Rusizi: Nyuma y’ubwisungane mu kwivuza, hashyizweho na mituweri y’inka

Yanditswe na Akimana Erneste
Kuya 16 Nyakanga 2018 saa 08:54
Yasuwe :
0 0

Guhera mu 2004 ubwo hashyirwagaho ubwisungane mu kwivuza ngo n’abatishoboye boroherwe n’ikiguzi cy’ubuvuzi cyari hejuru ugereranyije n’amikoro ya buri umwe, ibi byashibutsemo isomo ku baturage bo mu Murenge wa Nkungu ho mu Karere ka Rusizi, ubu bamaze kubaka uburyo nk’ubu, ariko bwo bugamije kuvuza inka zabo.

Nk’uko abantu basanzwe batanga umusanzu w’ubwisungane mu kwivuza buri mwaka ariko bigakorwa hagendewe ku cyiciro buri muntu arimo, aborozi b’i Rusizi bo bagennye ko buri muntu yatanga 2000Frw ku mwaka ku nka imwe, ibyo bigahesha inka yishingiwe kuvuzwa hishyuwe 20% by’igiciro cy’imiti.

Kimwe n’ubwisungane mu kwivuza tumenyereye, umwaka w’ubu bwishingizi bwo kuvuza inka, utangira ku wa 1 Nyakanga buri mwaka, guhera mu 2016 ubwo iyi gahunda yatangiraga.

Umwe mu borozi bo mu Murenge wa Nkungu, Sibomana Patrice, avuga ko mbere nk’abantu bahabwaga inka muri gahunda ya Girinka, bagorwaga no kuzivuza ndetse ugasanga iyo bagiye kugura imiti bibahenda cyane.

Yagize ati “Mituweli y’inka twayitekerejo tumaze kubona ko inka zimaze kuba nyinshi ariko kuzivuza bikatuvuna, nuko twishyira hamwe tubigishaho inama abayobozi barabyemera ndetse bumwa ko ari igitekerezo cyiza. Ubu bidufitiye akamaro kuko mbere twatangaga amafaranga menshi ariko aho tugiriye muri mituweli y’inka ubu n’umukamo wariyongere cyane.”

Uwitwa Mugema Samuel we avuga ko mbere atarajya muri mituweli y’inka hari ubwo yatanze amafaranga arenga ibihumbi 100Frw ari kuvuza inka ebyiri, ariko aho agiriye muri ubu bwisungane hari ubwo inka yarwaye yishyura 350 Frw.

Umunyamabanga Nshingwabikorwa w’Umurenge wa Nkungu, Nsengiyumva Vincent de Paul, yavuze ko iyi gahunda imaze gukemura ibibazo byinshi mu buvuzi bw’inka, kuko iyo irwaye bagura umuti ku mafaranga make ku ivuriro bakorana ribahera imiti ku giciro kiri hasi cyane kurusha mu mavuriro y’amatungo yigenga.

Yakomeje agira ati “Nyuma yo kubona ibibazo bigaragara mu bworozi twashatse uburyo dushyira aborozi hamwe dutekereza n’uburyo bafatanya kuvuza inka ku buryo buhendutse.”

“Kugeza ubu nta nka zigikunze kurwara kuko abavuzi b’amatungo bahora mu baturage bajya kureba izifite ibibazo, ndetse twashyizeho n’abajyanama mu bworozi bahora bakurikirana izi nka ziri muri mituweli”.

Nsengiyumva yakomeje avuga ko ubu buryo bumaze kurinda inka nyinshi kuko nk’izatangiwe ubwisungane zihabwa imiti izirinda inzoka n’izirinda indwara ziterwa n’uburondwe bityo bikongera n’umusaruro w’ubworozi.

Mu murenge wa Nkungu habarurwa inka 2236, izigera kuri 70% zingana na 1565 ziri mu bwisungane.

Umunyamabanga Nshingwabikorwa w’Umurenge wa Nkungu, Nsengiyumva Vincent de Paul
Umwe mu borozi bo mu Murenge wa Nkungu, Sibomana Patrice ahamya ko ubu bwishingizi ari ingirakamaro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza