Rubavu: Umuyobozi w’Ishuri yashatse kuraza Animatrice hanze Gitifu arahagoboka

Yanditswe na David Eugène Marshall
Kuya 19 Nyakanga 2018 saa 07:00
Yasuwe :
0 0

Umuyobozi w’Ishuri ry’Ubugeni rya Nyundo riherereye mu Karere ka Rubavu, yabujije umwe mu bakozi ushinzwe ikinyabupfura (Animatrice), kwinjira mu kigo aho asanzwe ataha, ku mpamvu z’uko ngo yamunaniye ataha igicuku.

Ku mugoroba wo kuri uyu wa Gatatu ahagana saa Moya n’iminota 50, ubwo Sugira Martine ushinzwe ikinyabupfura (Animatrice), yari asubiye mu kigo na bagenzi be bakorana, yabujijwe kwinjira n’abashinzwe umutekano w’ishuri, abwirwa ko ari amabwiriza yatanzwe n’Umuyobozi w’Ishuri Frère Nizeyimana Sébastien.

Kuri uyu wa Kane Sugira yabwiye IGIHE ko ku mugoroba w’ejo saa Kumi n’igice yasabye uruhushya abayobozi rwo kujya kuri Banki kuri Mahoko, akahasanga umurongo muremure watumye asubira mu kigo hafi Saa Mbili, akabuzwa kwinjira, mu gihe abandi bari kumwe babyemerewe.

Yagize ati “Abandi barimo n’uwitwa Masumbuko waje no kuza nyuma babaretse, nkibaza rero impamvu nahawe akato bene ako kageni”.

Akomeza avuga ko yaje kwiyambaza Umunyamabanga Nshingwabikorwa w’Umurenge wa Nyundo na Komanda wa Sitasiyo ya Polisi ya Nyundo, bakamufasha kwinjira mu kigo ahagana Saa yine z’ijoro.

Umuyobozi w’Ikigo, Frère Nizeyimana Sébastien, yabwiye IGIHE ko uyu mukozi yamunaniye kubera gutaha mu gicuku bihabanye n’inshingano zihariye afite.
Yagize ati “…Mbwira abazamu nti niyongera gutaha aya masaha mujye mumureka nibura yisubirire ahantu aba yahoze kuko n’ubundi nta kintu aba aje gukiza, ubwo nimugoroba rero yaje mu ma saa mbili n’iminota nka makumyabiri, kubera ko nari nababwiye nyine babikoze, ariko twaje kugeza aho turamukingurira”.

Ahakana ko hari amabwiriza mashya yahaye abashinzwe umutekano w’ishuri, yiyongera ku yo yari yarigeze gutanga ubwo uyu mukozi yatahaga mu masaha ya saa tanu z’ijoro.

Fr. Nizeyimana yibaza icyo umukozi nk’uyu ushinzwe ikinyabupfura mu bana yafasha muri ayo masaha, kuko ibihe byo gusubiramo amasomo biba byarenze. Icyakora avuga ko ejo yari yamusabye uruhushya ariko akibaza ukuntu yamara amasaha ane kuri banki.

Umunyamabanga Nshinwabikorwa wa Nyundo, Kazendebe Hertier, nawe yahamirije IGIHE ukuri kw’iki kibazo, ndetse ko ari mu nzira ajya kuganirira n’uyu Muyobozi ndetse n’umukozi uvuga ko yahohotewe.

Yagize ati: “Ubusanzwe abantu bakorana baruzuzanya, ntihabeho gukimbirana, byongeye ari n’abarezi ntabwo rwaba ari urugero rwiza batanga, byaba kubo bashinzwe kurera, no ku bandi bakozi, rero turajya kureba uko ikibazo kimeze tunabagire inama y’uko amakosa nk’ayo atazongera”.

Sugira avuga ko akeka ko icyaba kihishe inyuma y’uku kuburabuzwa ari uko mu 2016 muri iri shuri hagaragaye ingengabitekerezo ya Jenoside, ndetse umwe mu bayikorewe akabigeza ku nzego zitandukanye. Gusa ngo uyu mukozi ntiyorohewe kuko ubuyobozi bw’ishuri bwakunze kumwiyenzaho buvuga ko ari we wakanguriye abanyeshuri kugaragaza icyo kibazo.

Ishuri ry'ubugeni rya Nyundo riherereye mu Karere ka Rubavu
Umuryango umukozi ushinzwe ikinyabupfura yahejejwe inyuma

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza