Rubavu: Urukiko rwahagaritse igurishwa ry’ibagiro rya Rutagara

Yanditswe na Mukwaya Olivier
Kuya 1 Kanama 2019 saa 11:32
Yasuwe :
0 0

Urukiko rw’ibanze rwa Gisenyi rwemeje ko cyamunara y’ibagiro rya Rutagara, ihagarikwa kuko umuhesha w’inkiko Leon Semajambi atubahirije ibijyanye na cyamunara aho yafatiriye ibagiro mbere yo gukora igenagaciro.

Abanyamuryango ba Koperative KOADU Dukundumurimo, ikorera mu Karere ka Rubavu, babujije umuhesha w’inkiko guteza cyamunara ibagiro ryabo, kubera uburiganya bwakoreshejwe n’abahoze ari abayobozi b’iyi koperative.

Mu gitondo cyo ku wa Kane nibwo umuhesha w’inkiko, Semajambi, yazindutse ajya guteza cyamunara ibagiro rya Rutagara riherereye mu Murenge wa Rubavu, ariko asanga abaturage bariye karungu baramushushubikana ahita afata icyemezo cyo gusubika cyamunara ayimurira taliki 1/8/2019.

Uyu muhesha w’inkiko yagiye muri cyamunara yagiye guteza cyamunara kandi yari yatumijwe mu rubanza iyi koperative yareze isaba ihagarikwa rya cyamunara ariko ntiyitaba urukiko.

Nyuma y’icyemezo cy’urukiko cyo guhagarika cyamunara, umuhesha w’inkiko Semajambi yavuze ko nyuma y’iminsi 15 azagaruka akagurisha ibagiro rya Rutagara.

Ati "Umwanzuro tuwakiriye neza. Ntabwo cyamunara ihagaritswe mu minsi 15 iraba, icyo tugiye gukora ni ugushaka umugenagaciro utandukanye n’uwakoreye Koadu. Ubu tugiye gushaka undi utandukanye n’uwa Koadu’’.

Perezida wa Koperative ya Koadu, Musabyimana Nyarubisi Bertin, avuga ko bishimiye icyemezo cy’urukiko, asaba ko urubanza rw’abari abayobozi ba koperative bafunzwe rwihutishwa.

Ati “Twishimiye icyemezo cy’urukiko kuko bagaragaje akarengane koperative yacu yagiriwe tukaba dusaba ko ubushinjacyaha bwakwihutisha urubanza rw’abari abayobozi bacu kuko ibyaha baregwa aribyo byateje iyi cyamunara’’.

Iri bagiro ryuzuye ritwaye amafaranga miliyoni 372 Frw ubuyobozi buza kugirana amasezerano na rwiyemezamirimo y’imirimo y’inyongera ya Miliyoni 450 biteza imanza zatumye urukiko rutegeka ko ritezwa cyamunara.

Abanyamuryango basabye ko cyamunara ihagarikwa kubera ko inyandiko urukiko rwagendeyeho rwemeza ko batsinzwe ari impimbano n’ababigizemo uruhare bakaba babikurikiranyweho mu butabera.

Ubuyobozi bw’ikigo cy’igihugu gishinzwe amakoperative (RCA) buvuga ko ibagiro rya Rutagara ritatezwa cyamunara kubera uburiganya bwakoreshejwe n’abahoze ari abayobozi ba koperative KOADU, igasaba ko inzego z’ubutabera zabakurikirana.

Abahoze ari abayobozi ba koperative KOADU bashoye iyi koperative mu manza barafunzwe hamwe na ba rwiyemezamirimo, aho bakurikiranyweho inyandiko mpimbano yemezaga umwenda wa miliyoni 435 Frw, bakaba baragiye bigana imikono y’abanyamuryango.

Cyamunara y'ibagiro rya Rutagara yahagaritswe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza