Kwamamaza

Ruhango:Abantu bataramenyekana bateye urugo bica umugabo bakomeretsa umugore

Yanditswe kuya 2-09-2016 saa 11:55' na Ntakirutimana Deus


Umugabo witwa Hitimana Reverien w’imyaka 38 y’amavuko yishwe n’abantu bataramenyekana bamuteye mu rugo rwe mu Kagari ka Munanira mu Murenge wa Kabagari mu karere ka Ruhango, umugore we Uwimbabazi Drocelle arabacika nyuma yo kumukomeretsa.

Uwo muryango wari ufite abana batanu watewe n’abantu bataramenyekana mu ma saa cyenda z’ijoro ryakeye.

Umunyamabanga Nshingwabikorwa w’akagari ka Munanira Nyiranzamurambaho Marie Goretti yavuze ko abateye urwo rugo babanje kwica inzugi zo mu nzu, umugabo akajya kureba ibibaye agahura n’abari baje kumwica bagatangira kugundagurana.

Nyuma bakomeje bamukurura bashaka kumujyana hanze ahareba ku ruzi rwa Nyabarongo , dore ko uwo muryango uturanye narwo aho rutandukanya uturere twa Ruhango na Karongi.

Baje kumwicira mu irebe ry’umuryango bamutemye, umugore we Uwimbabazi yumvise bikomeye aca mu idirishya arahunga. Ageze hanze uwari uhasigaye yahise avuga ngo araducitse nimumwice, baramwirukanka bashaka kumwica.

Nyiranzamurambaho ati “ Bamukubise umuhoro ufata intsina bituma akomeza kwiruka agira n’Imana itoroshi bari bafite igwa hasi bakomeza kuyishaka, bituma abacika.”

Uwimbabazi yahungiye bucece ku rugo rw’abaturanyi be ba hafi ruri mu ntera isaga kirometero n’igice, ababwira ibibaye bamufasha kuvuza induru maze abaturage baratabara.

Abatabaye bageze mu rugo rwa Hitimana basanga asigayemo akuka gace, abapfira mu maso bahita bajyana umugore we ku kigo nderabuzima cya Munanira ariko kuko yari yakomeretse bamutemye ndetse yanavunitse, bamwohereza ku bitaro bya Gitwe, aho akirimo kuvurirwa.

Mu gihe Hitimana yagundagurana n’abari baje kumwica, umwana wabo w’imfura w’imyaka 13 y’amavuko yahamagaye nyina amubwira ngo watabaye Papa, azi ko akiri mu nzu, agiye kureba ibyabaye bamukubita inkoni ngo nasubire mu nzu.

Uwo muyobozi yavuze ko polisi n’izindi nzego z’umutekano zageze muri urwo rugo zitangira gukora iperereza.

Abaturanye na Hitimana bavuze ko nta kibazo bari bazi yagiranaga n’abantu. Bavuze ko aherutse guhohoterwa n’abantu bakomoka mu karere ka Karongi bamwibiye ibikoresho yifashishaga mu kazi ke ko kubaza. Abo bantu ngo barazwi ndetse n’ibyo bikoresho yibe byarafatiriwe.

Umunyamabanga nshingwabikorwa w’akagari ka Munanira yavuze ko abateye urwo rugo bari bagamije kwica uwo mugabo, kuko ngo batigeze bareba imitungo yari afite irimo inka ebyiri n’igare ryari hafi y’aho bamwiciye, ahubwo bamaze kumwica bagatwara igikapu cyarimo imyenda na telefoni y’umugore.

Yasabye kandi abaturage gutangira amakuru ku gihe ku cyo babonye gishobora guhungabanya umutekano, no kubahiriza gahunda za leta batura ahatari mu manegeka, ahubwo bakajya ahagenwe, kuko ngo uwo muryango washobora gutabarwa iyo uba uturanye n’abandi, ariko ngo wari kure yabo, aho wahagarara ugatera ibuye muri Nyabarongo.

Ubuyobozi bw’akarere ka Ruhango bwateguye inama muri ako gace, iza kuba uyu munsi ku gicamunsi.

Mu karere ka Ruhango hamaze iminsi havugwa ubwicanyi butandukanye burimo umuryango w’abantu batandatu wigeze kwicwa mu Murenge wa Byimana, umunyeshuri washe akanatwikwa, n’abandi batandukanye.


Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Sunday 25 September 2016
Copyright © 2009 -2014 - IGIHE Ltd - All Rights Reserved