Rucagu yasabye urubyiruko ruba mu mahanga kwitandukanya n’abaruyobya ku mateka ya Jenoside

Yanditswe na Tuyishimire Raymond
Kuya 25 Mutarama 2021 saa 09:35
Yasuwe :
0 0

Rucagu Boniface yasabye Abanyarwanda baba mu mahanga bakirangwa n’urwango n’amacakubiri bishingiye ku moko guhindura imyumvire, bagafatanyiriza hamwe n’abandi mu kubaka ubumwe bw’igihugu n’iterambere ryacyo.

Uyu musaza uri mu bagize Urubuga Ngishwanama rw’Inarararibonye z’u Rwanda (REAF) yashimangiye ko ubumwe bw’Abanyarwanda ari inkingi y’iterambere ryabo.

Yagize ati ”Icya mbere ndashaka kuvuga ko ubumwe bw’abanyarwanda ari yo nkingi ya byose. Niyo nkingi y’amahoro, niyo nkingi y’umutekano, niyo nkingi y’iterambere."

Rucagu mu kiganiro yagiranye n’Umwanditsi akaba n’Umushakashatsi ku mateka ya Jenoside yakorewe Abatutsi, Gasigwa Léopold, yavuze ko Abanyarwanda baramutse bashyize hamwe nta cyabananira.

Yakomeje ati ”Ufite ubumwe bw’Abanyarwanda ntacyo wabura. Abana [Avuga Abanyarwanda baba mu mahanga bavutse ku babyeyi bakoze Jenoside] bakwiye kwitandukanya n’ikibi, niba ababyeyi barayobye ntibumve neza Leta ibahamagarira kubaka ubumwe bw’Abanyarwanda, abo ni ababyeyi bayobye.”

Yasobanuye ko iyo ari yo mpamvu nyamukuru abo bana bakwiye kwitandukanya n’ikibi.

Ati ”Icyo umwana asabwa ni ukwitandukanya n’icyo ababyeyi n’abavandimwe bakoze. Ndabararikira kubaka ubumwe bwabo, bakubaka ubumwe bw’Abanyarwanda, bakayoboka inzira ya Ndi umunyarwanda, bakitandukanya n’inzira mbi ababyeyi babo banyuzemo.”

Rucagu yongeyeho ko abo Banyarwanda badakwiye kumva ko nta ruhare bagira mu kubaka igihugu kuko nta wundi uzabibakorera.

Ati ”Ni bo bafite kubaka igihugu, ni bo bazakibyarira, ni bo bazagiha abuzukuru n’abuzukuruza n’ubuvivi. Abo bana babo bakwiye kuzarangwa n’ubumwe bw’Abanyarwanda, badapfobya Jenoside yakorewe Abatutsi, bumva ko Jenoside yakorewe Abatutsi yabaye mbi kandi yasenye umuryango Nyarwanda.”

Sinariye ingoma nyinshi

Rucagu Boniface ari mu banyepolitiki bakiri mu mirimo bamaze igihe kirekire ndetse banakoranye n’abayobozi batandukanye.

Mu gusubiza ikibazo cy’uko afata abavuga ko yariye ingoma nyinshi, Rucagu yavuze ko atari byo kuko we adahakirizwa.

Ati ”Ntabwo ari byo, ntabwo nariye ingoma nyinshi, abariye ingoma ya Kayibanda, yavuyeho arabafunga. Kurigisa imitungo, kurya ruswa, uwabikoze wese Kayibanda yavuyeho yaramwirukanye ku kazi, abandi yarabafunze.”

Uyu mukambwe yasobanuye ko impamvu yabashije gukorana n’ingoma nyinshi ari uko yari inyangamugayo.

Ati ”Nakoranye n’ingoma nyinshi ariko sinariye ingoma nyinshi kuko uzababaririze, uwariye ingoma imukura amenyo agasigarana ibihanga, njye amenyo yanjye yose aracyahari.”

Mu kubara iyo nkuru avuga ko mu myanya yabayemo yitwararitse ku buryo n’aho yatezwe yahatambukanye umucyo.

Ati ”Njye umbona nacunze imishinga ifite amafaranga menshi, ya yindi uvuga ngo ubwo babiguhaye kubicunga uramenye ntuzirangareho, uzavemo uvanyemo ayawe. Imishinga nacunze mba narakuyemo amagorofa mu mujyi rwose. Ariko kubera ko ngira ubwoba, kandi kugira ubwoba ni indangagaciro yo kwanga kugawa, sinayiriye.”

Rucagu yavukiye mu yahoze ari Chefferie ya Kibare (Burera y’ubu), ku wa 1 Ukuboza 1946, yinjiye muri politiki mu 1959 afite imyaka 13. Yabaye umwarimu ndetse aza no kugirwa umuyobozi w’amashuri nyuma aba umukozi wa Perefegitura ya Kibungo.

Mbere gato y’ihirikwa ry’ubutegetsi bwa Kayibanda yabaye Sous-Perefe muri Byumba na Ruhengeri, akomeza gukorana n’ubutegetsi bwa Habyarimana kugeza burundutse. FPR-Inkotanyi ifashe ubutegetsi Rucagu yagiriwe icyizere kuko mu 1997 yagizwe Perefe wa Ruhengeri, aza no kuyobora Itorero ry’Igihugu.

Rucagu ni umwe mu banyepolitiki babimazemo igihe kirekire

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .