Kwamamaza

Rusizi: Basanze agiye kwiyahura nyuma yo gufatwa n’umugore amuca inyuma

Yanditswe kuya 6-11-2016 saa 08:55' na Sitio Ndoli


Habimana Théobard uri mu kigero cy’imyaka 22 utuye mu Mudugudu wa Kamabuye, Akagari ka Burunga, mu Murenge wa Gihundwe; yafashwe kuri uyu wa Gatandatu tariki ya 5 Ugushyingo 2016, agerageza kwiyahura akoresheje umugozi nyuma yo gusigwa n’umugore we wari wamufashe asambana n’umuturanyi.

Umwe mu baturanyi b’uyu muryango utashatse ko amazina ye atangazwa, yabwiye IGIHE ko uyu mugabo aherutse gufatwa n’umugabo we asambana n’undi mugore, biviramo uwo bashakanye kumuta.

Ati “Ku wa Kabiri w’icyumweru gishize (tariki ya 1 Ugushyingo 2016) nibwo yafashwe ari gusambana n’umugore baturanye maze asaba imbabazi umugore we ariko umugore yanga kumubabarira, ahita yitahira iwabo. Mu masaha ya saa mbiri mu gitondo nibwo twasanze ari mu kagozi ariko atarapfa.”

Akomeza avuga ko nyuma y’uko umugore atahiye iwabo, uyu mugabo yakunze kwigunga cyane, bimwe mu byo bavuga ko byaba ari byo byamuteye gufata icyemezo cyo gushaka kwiyambura ubuzima.

Nyirahabimana Beatrice ushinzwe irangamimerere mu Murenge wa Gihundwe, yemereye IGIHE ko ibi byabaye aho uyu mugabo bamusanze mu nzu yafunze urugi, imbere y’umuryango hari agapapuro kanditseho ko agiye kwiyahura.

Ati “Umugore yamufashe ari gusambana n’undi mugore w’umuturanyi wabo noneho ahita yigendera iwabo; umugabo amusabye imbabazi arazimwima ntiyagaruka. Uyu munsi mu gitondo basanga yanditse agapapuro ku muryango we kavuga ngo umugore yanze kumubabarira none mashe icyemezo cyo kwiyahura.”

Akomeza agira ati “Yari yafungiye imbere, bica urugi basanga ari mu kagozi ariko atarapfa, kugeza ubu ari kwa muganga i Gihundwe."

Uyu muyobozi avuga ko umuganga uri kumukurikirana yavuze ko nta kibazo gikomeye cyane afite uretse kuba ataasha kuvuga.

Nyirahabimana yemeza ko amakuru y’ubusambanyi bw’uyu mugabo ngo nk’ubuyobozi batigeze bayamenya, uretse ko ngo babibwiwe n’abaturanyi b’uyu muryango.

Ubundi mu mategeko ahana ibyaha mu Rwanda, kwiyahura ntibihanirwa, keretse iyo hari umuntu wohoje, wafashije undi kwiyahura cyangwa hari utuma undi yiyahura kubera kumutoteza. Icyo gihe ahanishwa igifungo kuva ku myaka ibiri kugeza ku myaka itanu nkuko bikubiye mu ngingo ya 147 yo mu gitabo cy’amategeko ahana ibyaha mu Rwanda.

Naho ku cyaha cy’ubusambanyi, ingingo ya 245 yo muri icyo gitabo, ivuga ko umuntu wese uhamwe n’icyaha cy’ubusambanyi, ahanishwa igifungo kuva ku mezi atandatu kugeza ku mwaka umwe. Ibyo bihano kandi ni na byo bihanishwa uwo basambanye.

Nyuma yo gufatwa agiye kwiyahura, Habimana arwariye ku bitaro bya Gihundwe

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 4 Ukuboza 2016
Copyright © 2009 -2014 - IGIHE Ltd - All Rights Reserved