Ruhango: Umusore arakekwaho kwica mukase wabo amutemye

Yanditswe na Kanamugire Emmanuel
Kuya 1 Nzeri 2016 saa 03:34
Yasuwe :
0 0

Twizeyimana Djuma w’imyaka 26 wo mu Karere ka Ruhango arakekwaho kwica Pelina Mukamurangwa wari umugore wa se wabo, ahita aburirwa irengero.

Ibi byabereye mu Kagari ka Gikoma, Umurenge wa Ruhango mu Karere ka Ruhango saa tatu n’igice z’ijoro ryo ku wa Gatatu tariki ya 31 Kanama 2016, ubwo Twizeyimana yasangaga uyu mugore akamutema bikamuviramo gupfa.

Umuvugizi wa Polisi mu Ntara y’Amajyajyepfo, CIP André Hakizimana yabwiye IGIHE ko Twizeyimana yishe mukase wabo amaze kumuha amazi yo kunywa.

Yagize ati “ Biravugwa ko yagiye kwa Mukase wabo, Pelina Mukamurangwa agiye gusaba amazi yo kunywa, umugore yagiye kuyazana agarutse ahita amukubita umupanga aramwica na we ahita ahunga.”

Yakomeje avuga ko umurambo wa nyakwigendera wahise ujyanya mu bitaro bya Kinazi kugira ngo usuzumwe ndetse anemeza ko igikorwa cyo gushakisha uyu Twizeyimana Djuma n’iperereza byahise bitangira.

Yasoje ashishikariza abaturage kugira ubworoherane no gutangira amakuru ku gihe mu rwego rwo gukumira ubwicanyi butaraba.


Urifuza kuduha amakuru? Hamagara iyi nimero 4546
Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza