Rulindo:Imyaka itatu irashize badahawe amashanyarazi bishyuye

Yanditswe na Uwishyaka Jean Louis
Kuya 25 Ukwakira 2016 saa 01:10
Yasuwe :
0 0

Bamwe mu baturage bo mu Kagari ka Karegamazi, mu Murenge wa Kinihira, Akarere ka Rulindo, barasaba inzego zibishinzwe kubafasha gukemura ikibazo cy’amashanyarazi bishyuye asaga milioni enye, ariko imyaka ikaba ibaye itatu batarayahabwa.

Aba baturage bagera ku 148 bo mu Midugudu ya Mutoyi, Rugundu na Magezi yose yo mu Kagari ka Karegamazi, ngo batangiye kwishyira hamwe kuva mu 2010 batanga umusanzu ungana n’ibihumbi 28 buri muntu ngo bigezeho amashanyarazi, maze mu 2013 bashingirwa amapoto ariko bategereza ko umuriro ubageraho baraheba.

Nsengimana James yagize ati"Njye nafashe inguzanyo ngura urusyo nzi ko uyu mushinga ari wo uzishyura ariko ubu nishyura ntakora, rimwe na rimwe ndakererwa bakanca ubukererwe."

Nyiransabimana Vestine ati"Nagurishije ihene yanjye yabyaraga ebyiri nsigaza indi imwe, imaze kubyara gatatu zibaye zirindwi urumva iyo ngira n’iyo mba mfite ihene zirenga 15, ni igihombo gikomeye cyane."

Hari n’abavuga ko aya mafaranga bayagujije mu matsinda ariko bakishyura hariho n’inyungu kandi nta muriro bahawe ahubwo amashanyarazi akajya ahabwa abandi bayasabye nyuma yabo. Bavuga kandi ko n’ibiti by’amashanyarazi bashingiwe bimwe byatangiye kwangirika batarahabwa umuriro bishyuye.

Umukozi w’Ikigo gishinzwe gukwirakwiza amashanyarazi mu Rwanda, ishami rya Rulindo, Ndahayo Chrysologue, avuga ko iki kibazo bakizi kandi ko kiri gushakirwa igisubizo ku buryo ngo bitarenze Ukuboza 2016, aba baturage bazaba bagejejweho amashangarazi bategereje igihe kitari gito.

Ati"Twazanye ’transformateu’ dusanga ifite ubushobozi buke, biba ngombwa ko dutumiza indi nini bitarenze mu Kuboza bazaba bacana nta kibazo."

Imibare Akarere ka Rulindo gaherutse gushyira ahagaragara mu Ukwakira 2015, yerekana ko ingo 12.583 zingana na 21.2% ari zo zifite umuriro w’amashanyarazi.

Aba baturage bavuga ko bamaze imyaka itatu bashingiwe ibiti n'insinga zitabamo amashanyarazi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza