00:00:00 IGIHE NETWORK KN KINYARWANDA EN ENGLISH FR FRANCAIS

Ruhango: Abantu 40 barimo abangavu 12 bataruzuza imyaka y’ubukure bamaze gukurirwamo inda

Yanditswe na Prudence Kwizera
Kuya 28 Nzeri 2021 saa 07:40
Yasuwe :
0 0

Ubuyobozi bw’Ibitaro by’Intara bya Ruhango bwatangaje ko kuva mu mpera z’umwaka ushize wa 2020 kugeza ubu bimaze kuganwa n’abantu bagera kuri 40 basaba gukuzamo inda kuko bazitewe batabyifuza.

Byatangajwe kuri uyu wa Kabiri tariki ya 28 Nzeri 2021 ubwo mu Karere ka Ruhango hizihirizwaga umunsi mpuzamahanga wo gukuramo inda mu buryo bwemewe n’amategeko.

Umuyobozi ushinzwe imari n’ubutegetsi mu Bitaro by’Intara bya Ruhango, Nkurikiyimana Edmond, yavuze ko mu bantu 40 bamaze gukuriramo inda harimo abangavu 12 bataruzuza imyaka 18 y’ubukure.

Ati “Kuva mu mpera z’umwaka ushize tumaze kwakira abantu 40 barimo 12 b’abana batewe inda bafashwe ku ngufu. Abo baraza tukabaha ubujyanama mu mategeko, abaganga bakabaganiriza na serivise bakayihabwa uko itegeko ribiteganya.”

Ubusanzwe mu Rwanda gukuramo inda ni icyaha gihanwa n’amategeko kuko ingingo ya 123 n’iya 124 y’igitabo cy’ibyaha n’ibihano yerekana ko ukuyemo inda akabihamywa n’urukiko ahanwa.

Icyakora ingingo ya 125 itanga irengayobora ikagaragaza ibice bitanu aho nta buryozwacyaha bubaho iyo umuntu yakuyemo inda bikorewe kwa muganga wemewe.

Harimo kuba uwatewe inda ari umwana utaruzuza imyaka 18, kuba umugore yaratewe inda afashwe ku ngufu, umugore yarashyingiwe ku ngufu atabishaka, kuba utwite yaratewe inda n’uwo bafitanye isano ku gisanira kitarenze icya kabiri n’igihe byemejwe n’abaganga ko inda atwite ishobora kumutera ibibazo cyangwa ikabitera umwana.

Umwe mu bangavu wakuriwemo inda kuri ibyo bitaro yavuze ko yari yarayitewe afite imyaka 17, ku buryo yari ahangayitse kuko yahise ava mu ishuri.

Ati “Nkimara kumenya ko ntwite numvise mpangayitse kuko nahise mva no mu ishuri kuko nigaga mu wa kabiri w’amashuri yisumbuye. Kwa muganga baramfashije bayikuramo neza abanyitaho, kuri ubu nasubiye ku ishuri nta kibazo mfite.”

Uyu mukobwa yasobanuye ko guterwa inda yabikuyemo isomo bityo atazongera kugwa mu bishuko bimujyana mu busambanyi.

Kagaba Aphrodis, Umuyobozi w’Ikigo giharanira uburenganzira no guteza imbere Ubuzima (HDI), akaba yari anahagarariye imiryango ine yishyize hamwe igamije guteza imbere ubuzima bw’imyororokere no kurwanya Sida, yavuze ko hamaze guterwa intambwe ishimishije mu kubahiriza itegeko ryo gukuramo inda.

Ati “Ubushakashatsi dufite bwagutse bwakozwe mu 2009 ari nabwo twahereyeho kugira ngo dutangire gukora ubuvugizi, uwo mwaka twari twagize abantu barenga ibihumbi 60 bari bakuyemo inda mu buryo bwa magendu.”

Gukuramo inda ku babyemerewe bikorerwa ku bitaro bikuru, ibitaro by’akarere cyangwa ibyigenga byemewe na Leta cyangwa ivuriro ryemewe kandi bigakorwa na muganga wemewe. Iyo nda kandi igomba kuba itarengeje amezi atanu.

Umunyamabanga Nshingwabikorwa w’Intara y’Amajyepfo, Busabizwa Parfait, yavuze ko itegeko rijyanye no gukuramo inda baryitezeho kurengera ubuzima bw’Abanyarwanda.

Ati “Amategeko yagiye ashingiye ku bibazo byari bisanzwe bihari kuko hari abifuzaga gukuramo inda ariko bakabikora ku buryo butanoze bikabatwara ubuzima. Biradusaba ubukangurambaga kugira ngo abaturage bamenye aya mategeko.”

Iryo tegeko riteganya ko iyo umwana utaruzuza imyaka 18 ahohotewe agaterwa inda akifuza kuyikurirwamo ariko ababyeyi be batabyemera, icyo gihe hashyirwa mu bikorwa icyifuzo cy’umwana.

Ibitaro by'Intara bya Ruhango byatangiye kuganwa n'abifuza gukurikirwamo mu buryo bunoze kandi bwemewe n'amategeko
Umunyamabanga Nshingwabikorwa w’Intara y’Amajyepfo, Busabizwa Parfait, yavuze ko itegeko rijyanye no gukuramo inda baryitezeho kurengera ubuzima bw’Abanyarwanda
Umuyobozi wa HDI, Kagaba Aphrodis, yavuze ko hamaze guterwa intambwe ishimishije mu kubahiriza itegeko ryo gukuramo inda

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .