Rusizi: Harerimana wicishije umugore we ishoka yakatiwe gufungwa burundu

Yanditswe na Akayezu Jean de Dieu
Kuya 30 Ukwakira 2019 saa 08:19
Yasuwe :
0 0

Urukiko Rwisumbuye rwa Rusizi rwakatiye igifungo cya burundu umugabo witwa Harerimana Anastase w’imyaka 47 wahamwe n’icyaha cyo kwica umugore we babanaga mu Kagari ka Nyange mu Murenge wa Bugarama.

Harerimana yishe umugore we Uwingeneye Anésia, mu ijoro ryo ku wa 16 Nzeri 2019, ahagana saa tatu z’ijoro, amukubise ishoka mu mutwe ubwo bari mu rugo babanagamo n’abana batandatu barimo umuto ufite imyaka itandatu n’umukuru ufite 19.

Akimara gukora iki cyaha yahise atoroka aza gufatirwa mu rugo rw’umuturanyi yari yasabye icumbi.

Ku wa 15 Ukwakira 2019, nibwo Harerimana yatangiye kuburanishirizwa mu ruhame aho yemeraga icyaha cy’indengakamere agasaba imbabazi u Rwanda n’Abanyarwanda.

Ubushinjacyaha bwavuze ko uyu mugabo yari yaracuze umugambi wo kwica umugore we kuko yari yaraguze ishoka akayibika mu cyumba bararagamo.

Ikindi ngo aba bombi bari babanye mu makimbirane kandi umugabo yari yarareze umugore we mu rukiko asaba ko batandukana.

Kuri uyu wa Kabiri tariki 29 Ukwakira nibwo Urukiko rw’Ibanze rwamukatiye gufungwa burundu mu cyemezo cyasomewe mu ruhame imbere y’abaturage.

Umucamanza yavuze ko hashingiwe ku bimenyetso byatanzwe n’ubushinjacyaha ndetse na Harerimana akaba yemera ibyo yakoze, Urukiko rusanga ibimenyetso bimuhama.

Yavuze ko akatiwe gufungwa burundu ariko agasonerwa amagarama y’urubanza kuko yaburanye afunzwe.

Abaturage bari bitabiriye isomwa ry’urubanza bagaragaje ko banyuzwe n’igihano cyahawe umugabo wishe umugore we, basaba leta kugira ubufasha igenera abana basigaye.

Harerimana (iburyo) yakatiwe gufungwa burundu kubera kwican umugore we

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza