Ruhango: Abatishoboye bafite imishinga y’iterambere bashishikarijwe kuyerekana bagaterwa inkunga

Yanditswe na Prudence Kwizera
Kuya 26 Mutarama 2021 saa 07:49
Yasuwe :
0 0

Mu gihe hari bamwe mu batishoboye bavuga ko batagira icyo bakora kibakura mu bukene, ubuyobozi bw’Akarere ka Ruhango burashishikariza abari muri icyo cyiciro kwitinyuka bagatekereza imishinga y’iterambere bakora kuko hari amafaranga menshi yagenewe icyo gikorwa mu rwego rwo kubazamura.

Bamwe mu baturage bo mu Karere ka Ruhango bavuga ko mu rwego rwo guteza imbere abatishoboye, hakwiye kujyaho uburyo bwo gutera inkunga abafite imishinga ariko badafite amikoro yo kuyitangiza kuko amafaranga ibihumbi 500 Frw basabwa kuba bafite kugira ngo baterwe inkunga n’Ikigega BDF ari menshi ku buryo batapfa kuyabona.

Mukamunana Violette wo mu Murenge wa Mbuye avuga ko ubusanzwe Ikigega cya BDF gitera inkunga abagore ariko bagahera ku bafite igishoro cy’amafaranga ibihumbi 500 Frw gusa.

Yifuza ko by’umwihariko amatsinda y’abagore yajya afashwa kubona inkunga n’inguzanyo kugira ngo akore ibikorwa bibateza imbere.

Umuyobozi w’Akarere ka Ruhango, Habarurema Valens, avuga ko hari amafaranga menshi yagenewe gufasha abafite imishinga iciriritse, bityo agashishikariza abayifite kubagana ndetse n’abandi batayifite bagatangira kuyitekereza.

Yagize ati “Dufite imishinga myinshi mu Karere ka Ruhango, dufite n’amafaranga menshi yo kuba twazamura abantu, yaba umuntu ku giti cye cyangwa se amatsinda y’abantu. Dufite rero miliyoni 600 Frw tugenda dutanga mu baturage bishyize hamwe cyangwa se umuntu ku giti cye bitewe n’uko umushinga we usobanutse.”

Habarurema yakomeje avuga ko umuntu wese waba yarateguye umushinga yagana Akarere kuko hari Ishami rishinzwe kubafasha by’umwihariko.

Ati “Uwaba afite umushinga yumva yateguye, umwe cyangwa benshi, hano hari Ishami rishinzwe gufasha abantu nk’abo noneho rikaba rifite n’aho rikura amafaranga yo kubaha. Baze rwose tubahe ibikenewe, haba biciye mu kigega cya BDF cyangwa biciye mu buyobozi bw’Akarere mu mafaranga ajya muri serivisi yitwa ‘Financial Service’ aba muri VUP.”

Ibarura rusange riheruka ryerekanye ko abaturage bakennye cyane mu Karere ka Ruhango bari ku kigero cya 15% naho abakene bakaba bangana na 38%.

Abatishoboye bafite imishinga y'iterambere basabwe kuyerekana bagahabwa amafaranga yo kuyishyira mu bikorwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .