Rusizi:Babangamiwe n’amafaranga bacibwa iyo bacishije amatungo muri Nyungwe

Yanditswe na Kanamugire Emmanuel
Kuya 24 Nzeri 2016 saa 04:24
Yasuwe : XX
0

Abaturage bo mu Mirenge ya Bweyeye na Butare bavuga ko bacibwa amafaranga ari hagati y’ibihumbi 20 na 25 iyo banyujije amatungo mu muhanda uri muri Pariki ya Nyungwe.

Aba baturage bavuga ko iyo bavuye mu masoko ya Nyamagabe no mu murenge wa Giheke muri aka karere ka Rusizi bashoreye inka, bahura n’abakozi ba pariki ya Nyungwe bakabaca amande kugira ngo batabaka amatungo yabo.

Mucyurantare Martin ati “Turagenda tukajya i Bumazi tukagura inka. Inzira tunyuramo iri muri Nyungwe. Iyo tuhageze baduca ibihumbi 20 ku nka imwe kandi ntibaduhe gitansi.Nonese niba nikokoye nkabona ibihumbi 150 ngura inka bakagerekaho ibihumbi 20 by’amande ubwo njyewe nzatera imbere gute?”

Kubwimana Anatolie ati “Nta gitansi baduha ubaha amafaranga ugashorera inka mu mu ishyamba; umuntu aragenda akagura inyana y’amafaranga nk’ibihumbi 100 akagerekaho 25 yo guha abo bakozi ba RDB, turabangamiwe muri make, mutuvuganire kuko uyu ni umuhanda nyabagendwa.”

Ntihemuka Pierre, Umuyobozi w’agateganyo wa Pariki ya Nyungwe, yabwiye IGIHE ko bitemewe kunyuza amatungo muri pariki hakoreshejwe uburyo bwo kuyashorera, byemewe gusa mu gihe ari imodoka iyatwaye.

Ati “Ni umuhanda usanzwe ucamo imodoka, kunyuzamo amatungo ashorewe byo ntabwo byemewe;akenshi bagenda baragiye kandi muri pariki nta kindi kintu kigomba gukorerwamo kuko habamo ibinyabuzima bindi, inka rero iyo yanyuzemo igatamo amase, bishobora kwanduza inyamanswa zirimo bikazigiraho ingaruka."

Akomeza avuga ko ko nta mande babaca ahubwo ko uwo bafashe bamushyikiriza inzego z’ibanze ndetse na polisi kugira ngo bajyanwe mu butabera kandi ko umukozi wa RDB wayabaca na we afashwe yahanwa.

Pariki ya Nyungwe ikikijwe n’abaturage bo mu turere dutanu turimo na Rusizi ariko abo mu murenge wa Bweyeye na Butare bibasaba guca mu muhanda uri muri iri shyamba rwagati.

Abaturage bo mu Murenge wa Butare bijejwe ko iki kibazo kigiye gukurikiranwa

sitio@igihe.rw


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza