00:00:00 IGIHE NETWORK KN KINYARWANDA EN ENGLISH FR FRANCAIS

Ruhango: Impungenge ku mibereho y’abana batandatu bo mu rugo rumwe batiga

Yanditswe na Prudence Kwizera
Kuya 3 Ugushyingo 2021 saa 05:06
Yasuwe :
0 0

Mu Murenge wa Mbuye mu Karere ka Ruhango hari umugabo witwa Minani Jean Bosco ufite abana batandatu batiga kandi bakagombye kuba bari mu ishuri urebye imyaka bafite.

Imibereho y’aba bana iteye impungenge kuko birirwa bazerera banasabiriza mu muhanda no mu gasantere kari i Mbuye.

Uwo mugabo w’imyaka 42 y’amavuko atuye mu Mudugudu wa Kidoma mu Kagari ka Mwendo; yatandukanye n’umugore we kubera amakimbirane bari bafitanye.

Ubwo umunyamakuru wa IGIHE yageraga muri ako gasantere yahabonye abana bari kuzerera mu masaha y’ishuri, ababaza impamvu batagiye kwiga, basubiza ko ubusanzwe batiga, biba ngombwa abikurikirana.

Umwe muri abo bana yagize ati “Njyewe kwiga ndabishaka ariko mu rugo nta makaye n’imyenda y’ishuri bampaye ngo njye kwiga. Iyo mbonye abandi bana bagiye ku ishuri numva nanjye nshaka kujyayo.”

Byabaye ngombwa ko Umunyamakuru ajyana n’abo bana iwabo kureba se, ashaka kumenya impamvu atabajyana ku ishuri.

Minani yasobanuye ko ikibazo nyamukuru gituma abana be batiga ari ubushobozi buke kandi no kubabonera ibyo kurya bimugoye.

Ati “Ikibazo ni ubukene, nta hantu mfite nkorera ni ukurya mvuye guca incuro ni uko bimeze. Umugore wanjye na we ntabwo tukibana kubera ibibazo by’abagabo n’abagore.”

Avuga ko na we yifuza ko abana be biga kugira ngo bazagire ejo heza ariko ubukene bumubera imbogamizi kuko abarizwa mu cyiciro cya mbere cy’ubudehe.

Ati “Icyo nasaba ubuyobozi ni ukumfasha abana banjye bakiga kuko nanjye nifuza ko biga bakazagira ejo hazaza heza.”

Umwana mukuru wa Minani afite imyaka 18, umukurikira akagira 16 mu gihe uwa gatatu afite 14; uwa kane afite 13, uwa gatanu akagira 10 naho uwa gatandatu afite imyaka umunani.

Minani avuga ko mu bana be hari abagerageje kujya ku ishuri ariko barirukanwa kubera ko nta myenda y’ishuri n’ibikoresho bari bafite.

Ati “Nk’uriya ufite imyaka 14 yagiyeyo [ku ishuri] hashize iminsi baramwirukana ngo nta myenda y’ishuri afite nta n’ibikoresho, aragaruka yicara mu rugo.”

Umugore we na we acumbitse aho hafi ku buryo abana batatu bakiri bato ari we bakunze kubana na we mu gihe abandi batatu bakuru babana na se. Umunyamakuru wa IGIHE ntiyabashije kumubona ngo baganire.

Abaturanyi b’uyu muryango bavuga ko ubuyobozi bukwiye kugira icyo bukora abo bana bakajya kwiga kuko imibereho yabo ihangayikishije.

Ndikumana Robert yagize ati “Uriya muryango urakennye cyane kuko n’imibereho yawo iragoye, abana ntibapfa kubona ibyo kurya. Aba bana barahangayikishije cyane kuko birirwa bazerera kandi na papa wabo asa n’uwataye umutwe kubera kugorwa n’ubuzima. Ubuyobozi bukwiye kureba uko bubafasha wenda bakajya kwiga.”

Undi muturanyi witwa Nyandwi Emmanuel na we yavuze ko ubuzima bw’abo bana bukwiye kwitabwaho hakiri kare kugira ngo batazakurana ingeso mbi z’ubujura.

Ati “Ubuzima bw’aba bana buragoye kuko no kurya bisaba ko nabo bishugurikira bakaba bashobora no kuzavamo amabandi kandi ubona ari abana bakwitabwaho hakiri kare bakajya ku ishuri.”

Abaturanyi ba Minani baganiriye na IGIHE bose bahuriza ku mpungenge batewe n’ubuzima bw’abana be, bagasaba ubuyobozi kugira icyo bukora bakajyanywa mu shuri.

Umunyamabanga Nshingwabkorwa w’Umurenge wa Mbuye, Kayitare Wellars, yavuze ko atari azi ko abo bana batiga ariko agiye gukurikirana ikibazo cyabo kugira ngo gishakirwe igisubizo.

Ati “Ntabwo ikibazo nari nkizi ariko ngiye gukurikirana. Uwo mubyeyi na we yari akwiye kwegera ubuyobozi akagaragaza ikibazo gihari ariko abana bagafashwa kwiga.”

Hirya no hino mu gihugu haracyari abana bato bazerera mu muhanda kandi bari mu kigero cyo kuba bari kwiga. Muri bo hagaragaramo abahungu n’abakobwa ndetse haba n’igihe bamwe muri bo batewe inda bakahabyarira.

Abatanga ibitekerezo basanga hari icyo inzego z’ubuyobozi zikwiye gukora ku bufatanye n’ababyeyi, abana bakajya bitabwaho bakiri bato kugira ngo bakure bafite icyerekezo kizima.

Minani Jean Bosco n'abana be batembera mu gasantere kari hafi y'aho batuye
Abana ba Minani Jean Bosco bakunze kugaragara bazerera mu muhanda mu gihe abandi bari ku ishuri
Inzu Minani Jean Bosco abanamo n'abana be mu Mudugudu wa Kidoma mu Kagari ka Mwendo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .