu ryiyongera umunsi ku wundi.

Nyuma yo kwegukana umwanya wa Kane mu mihigo ya 2015-2016, abayobozi b’Akarere ka Rusizi n’abafatanyabikorwa bako bahise bategura umwiherero w’iminsi ibiri, wabereye mu Karere ka Huye, bigira hamwe uko bakomeza gukorana neza ku buryo ubutaha bakegukana igikombe cy’imihigo.

Muri iri huriro ryabaye kuwa 12 kugeza kuwa 13 Nzeri, abaryitabiriye biyemeje gushyira mu bikorwa ibyo biyemeje, kubisangiza bagenzi babo bakorana ndetse n’abaturage bakorera.

Umuyobozi w’Akarere ka Rusizi, Frederick Harerimana, ashingiye ku bumwe n’imikoranire iri hagati y’ubuyobozi, abaturage n’abafatanyabikorwa yemeza ko nabo bashobora kwegukana igikombe cy’imihigo.

Yagize ati “Twaganiriye ku mikorere n’imikoranire uko yarushaho kuba myiza ndetse tureba n’ibitaragenze neza kugira ngo bikosorwe no gufata ingamba zituma turushaho kwesa imihigo neza, tukaba twakwegukana n’igikombe ku rwego rw’Igihugu."

Perezida w’Ihuriro ry’abafatanyabikorwa mu Karere ka Rusizi, Ephrem Kamarampaka yavuze ko imwe mu mpamvu yatumaga mu myaka yashize batesa imihigo neza, ari uko nta mikoranire myiza yari ihari.

Yagize ati “Mbere hari nk’ubwo umufatanyabikorwa yatangaga dosiye y’ibyo azakora ikamara igihe yarabuze uwamusinyira ibikorwa yagombaga gukora biteza imbere abaturage bikadindira. Nyuma yaho dutangiye gukorana neza urabona ko umusaruro watangiye kuboneka, kandi gahunda ni ugukomeza kujya mbere”.

Jean Paul Munyandamutsa wari uhagarariye Ikigo cy’Igihugu cy’Imiyoborere mu Rwanda (RGB), akaba asanzwe ari umuhuzabikorwa w’ihuriro ry’abafatanyabikorwa mu gihugu, yasabye ko bakomeza gukorana neza kuko aribyo bizafasha Rusizi kwesa imihigo no gutwara igikombe nk’uko babyifuza.

Munyandamutsa yagiriye inama Abanya-Rusizi yo gukomeza kugira ishyaka ryo gukora nk’ikipe no guhanahana amakuru ndetse no kwigira ku tundi turere ibyiza bihari nabo bakabigeza kubo bayobora.

Akarere ka Rusizi gafite ubuso bungana na km² 959, ubutaka hafi ya bwose bwera ibihingwa byose, yaba ngandurarugo ndetse na ngengabukungu. By’umwihariko hakaba haratoranyirijwe ibihingwa nk’umuceli mu gishanga cya Bugarama, icyayi, kawa, imbuto zinyuranye, urutoki, ibigori n’ibindi.

Aka Karere gahana imbibi n’ibihugu bibiri, aribyo u Burundi mu Majyepfo, ndetse na Repubulika Iharanira Demokarasi ya Congo mu Burengerazuba.

Rusizi igaragaramo ibintu nyaburanga byinshi bishobora gukurura ba Mukerarugendo nk’amashyuza ya Bugarama, Ikiyaga cya Kivu, ishyamba rya Cyamudongo, Pariki y’Igihugu ya Nyungwe, ndetse n’umugezi wa Rusizi uzwiho kuba isoko y’amashanyarazi akoreshwa mu bihugu bigize Umuryango w’Ubukungu w’Ibiyaga bigari (CEPGL).

Hagaragara kandi aborozi batunze cyane cyane inka, ihene n’ingurube n’andi matungo magufi ndetse n’ubworozi bw’amafi n’isambaza, bituma abahatuye babona amafaranga.

Muri aka Karere kandi haboneka inganda zitandukanye zirimo urukora Sima rwa Cimerwa, izitonora kawa zigera kuri 16 n’izitunganya umuceli mu buryo bugezweho zigera kuri 5, ndetse n’urutunganya icyayi rwa Shagasha.

Umuyobozi w’Akarere ka Rusizi, Frederick Harerimana ashimangira ko gukorana neza n'abafatanyabikorwa bizabafasha kwegukana igikombe
Abayobozi bemeza ko gukora nk'ikipe ari intwaro ikomeye mu kwesa imihigo
Jean paul Munyandamutsa wari uhagarariye RGB
Perezida w’Ihuriro ry’abafatanyabikorwa mu Karere ka Rusizi, Ephrem Kamarampaka
Abayobozi b'Akarere ka Rusizi biyemeje kurushaho gukorana n'abagenerwabikorwa

[email protected]


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Wednesday 28 Nzeri 2016
Copyright © 2009 -2014 - IGIHE Ltd - All Rights Reserved