Rusizi: Abamotari bateye inkunga imiryango itatu ya bagenzi babo bazize Jenoside

Yanditswe na Ishimwe Israel
Kuya 17 Nzeri 2016 saa 10:55
Yasuwe : XX
0

Ihuriro ry’Amakoperative y’abamotari bo mu Karere ka Rusizi (UCMR) bakusanyije ndetse bashyikiriza imiryango itatu y’abamotari bishwe muri Jenoside yakorewe Abatutsi muri Mata 1994 inkunga ifite agaciro k’ibihumbi 450 by’amafaranga y’u Rwanda.

Aba bamotari bavuga ko bashakishije imiryango ya bagenzi babo bahoze bakorana bafasha itatu muri yo mu gikorwa cyabaye kuri uyu wa Gatanu, tariki ya 16 Nzeri 2016.

Ubuyobozi bw’Ihuriro UCMR (Union des Coopératives des Motars Rusizi) mu miryango itatu bateye inkunga, umwe yashyikirijwe amabati 30, undi ahabwa amafaranga ibihumbi ijana y’igishoro, boroza n’umubyeyi inka ifite agaciro k’ibihumbi 200.

Umuyobozi w’Ihuriro ry’amakoperative, Mahoro François Xavier avuga ko iki gikorwa bagikoze mu rwego rwo gufasha imiryango y’abari abamotari bagenzi babo bazize uko baremwe.

Ati “Kuri uyu munsi dukoze igikorwa cyo kuremera imiryango itatu, mu rwego rwo gufasha abababaye duhereye ku miryango y’abari abamotari. Twagakwiriye kuba dukorana na bo kugera uyu munsi, ariko batuvuyemo bahorwa uko baremwe ndetse n’uko basa.”

Abafite abagabo bakoraga umwuga w’ubumotari n’ababyeyi babo mbere ya Jenoside yakorewe Abatutsi bishimiye ibyo bagejejweho, bavuga ko inkunga bahawe hari aho igiye kubakura.

Mukantabana Béatrice yagize ati “Umugabo wanjye yarahagurukaga akajya gushaka imibereho ariko nyuma yaho bamwishe muri Jenoside najyaga gushaka ubuzima bikanga, rimwe na rimwe ngahingira umuturage akampa amafaranga ngatunga abana. Iyi nka bampaye izamfasha kubona ifumbire, urumva ko umusaruro uziyongera,n’ibyara tuzabasha kubona amata.”

Uzamushaka Domitilla, umukecuru uri mu kigero cy’imyaka 70 yunzemo ati “Wenda nk’uwo mwana yari kunyubakira kera ariko baramwica, none imvura yatunyagiraga kuko inzu twabagamo iva ndetse iranashaje. Aba bantu bakoze igikorwa cy’indashyikirwa. Kandi nizeye ko Imana izamfasha mbone ibiti nsakaze ariya mabati.”

Uwamahoro Florence wahawe igishoro cy’amafaranga ibihumbi 100 yo gucuruza, yavuze ko agiye gukora ubucuruzi bw’inkweto agahagarika gucuruza amata muri Repubulika Iharanira Demokarasi ya Congo kuko ngo nta nyungu yabibonagamo.

Umunyamabanga Nshingwabikorwa w’Umurenge wa Kamembe, iri huriro ry’abamotari rikoreramo, Ntivuguruza Gervais yemeza ko hakigaragara abarokotse Jenoside bagifite ibibazo by’imibereho n’ubumuga ariko iyo habonetse abaterankunga nk’iri huriro aba ari ingenzi kuri bo kuko bibagabanyiriza ibibazo.

Iyi nkunga yose yatanzwe ifite agaciro k’amafaranga y’u Rwanda ibihumbi 450 yavuye mu banyamuryango 1200 bagize Ihuriro ry’amakoperative y’abamotari bakorera mu Karere ka Rusizi.

Bashyikiriza inka umwe mu miryango itatu yatewe inkunga
Bamwe mu bamotari bakorera mu Karere ka Rusizi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza