Ruhango: Uruhuri rw’ibibazo muri Koperative COTU ihinga umuceri rushobora kuyisenya

Yanditswe na Prudence Kwizera
Kuya 3 Ugushyingo 2019 saa 06:24
Yasuwe :
0 0

Bamwe mu banyamuryango ba Koperative COTU ihinga umuceri n’ibigori mu gishanga cyiri hagati y’Uturere twa Ruhango na Nyanza bavuze ko bafite ibibazo byinshi bishobora gutuma isenyuka niba nta gikozwe.

Ibyo bibazo birimo iby’umutungo wanyerejwe bavuga ko babitewe na komite nyobozi bari bafite igizwe na perezida, visi perezida n’umunyamabanga n’ubwo baje kubakuraho bagatora abandi.

Bavuga ko abo bayobozi babo bayiyoboye kuva mu 2017 kugeza muri Werurwe 2019 babasigiye ibibazo birimo amadeni bitabaza ubuyobozi bwite bwa Leta n’ Ikigo cy’Igihugu gishinzwe guteza Imbere Amakoperative, RCA, ariko ntibahabwa ubufasha.

Perezida mushya wa Koperative COTU, Penda Jean Marie Vianney, yavuze ko ubuyobozi bucyuye igihe bwabasigiye ibibazo birimo amadeni n’igihombo cya miliyoni zirenga 19 Frw.

Ati “Basize imyenda y’amafumbire, ibigo by’imari nka Urwego tubafitiye miliyoni zirenga 3 Frw, Uruganda rwa Gafunzo turufitiye arenga miliyoni, hari n’andi menshi.”

Mu bindi bibazo avuga koperative ifite harimo icy’abanyamuryango 42 batishyuwe amafaranga y’umusaruro wabo agera kuri miliyoni ebyiri n’ibihumbi 400 Frw.

Ati “Ayo mafaranga yarigitiye mu bayoboraga koperative, batanze umuceri ku Ruganda rwa Gafunzo Rice, uruganda rwishyura Koperative amafaranga ntiyahabwa ba nyirayo.”

Ikindi kibazo ni icy’amatsinda yari yarafashe inguzanyo muri banki, amaze kweza umusaruro akatwa amafaranga ariko komite nyobozi ntiyayajyana kuri banki.

Ati “Ni amafaranga agera ku bihumbi 618 Frw amatsinda yagujije muri Banki noneho umusaruro weze bakatwa amafaranga yo kujya kwishyura ariko abagize komite barayarigisa ntibayajyanayo.”

Akomeza avuga ko ikindi kibazo bafite ari umutungo wa koperative waburiwe irengero bigizwemo uruhare na komite yariho.

Ati “Ikindi ni amafaranga ya Koperative nyirizina ubugenzuzi bwagiye bugaragaza arenga miliyoni 16 Frw. Kuko igiteranyo cya yose ni miliyoni 19 n’ibihumbi 860 Frw.”

Nk’ubuyobozi bushya bwa Koperative ngo bashingiye kuri raporo z’ubugenzuzi bagejeje icyo kibazo ku Kigo cy’Igihugu gishinzwe guteza imbere amakoperative ariko ntibasubizwa.

Ati “Twagitanze tariki 7 Kamena 2019 ariko urabona aho amezi ashize kuva mu kwa Gatandatu kugeza mu kwa Cumi nta kirakorwa.”

Umwe mu banyamuryango witwa Kirenga Emmanuel wo mu Murenge wa Kinazi yavuze ibibazo koperative yagize byamugizeho ingaruka zirimo ko ibyangombwa bye byafatiriwe na banki kuko ari umwe mu bari bakuriye itsinda ryafashe inguzanyo.

Undi munyamuryango witwa Nsengiyumva Alexis avuga ko mbere koperative yakoraga neza ku buryo yakuyemo inzu nziza yo kubamo ariko imaze kuzamo ibibazo iramuhombya.

Ati “Byarambangamiye cyane kuko nambuwe amafaranga menshi y’umusaruro wanjye; urumva ni gihombo nshobora no gusazana.”

Kamariza Epaphrodite na we avuga ko koperative ayimazemo imyaka myinshi ariko kuri ubu yumva yayivamo kubera ibibazo batejwe n’ubuyobozi bwahozeho.

Ati “Bandimo amafaranga ibihumbi 70 Frw ariko nta munsi tutishyuza bakayatwima; njyewe mba numva nanayivamo.”

Ibyo bibazo byatumye abanyamuryango 363 bayivamo kuko bose hamwe bari 1 098 ubu hasigaye 735.

Babuze inkunga ya miliyoni 20 Frw bari bemerewe na BDF

Ubuyobozi bushya bwa Koperative COTU n’abanyamuryango bavuga ko bari bemerewe inkunga ya miliyoni 20 Frw n’Ikigega gitanga Ingwate ku mishinga mito n’iciriritse, BDF, ariko bananirwa kuyakira kubera ibyo bibazo bafite.

Iyo nkunga bagombaga kuyihabwa ku mushinga bari bafite wo kubaka uruganda ruto rutunganya ibigori.

Bagombaga kuwushoramo miliyoni 40 Frw zirimo izigera kuri 20 bagombaga guhabwa na BDF bakazishyuramo miliyoni 10, izindi 10 zikaba inkunga.

Perezida mushya wa Koperative COTU, Penda Jean Marie Vianney, ati “Ibibazo byajemo ni imiyoborere yabaye mibi bituma amafaranga arigiswa uruhare rwacu rurabura n’ayo twaguza ntiyaboneka.”

Komite yacyuye igihe ishinjwa kurigisa umutungo wa Koperative no kunyereza amafaranga y’umusaruro w’abanyamuryango no kurya ayagombaga kwishyurwa banki igizwe n’uwari perezida wayo Bizimana Célestin, yungirijwe na Karangwa David wari Visi Perezida ndetse na Nikuze Epiphanie wari Umunyamabanga.

Abo bose ubu ni abanyamuryango basanzwe kuko bakuwe ku buyobozi hatorwa abandi.

Uwahoze ari Perezida wayo Bizimana Célestin, avuga ko ibibazo koperative ifite atari bo babiteye ahubwo nabo babisanzemo.

Ati “Byatewe n’amadeni twasanzemo natwe yatewe n’abantu bari muri manda yashize. Uko twagiye tugerageza kwishyura inguzanyo z’inyubako n’ibindi birarane by’abakozi n’indi mirimo ya koperative byatumye tujya kurangiza manda yacu harimo ibibazo by’abanyamuryango batishyuwe kuko amafaranga yari yaradushiranye.”

Ubuyobozi bushya bwa Koperative n’abanyamuryango bifuza ko RCA yaza gukora igenzura no kubafasha gukemura ibibazo bafite kuko biri kubadindiza bikaba bishobora no gutuma koperative yabo isenyuka.

Umuyobozi Mukuru wa RCA, Prof Harerimana Jean Bosco, yabwiye IGIHE ko ibibazo biri muri Koperative COTU babimenye bityo bakaba bazoherezayo itsinda ku wa mbere tariki ya 4 Ugushyingo 2019.

Ati “Twamenye ikibazo Koperative ifite bityo itsinda rya RCA tuzajyayo kureba ibibazo ifite mu miyoborere n’imicungire ya koperative.”

Koperative COTU yashinzwe mu 2009 ibona ubuzima gatozi mu 2011; ihinga umuceri ku buso bwa hegitari 219 igasarura toni zigera kuri 200.

Abanyamuryango ba COTU bifuza ko RCA yaza kubafasha gukemura ibibazo bafite
Bamwe mu banyamuryango ba koperative COTU bagaragaje impungenge ku mikorere ya koperative
Bizimana Célestin wari uyoboye Komite ishinjwa guteza ibibazo n'igihombo muri Koperative COTU arabihakana akavuga ko amafaranga yakoreshejwe neza
Perezida mushya wa Koperative COTU, Penda Jean Marie Vianney, mu nama n'abanyamuryango
Penda Jean Marie Vianney yavuze ko ubuyobozi bucyuye igihe bwabasigiye ibibazo byinshi
Inzu y'ubuhunikiro ya Koperative COTU

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza