Ruhango: Urubyiruko ruvuka mu Byimana rwaremeye abatishoboye

Yanditswe na Uwishyaka Jean Louis
Kuya 25 Nzeri 2016 saa 02:15
Yasuwe : XX
0

Urubyiruko rukomoka mu Murenge wa Byimana, mu Karere ka Ruhango rutuye i Kigali no hirya no hino mu Rwanda, rwifatanyije n’abaturage b’aka karere mu muganda rusange wabaye kuri uyu wa 24 Nzeri 2016 ndetse runishyurira ubwisungane mu kwivuza abantu 100 batishoboye, mu rwego rwo kubashishikariza kurengera ubuzima.

Urwo rubyiruko rusaga 150 ruhuriye mu ihuriro ryarwo rwise Garuka Usure , rwavuze ko rwahisemo kwishyurira abo batishoboye mituweli kuko baha agaciro ubuzima bw’abaturage bababyara, babanye, babareze ndetse batuye aho bakomoka.

Umuyobozi w’urwo rubyiruko Ndagijimana Ally Henry, yavuze ko batakwibagirwa aho bavukiye, bagakurira ku buryo ngo bateganya no kuhakorera ibindi bikorwa.

Ati “ Twifuza kubana n’ababyeyi bacu, abavandimwe n’inshuti, ariko ntibidukundira, tuje kubaremera duhereye ku bwisungane mu kwivuza, no gusana iki kibuga ngo urubyiruko rubone aho rwidagadurira, ariko hari n’ibindi byinshi tuzakora birimo kubaka ishuri ry’incuke.”

Yasabye abaremewe guheraho bakishakamo ubushobozi bakazaremera abandi, kuko ubukene bwa mbere ari uburi mu mutwe buhora bubwira umuntu ko akennye. Yakanguriye kandi urubyiruko rwo muri ako karere gutera ikirenge mu cyabo bagoboka abatishoboye.

Umuyobozi w’Akarere ka Ruhango, Mbabazi François Xavier, yavuze ko bashyigikiye ibikorwa by’urwo rubyiruko, ku buryo ngo ikibanza basabye cyo kubakamo iryo shuri bagihawe, kuko ngo kubaka ishuri ry’incuke muri ako gace wari no mu muhigo akarere ka Ruhango, bityo ngo rizaba irya kabiri bizanabafasha kwesa uwo muhigo hejuru ya 100%.

Yavuze ko ubwo bwisungane mu kwivuza bwahawe abaturage babo buzarengera ubuzima bwa benshi, kuko hari abatari mu cyiciro cyishyurirwa mituweli na leta batari bafite amikoro yo kuyiyishyurira.

Umunyamabanga wa Leta muri Minisiteri y’Ubuzima akaba anareberera akarere ka Ruhango, Dr Ndimubanzi Patrick, yashimye urwo rubyiruko ku bw’umutima wibuka aho rukomoka rufite.

Ati “Ndashimira uru rubyiruko kuko kugira umutima, igitekerezo n’ibikorwa byo kwishyira hamwe. Ibi bikorwa bya Garuka Usure turabishyigikiye kuko ni byo byubaka umuryango n’igihugu muri rusange, tugatera imbere.”

Uru rubyiruko rwatunganyije ikibuga cy’umupira w’amaguru cya Byimana cyari cyarangiritse mu rwego rwo gufasha urubyiruko ruhaturiye kwidagadura, kuko bifasha urubyiruko kugira ubuzima budafite umuze, butuma rwiteza imbere n’igihugu muri rusange.

Nyuma y’umuganda uru rubyiruko rwasabanye na bagenzi babo batuye muri uwo murenge mu mukino w’umupira w’amaguru, aho abayobozi barimo Dr Ndimubanzi na Meya Mbabazi bakinnye mu ikipe y’abatuye mu Byimana.

Uru rubyiruko rwageneye Mituweli abantu 100 batishoboye
Uru rubyiruko ndetse n'abayobozi bifatanyije n'abaturage mu muganda
Bifatanyije n'abaturage mu gikorwa cy'umuganda usoza ukwezi
Nyuma y'umuganda abaturage bagejejweho ibiganiro binyuranye
Abayobozi batandukanye bari bitabiriye umuganda
Dr Ndimubanzi yashimye uru rubyiruko ku mutima wo kwibuka iwabo rufite
Meya Mbabazi yavuze ko ibikorwa by'uru rubyiruko bizatuma akarere kesa neza imihigo kihaye
Nsabimana Ally uhagarariye uru rubyiruko yavuze ko bazakomeza gufasha aka karere mu bikorwa binyuranye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza