Rusizi: Abahagarariye abamotari ntibanyuzwe n’icyemezo cya RCA cyo kubahagarika

Yanditswe na Sitio Ndoli
Kuya 5 Gashyantare 2018 saa 11:14
Yasuwe :
0 0

Ubuyobozi bw’Ikigo cy’Igihugu gishinzwe guteza imbere amakoperative, RCA, bwategetse ko abagize inama y’ubuyobozi n’iy’abagenzuzi b’ihuriro ry’amakoperative y’abamotari bo mu karere ka Rusizi, bahagarara biturutse ku mpamvu zirimo no gusuzugura inzego za leta.

Ibaruwa yanditswe ku itarki ya 29 Mutarama 2018, yashyikirijwe abo bayobozi basabwa guhita bavaho byihuse kubera impamvu zo gusuzugura inzego za leta, kutumvikana hagati yabo ndetse no gufata imyanzuro inama rusange itabimenyeshejwe.

Nyuma yo kwakira ibaruwa ibahagarika, aba bamotari babwiye IGIHE ko nubwo bagomba kubahiriza ibyo RCA yabasabye ariko barengana bakavuga ko batigeze basuzugura inzego za leta ahubwo bagashinja, Kankindi Leoncie, Umuyobozi w’Akarere ka Rusizi wungirije ushinzwe ubukungu, kwivanga mu mirimo ya koperative.

Umwe muri bo ati “Ibaruwa twayakiriye irimo ibyo baturega bavuga ko twasuzuguye imyanzuro y’inama rusange, ni umusekirite twakuyeho kubera twamenye ko yafunzwe igihe cy’umwaka kandi itegeko ritabyemera. Icyo gihe ni inama rusange yabyemeje ariko visi Meya arabyanga ategeka ko akomeza akazi kandi ari muri koperative afite moto yo gutembera idakora nka taxi.”

Aba bamotari bavuga ko ibyo bakorewe ari akarengane nk’uko bitangazwa na Eric Shumbusho wari umunyamabanga wa komite ngenzuzi y’iri huriro.

Ati “Turasaba RCA ko yaza aho dukorera ikabaza abayobozi bagize ihuriro, ikigerera aho dukorera kuko yo yafashe umwanzuro wo kuduhagarika nta kuri bafite.”

Umuyobozi w’ishami rya RCA mu Ntara y’Iburengerazuba, Hamisi Jean Damascène, avuga ko byabaye ari mu kiruhuko ariko ubuyobozi bukuru bwoherejeyo ikipe ngo ikurikirane ndetse ngo bahabwa n’amakuru n’ubuyobozi bw’akarere bubamenyesha amakimbirane ari mu makoperative ariko ngo uku kwezi kuzashira iki kibazo bagikemuye.

Ati “Ubugenzuzi bwarakozwe, hari ikipe yoherejwe n’umuyobozi mukuru ariko abayobozi b’akarere baraduhamagaye batubwira ibibazo biri mu makoperative, badusaba kugera icyo tubafasha kugira ngo ayo makimbirane arangire, umuyobozi mukuru yoherejeyo itsinda. Hafashwe icyemezo cyo guhagarika iyo nama y’ubuyobozi n’ubugenzuzi kugira ngo hakorwe ubucukumbuzi,noneho tuzamenya amakuru arambuye mu minsi iri mbere, uko biri kose uku kwezi kuzarangira ikibazo cy’amakoperative y’i Rusizi gikemutse.”

Ihuriro ry’amakoperative y‘abamotari ririmo abakora uwo mwuga bagera kuri 929 bari mu makoperative atandatu.

Inzu y'ihuriro ry'amakoperative y'abamotari mu Karere ka Rusizi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza