Rusizi: Abanyarwanda 25 babaga muri Congo batahutse

Yanditswe na Kanamugire Emmanuel
Kuya 11 Ukwakira 2016 saa 09:39
46 31

Impunzi z’abanyarwanda 25 zari zarahungiye mu duce dutandukanye two muri Repubulika Iharanira Demokarasi ya Congo, kuri uyu wa Kabiri tariki ya 11 Ugushyingo 2016 zatashye zinyuze ku mupaka wa Rusizi ya mbere.

Aba banyarwanda babaga ku kirwa cya Idjwi no muri zone ya Karehe muri Kivu y’Amajyepfo bavuga ko kuva bahungirayo mu 1994 nta buzima bwiza babagamo ahubwo ko batotezwaga ndetse banababwira ko mu Rwanda nta amahoro ahari.

Uzamukunda Chantal ati “ Twe baratubwiraga ngo umunyarwanda uje baramwica cyangwa bakamufunga, ariko abaje mbere batubwiye ko nta kibazo gihari natwe niko guhitamo gutaha, none nabonye ari amahoro.”

Yankurije Bernadette ati “Nta gaciro baduhaga kuko batwitaga impunzi; icyatumaga tudatahuka ni uko hari amakuru yatugeragaho avuga ngo abantu baje ino bamwe barapfa.”

Abagabo ntibakunze gutaha

Inshuro nyinshi abakunze kwakirwa muri iyi nkambi ni abana, abagore n’abakecuru, nta bagabo bazamo ndetse n’iyo baje baba ari mbarwa, bamwe mu bagore bakaba bavuga ko banga [abagabo] gutaha.

Uwamahoro Maniraho yagize ati “Umugabo naramubwiye ngo dutahe aranga, nzanye n’abana banjye gusa.”

Niyobuhungiro Honorine ati “Ntabwo nzi impamvu yanze gutaha, ni umunyarwanda avuka i Gitarama, nari maze igihe muganiriza kuva ababyeyi banjye bataha, mbonye akomeje kumbwira ngo ’jya mu Rwanda wowe ufite icyo wibagiriweyo’, ndamureka ndataha.”

Aba banyarwanda bakiriwe barimo abagore 9 n’abana 16. Barahabwa ibiribwa n’ibindi bikoresho byo kwifashisha mu gihe cy’amezi abiri na ’mituelle de santé’, bakazagezwa mu turere bavukamo turimo Karongi, Musanze na Burera kuri uyu wa Gatatu tariki ya 12 Ugushyingo 2016.

Bamwe mu Banyarwanda batahutse bavuye muri Repubulika Iharanira Demokarasi ya Congo
Hatashye abagore n'abana gusa

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE