Rusizi:Ibura ry’amazi ryatumye bayoboka ay’ibishanga

Yanditswe na Kanamugire Emmanuel
Kuya 22 Ugushyingo 2016 saa 01:50
Yasuwe : XX
0

Abaturage bo mu mujyi wa Rusizi baravuga ko bamaze amezi agera kuri atandatu batabona amazi meza, bigatuma bajya kuvoma ayo mu bishanga cyangwa bagategereza ay’imvura.

Bamwe muri aba baturage baganiriye na IGIHE bavuga ko iki kibazo kimaze amezi atandatu bakigejeje ku buyobozi bw’umurenge n’akarere bakababwira ko bagiye kugikurikirana ariko bakaba barategereje bagaheba.

Nyiraguhirwa Claudine ati “Tumaze amezi arenga atandatu hano mu mudugudu wa Mont Cyangugu nta mazi meza tubona, tuvoma amazi mabi mu Kadasomwa (igishanga), hari n’igihe dusanga imvura yaguyemo agahinduka isayo, urumva turwara inzoka n’izindi ndwara zituruka ku mazi mabi.”

Theopiste Mukasano na we ati “ Tugerageza kubivuga , twabibwiye Meya w’akarere n’umuyobozi w’umurenge baravuga ngo icyo kibazo bazakidufasha ariko nta kintu bigeze badufasha.”

Kutagira amazi byagize ingaruka ku Kigo Nderabuzima cya Mont Cyangugu

Nyiramugisha Chantal, Umuyobozi wungirije w’Ikigo Nderabuzima cya Mont Cyangugu avuga ko batabona amazi meza kugira ngo abarwayi babone ayo bakoresha banywa imiti ndetse no gukoresha isuku ya buri munsi.

Ati “Biratugora kwakira abantu, gukora isuku mu barwayi, guha abarwayi imiti ukoresheje amazi atari meza kuko dukoresha amazi y’ibigega by’imvura, biragoye kuvuga ngo buri murwayi uri mu bitaro yagiye gufata amazi muri ‘filter’ agiye kunywa imiti; ni ukuvuga ngo ku kigo nderabuzima ni ahantu hagomba kugaragara amazi meza.”

Umukozi ushinzwe amazi mu karere ka Rusizi Kwihangana Jean Nepomuscène avuga ko iki kibazo bakizi ariko umuyoboro wa Giheke-Kamembe-Nkanka uzuzura mu kwezi kwa 12 uzongera amazi muri uyu mujyi.

Ati “Ikibazo turakizi, ubusanzwe mu ruganda rw’amazi rwa Cyunyu hari amazi make nyamara akenewe n’abaturage benshi. Amakeya abonetse hashyirwaho gahunda yo kuyasaranganya, ariko icyo kibazo turashaka uburyo gikemuka binyuze mu mishinga w’amazi dufite Giheke-Kamembe-Nkanka ugiye kuzura bitarenze mu kwezi kwa 12.”

Uyu muyoboro w’amazi uzatanga metero kibe 5000 zikaziyongera kuri 1000 zari zisanzwe zikwirakwizwa mu mujyi wa Rusizi, gusa abaturage bo baravuga ko watinze kuko hashize igihe kinini bawubwirwa.

Abarwayi bo ku Kigo Nderabuzima cya Mont Cyangugu banywa amazi y'imvura

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza