Rusizi:Abapasiteri barakekwaho gukangurira abakirisitu kwikiza Abatutsi

Yanditswe na Kanamugire Emmanuel
Kuya 4 Ukwakira 2016 saa 01:16
Yasuwe : XX
0

Bamwe mu bapasiteri bo mu Itorero rya Methodiste Libre mu Karere ka Rusizi, barashinjwa n’abakirisitu babo kubasaba kwitandukanya n’Abatutsi, bakwanga uwo mugambi bakirukanwa mu itorero.

Mu bushakashatsi bwakozwe na Komisiyo y’Ubumwe n’Ubwiyunge yagaragaje ko hakiri bamwe mu Banyarwanda bacyibona mu ndorerwamo y’amoko ku kigero cya 27.9% .

Mu nkuru yakozwe na Radio 1 hagaragaramo ikibazo gifitanye isano n’ibyatangajwe n’iyi Komisiyo kimaze imyaka isaga ibiri mu itorero rya Methodiste Libre mu Karere ka Rusizi.

Iki kibazo cyo kuba hari abakigendera ku moko nk’iturufu bakwifashisha mu kwikiza abo batavuga rumwe, ni byo bamwe mu bahoze ari abayoboke b’Itorero rya Methodiste bavuga ko byabaye intandaro yo kwirukanwa muri iri dini burundu nyuma yo gusabwa ko guheza abo badahuje ubwoko bakabyanga.

Umwe muri bo yagize ati “Nahamagawe mu nama n’umupasiteri, tugeze aho twajyaga kuganirira nahasanze abandi batatu. Banyeretse ko mu Itorero hari abo tugomba kwikiza kugira ngo inyungu zabo bwite zize vuba, bavuga ko tugomba gutizanya imbaraga abanyamurenge n’Abacitse ku icumu tukabigizayo.”

“Arambwira ati ‘Uragenda ubiganirize umutware wawe nka perezida wa korali, aradufasha ;ni uwacu twese tuvuka mu Gafunzo,turi abantu baturuka hamwe kugira ngo bariya bantu bataza kutwinjiramo bakadutwara imyanya.’”

Undi ati “Abo bapasiteri bafite ivangura ry’amoko kubera ko bagiye babidukangurira twese uko duturuka hamwe mu Gafunzo. Umugore wanjye ni we bafashe bamujyana mu nama bamukangurira ngo abafashe abinyumvishe ko tugomba kwanga Abatutsi bari mu Itorero. Umugore akimara kubimbwira naramumbwiye nti ‘wabonye ibyabaye mu gihugu ko amashyaka ajya kuza ari uko yatangiye agenda yangisha abantu abandi, twe ntacyo dupfa na pasiteri w’Umututsi,ntabwo turi buze kumwanga tumuziza inyungu za bamwe.’”

Uyu mugabo akomeza avuga ko amaze kubyanga kubera ko yari perezida wa Korali, hari n’abandi baririmbyi bamubwiye ko basabwe n’abapasiteri kwanga Abatutsi.

Yakomeje agira ati “Tumaze kumva amakuru nk’abantu bari bayoboye Korali, twasanze abo bapasiteri bafite amacakubiri,kuko twari dufashe amakuru atandukanye y’abaririmbyi,babakangurira ngo babafashe be kubavamo ngo batagira ipfunwe nk’abayobozi.”

Ni bande birukanwa muri iri torero ?

Mu gusubiza iki kibazo umwe mu bakirisitu yagize ati « Hari abapasiteri bari barabwiwe ko Itorero riyoborwa n’Abatutsi ku rwego rw’Igihugu, nyuma bababwira ko abo bantu bakwiye kurwanywa bagakurwaho kugira ngo abo ku rwego rw’igihugu bajye babura uwo babaza amakuru. »

Aha ngo bashakaga kugira ibyo bahindura ku buryo nta wundi muntu w’umututsi bagira muri Kamembe cyangwa muri ‘conferance’ ya Kinyaga.

Abapasiteri bavugwa muri iki kibazo ntibigeze bakurikiranwa ngo bashyikirizwe inzego zishinzwe umutekano, nyamara aba bakirisitu bavuga ko iki kibazo bakibwiye inzego zitandukanye zirimo n’Akarere ka Rusizi.

Pasiteri Habiyambere Celestin, uyobora ihuriro Methodiste Libre mu kiswe conferance ya Kinyaga, ku murongo wa telefone yabwiye TV 1 ko ntacyo yasubiza adahawe uburenganzira n’uyoboye iri dini ku rwego rw’igihugu.

Yagize ati « Kuki unsaba ibintu by’Itorero, umuvugizi waryo nta burenganzira n’ububasha yampaye, kuki ushaka kunyicisha amategeko ? »

Kuri ubu aba baturage batangiye guterwa ubwoba basabwa kujya gushinga idini bitaba ibyo bakaba bahasiga ubuzima.

Ubuyobozi bukuru ntibuzi iki kibazo

Umunyamabanga Nshingwabikorwa w’Itorero Methodiste Libre mu Rwanda, Pasiteri Serugo Jérémie, yatangarije IGIHE ko iki kibazo batari bakizi.

Yagize ati « Hari n’igihe byigeze bivugwa turabikurikirana twibwira ko ikibazo cyarangiye ariko ejobundi twongera kubona bigarutse mu binyamakuru.Ubu turimo kubikurikirana ntabwo turamenya ukuri kwabyo, icyatumye byongera kubyuka. »

Pasiteri Serugo Jérémie, Umunyamabanga Nshingwabikorwa w'Itorero Methodiste Libre mu Rwanda

Akomeza avuga ko mu mwaka wa 2015, habahaye ikibazo gikomotse ku guhuza amakorali, abaririmbyi bamwe barabyanga.

Ati «Twe twumvaga ko guhuza amakorali akaririmbira hamwe ari bwo bumwe, na ho kuvuga ngo twe turarimbira aha abandi baririmbire hariya akaba ariyo macakubiri. »

Akomeza avuga ko ibivugwa ko amacakubiri akururwa na bamwe mu bapasiteri bagiye kubikurikirana hamwe n’icy’abakirisitu bavuga ko birukanwe mu Itorero.

Icyo ubuyobozi bw’Akarere ka Rusizi bubivugaho

Umuyobozi w’Akarere ka Rusizi, Harerimana Frédiric, yatangarije IGIHE ko ikibazo cy’amacakubiri avugwa mu Itorero Methodiste Libre bakizi.

Yagize ati « Icyo kibazo turakizi kandi kiri gukurikiranwa n’inzego zishinzwe umutekano, kuko nyuma y‘inama twagiranye n’abayobozi b’iryo Torero, ubuyobozi bukuru ku rwego rw’Igihugu ndetse n’ubuyobozi ku rwego rw’Akarere, tukareba ibyo baganiriye n’imyanzuro bagiye bafata itarashyizwe mu bikorwa, twabagiriye inama yo kwicara bakareba niba koko hari amacakubiri avugwamo ».

Uyu muyobozi yakomeje avuga ko ubuyobozi bw’Itorero Methodiste Libre bwagaragaje ko ikibazo cyari gihari cyari gishingiye ku baririmbyi.

Yagize ati « Bamwe bashakaga kugira korali ebyiri, ariko ubuyobozi bw’Itorero bubasaba ko bagira imwe bagahuriza hamwe. Ubwabyo rero gusaba abantu kwihuriza hamwe twumva atari amacakubiri, ahubwo ikindi gice cyashakaga gukora korali yabo ni cyo cyavuyemo gushinjanya ibyo by’amacakubiri. Twari twabahaye igihe ntarengwa cyo kuba bakemura ayo makimbirane yari ahari nyuma haza kuzamo icyo cy’amacakubiri n’ingengabitekerezo ya Jenoside ».

Meya Harerimana yakomeje avuga ko kuri ubu ibibazo biri muri iri Torero babishyikirije Polisi, bakaba bategereje ibizava mu iperereza.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza