RURA yahawe asaga miliyoni 500 Frw azafasha mu guhuza ikoranabuhanga rya serivisi itanga

Yanditswe na Habimana James
Kuya 13 Ugushyingo 2019 saa 08:42
Yasuwe :
0 0

Ikigo Trade Mark East Africa kigamije guteza imbere ubucuruzi (TMEA) cyahaye Urwego ngenzuramikorere, RURA, inkunga y’ibihumbi 600 by’amadolari (asaga miliyoni 500 Frw) yo gufasha mu guhuriza hamwe uburyo bw’ikoranabuhanga busanzwe bukoreshwa n’abarugana.

Iyi nkunga yatanzwe ku bufatanye bw’Ikigo mpuzamahanga cy’Abongereza kigamije iterambere (DFID) biciye muri TMEA.

Amasezerano y’iyi nkunga yasinywe kuri uyu wa Gatatu hagati y’Umuyobozi Mukuru wa RURA, Lt Col Patrick Nyirishema, n’Umuyobozi wa Trade Mark East Africa mu Rwanda, Patience Mutesi.

Umuyobozi Mukuru wa RURA, Lt Col Patrick Nyirishema, yavuze ko iyi nkunga izafasha uru rwego gukomeza gushyira mu bikorwa gahunda z’ikoranabuhanga risanzwe rikoreshwa n’abarugana, rikarushaho kunozwa kurenza uko byari bisanzwe.

Yagize ati “Uyu munsi serivisi dutanga ziri kuri interinet ku buryo abazikenera bose bazibonaho ariko icyo tugiye gukora ni uko dushyiraho uburyo buboneye, aho za serivisi twagiye dukora mu buryo butandukanye noneho tuzihurize hamwe kugira ngo natwe ubwacu uburyo tuzikurikirana byorohe, ariko ibyo dukora tunabihuze na banki aho ba bantu bishyura binagabanye umwanya watakaraga.”

Lt Col Nyirishema avuga ko nubwo abagana uru rwego bakoresha ikoranabuhanga, hari ubwo umuntu yishyuraga nko kuri banki ariko bikamusaba ko aza kuri RURA kugaragaza cya cyangombwa kigaragaza ko yishyuye, ibi bikaba byari imbogamizi ku bantu kandi bigatwara umwanya.

Yagize ati “Hari ubwo umuntu yajyaga nko kuri banki yakwishyura akazana ikigaragaza ko yishyuye, turashaka ko icyo kibazo kivaho ku buryo serivisi dutanga zihuzwa, icyo umuntu ashaka akakibona atagombye kuza kuri RURA, wenda akaba yahaza kubera ko we ubwe ashaka kwibonanira n’umukozi.”

Iyi nkunga izafasha ibyiciro byose bikenera serivisi muri RURA harimo nk’abazana ibikoresho by’ikoranabuhanga mu gihugu, gutwara abantu, mu mashanyarazi n’ibindi.

Umuyobozi wa Trade Mark East Africa mu Rwanda, Patience Mutesi, avuga ko icyo bifuza ari uko abagana RURA bahabwa serivisi nziza kurenza uko byari bisanzwe, ibi bikaba binajyanye na gahunda ya guverinoma y’u Rwanda ko serivisi zose abaturage bazihabwa mu buryo bw’ikoranabuhanga.

Yagize ati “Gahunda yo gushyira izi serivisi hamwe bigomba guhita bitangira kandi zose zikaba zashyizwe hamwe bitarenze umwaka umwe.”

Agaragaza ko impamvu TMEA yagiye muri uyu mushinga, ari uko na leta nk’umufatanyabikorwa ishaka ko bitarenze mu 2023, serivisi zose zitangwa ku muturage zigomba kuba ziri mu buryo bw’ikoranabuhanga.

Inkunga yahawe RURA iri muri gahunda TMEA y’imikoranire na Guverinoma y’u Rwanda, hagamijwe gufasha igihugu mu mishinga iteza imbere ishoramari mu nzego zitandukanye no kugabanya igihe umuntu amara ashaka serivisi.

Umuyobozi wa RURA Lt Col Nyirishema na Mutesi uyobora TMEA bamaze gusinya amasezerano
Mutesi yasobanuye ko iyi nkunga izafasha mu guhuza serivisi RURA itanga mu ikoranabuhanga
Umuyobozi wa RURA Lt Col Nyirishema avuga ko bizorohereza abakenera serivisi za RURA

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza