Ruhango: Barasaba gutunganyirizwa igishanga cyangiritse kiri kubateza igihombo

Yanditswe na Prudence Kwizera
Kuya 30 Kamena 2019 saa 07:58
Yasuwe :
0 0

Bamwe mu bahinzi bo mu Karere ka Ruhango barifuza ko inzego zibishinzwe zabafasha gutunganya igishanga cya Base kuko cyangiritse bigatuma batabasha kongera kugihingamo.

Icyo gishanga gifite ubuso bwa hegitali zirenga 100 ariko hafi kimwe cya kabiri cyayo cyarangiritse n’ahandi hagenda hangirika kuko kidatunganyije. Gihuza imirenge ya Mwendo na Bweramana

Iyo uhageze ubona igice kinini cyacyo cyarengewe n’amazi ku buryo wakwibeshya ugira ngo ni ibyuzi by’amafi.

Abaturage umunyamakuru wa IGIHE yahasanze bari kugerageza kucyahiramo ubwatsi bamubwiye ko kuba batagihingamo ari igihombo kuri bo no kuri Leta.

Mugemanyi Narcisse yagize ati “Ubu twarahombye kandi na Leta yarahombye kuko mbere kitarangirika buri gace kasoreshwaga amafaranga ibihumbi bitatu kandi gifite uduce turenga 200."

Abo baturage bose bahuriza ku gusaba ko cyatunganywa, bakemeza ko byatanga umusaruro kuko bajya bagihinga mu bihe byose badategereje ko imvura igwa.

Bajyikarambi Innocent yagize ati “Kera kikiri kizima twaragihingaga tukabasha kubona imibereho kuko cyavagamo umusaruro mwiza w’umuceri.”

Umuyobozi wungirije ushinzwe iterambere ry’ubukungu mu Karere ka Ruhango, Rusiribana Jean Marie Vianney, yavuze ko icyo gishanga cya Base gifitiwe gahunda yo kutunganywa kuko bazi neza akamaro kizagirira abaturage.

Ati “Natwe iyo tubibona igishanga nka kiriya tuba tugifitiye gahunda; hari ibishanga tuzatunganya mu Karere dufatanyije na Minisiteri y’Ubuhinzi n’Ubworozi; (…) ni ubushobozi tuba tukegeranya kugira ngo dutunganye ibishanga umusaruro w’abahinzi wiyongere”.

Rusiribana avuga ko bateganya ko mu ngengo y’imari y’umwaka utaha batangira kugitunganya.

Gahunda yo gutunganya ibishanga yahoze ikorwa na Minisiteri y’ubuhinzi n’Ubworozi ariko byemejwe ko yashyirwa mu turere natwo tukajya tubikora binyuze mu kubisabira amafaranga mu ngengo y’imari.

Abaturage barifuza ko iki gishanga cyatunganywa kikabyazwa umusaruro
Ubu iki gishanga iyo ukigezemo usanga abaturage bari kucyahiramo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza