Rulindo: Abakobwa babyarira iwabo bakandikisha abana kuri ba sekuru

Yanditswe na Umurerwa Emma Marie
Kuya 11 Ukwakira 2017 saa 06:42
Yasuwe :
0 0

Bamwe mu babyeyi b’abakobwa babyarira iwabo batarafata indangamuntu biyandikishaho abuzukuru babo mu gitabo cy’irangamimerere nubwo binyuranyije n’amategeko.

Abakobwa biganjemo abakora akazi ko mu rugo batarageza igihe cyo gufata indangamuntu, byagaragaye ko iyo babyaye hari ababyeyi babo bahita biyandikishaho abana mu gitabo cy’irangamimerere.

Uwiduhaye Goleti wo mu Murenge wa Bushoki yabyariye iwabo afite imyaka 16 y’amavuko, ababyeyi be biyandikishijeho umwuzukuru wabo kubera ko umugabo wamuteye inda yari yaramwihakanye.

Yagize ati “Nta ndangamuntu nari mfite kandi uwanteye inda yari yihakanye umwana. Ababyeyi banjye bahise bajya ku Murenge biyandikishaho umwana wanjye, none sinzi icyo nzakora kugira ngo mwiyandikisheho.”

Murekeyisoni Beatha nawe wo muri uyu Murenge avuga ko yabyaye bwa mbere afite imyaka 15, nawe ababyeyi be biyandikishaho abana be.

Yagize ati “Nabyariye abana babiri iwacu, umwe namubyaye ntarafata indangamuntu, mama wanjye ahita amwiyandikishaho, undi mubyara narafashe indangamuntu muzana iwacu mpita nsubira i Kigali nawe ababyeyi banjye bamwiyandikishijeho kubera ko uwanteye inda yari yanyihakanye.”

Ababyeyi bo muri uyu Murenge bavuga ko kwiyandikishaho abuzukuru babo ari amaburakindi , dore ko bababyara bakiri bato kandi badafite abagabo babateye inda bazwi.

Ntabanganyimana Fabien avuga icyatumye yiyandikishaho umwuzukuru we yagize ati “Umukobwa wanjye bamuteye inda akiga mu mashuri abanza, umwuzukuru wanjye namwiyandikishijeho kuko nta yandi mahitamo nari mfite. Hari n’undi muturanyi wiyandikishijeho umwuzukuru we kubera ko umukobwa we yamubyaye akamusiga aho, agahita ajya kuba ikirara iyo za Kigali, twumva ngo akora akazi ko mu rugo.”

Aba babyeyi bakomeza bavuga ko iyo umukobwa abyariye iwabo ari munsi y’imyaka 18 ari ikibazo gikomeye kuko uwamuteye inda ahita amwihakana kugira ngo adakurikiranwa n’amategeko.

Umukozi ushinzwe irangamimerere mu Murenge wa Bushoki, Kayisire Drocella, yavuze ko ababyeyi bamwe bakunze gukora ikosa ryo kwiyandikishaho abana batari ababo.

Yagize ati “Hari abakecuru baba bashaka kwiyandikishaho abuzukuru babo ariko ntibyemewe kabone niyo umwana yaba ari wa wundi watoraguwe ku muhanda nta muntu umwiyandikishaho ahubwo mu mwanya w’umubyeyi dushyiramo udukubo, hanyuma umukobwa wamubyaye yaba atarafata indangamuntu nabwo mu mwanya wayo tugashyiramo udukubo yazayifata akaza tukabihindura.”

Yakomeje avuga ko bashishikariza abaturage guhindura imyumvire bakirinda kwiyandikishaho abuzukuru babo cyangwa abana batabyaye kuko ari ukubavutsa uburenganzira.

Avuga ko iki kibazo gitera amakimbirane yo mu muryango bigeze igihe cyo gutanga umunani. Byongeye bikica irangamimerere y’umuntu kuko usanga umwana yitwa ko ari umuvandimwe wa nyina kandi atariko bimeze.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza