Kwamamaza

Rubavu: Umudugudu w’icyitegererezo wari kubakwa i Mudende wimuriwe ku Nyundo

Yanditswe kuya 5-09-2016 saa 10:09' na Mukwaya Olivier


Ubuyobozi bw’Akarere ka Rubavu bwafashe icyemezo cyo kwimura umudugudu w’icyitegererezo wagombaga kubakwa mu Murenge wa Mudende, ujyanwa muri Nyundo nyuma y’aho ba nyiri amasambu babubereye ibamba.

Iki cyemezo cyafashwe nyuma y’uko abaturage bo mu Kagali ka Ndoranyi, umurenge wa Mudende ho mu Karere ka Rubavu banze gutanga amasambu yabo ngo yubakwemo umudugudu w’Icyitegerezo bemeza ko ubutaka ugiye kubakwaho aribwo bubatunze kuko bukoreshwa mu buhinzi bukorwa n’abaturage hafi ya bose bahaturiye.

Izi mpungenge bazigaragarije Umunyamabanga Nshingwabikorwa w’Intara y’Uburengerazuba, Jabo Paul avuga ko ubutumwa bwo kubaka umudugudu bushobora kuba bwaratanzwe nabi ndetse byanatumye abaturage n’ubuyobozi bw’akarere batumvikana.

Ubuyobozi bw’Akarere ka Rubavu bukimara kubona ko aba baturage batsimbaraye ko badashaka uwo mudugudu bukaba bwahisemo kuwubaka mu Murenge wa Nyundo mu Kagali ka Bahimba mu mudugudu w’Akagera.

Mu rwego rwo kumvisha abaturage bo mu murenge wa Nyundo ibyiza byo gutura mu mudugudu w’icyitegerezo no kwirinda ko ubutumwa bwakumvikana nabi, abahagarariye abaturage bakoreye urugendoshuri mu karere ka Bugesera mu murenge wa Rweru ahubatswe umudugudu watujwemo abaturage bakuwe mu birwa bya Mazane na Sharita.

Bamwe mu baturage bo mu Murenge wa Nyundo uzubakwamo uyu mudugudu w’icyitegererezo bavuga ko bakurikije uko babonye umudugudu wo muri Rweru watujwemo abaturage bavuye ku kirwa cya Mazane na Sharita, ngo barawishimiye kuko bazabona amashuri, ibitaro ndetse n’ibindi bikorwaremezo babonaga bibagoye ariko bagasaba ubuyobozi bw’akarere kuzabanza bakajya inama ku butaka bwakoreshwa.

Ntahomvukiye Théoneste yagize ati “Nishimiye cyane icyemezo cy’Akarere cyo kutwubakira umudugudu w’icyitegererezo no kubanza kutugeza aho uwubatswe uri. Mu by’ukuri bizafasha abana bacu kwiga imyuga no kwihangira imirimo. Ikibazo cy’ubuzima na cyo turabona bizagabanya ingendo twakoraga ariko turabasaba ubuyobozi kuzaza tukigira hamwe ubutaka bwakoreshwa natwe tubona ko butera kuko twabonye umudugudu ujya ahantu hanini.”

Undi muturage yagize “Ubutaka duhingaho ni bwo budutunze, haramutse habonetse aho uyu mudugudu wubakwa bitabangamiye ubutaka bwacu ntabwo twabyanga, gusa nkurikije uko mbona uyu mudugudu ungana mbona ntaho bawubaka ngo bibure kubangamira ubutaka bwacu.”

Umuyobozi w’Akarere ka Rubavu Sinamenye Jérémie avuga ko impamvu bahisemo kubaka uyu mudugudu mu murenge wa Nyundo ari uko abo muri Mudende bagaragaje ko batawushaka, gusa ngo ntibirangiye burundu kuko atari umudugudu umwe uzubakwa.

Yagize ati “ Abaturage ni bo baba bafite ijambo rinini mu bibakorerwa, abo muri Mudende baratsimbaraye, birasaba ko tubanza kubaka umudugudu muri Nyundo noneho tubereke ibikorwa kuko tuzubaka henshi. Aho duteganya mu murenge wa Nyundo nta bikorwa remezo bihari, nta mazi, nta mashanyarazi, hari n’ahandi tuzubaka muri Kanembwe aho abaturage batuye mu mbaho n’ahandi kandi ibi bizakorwa mu ngengo y’imari y’uyu mwaka nubwo tutaramenya amafaranga azakoreshwa.”

Uyu mudugudu w’icyitegererezo wo Mu Murenge wa Rweru mu Karere ka Bugesera ufatwaho urugero ukaba utujwemo imiryango 104 yimuwe mu birwa bya Mazane na Sharita, ukaba waratashywe na Perezida Kagame ku ya 4 Nyakanga 2015.

Leta y’u Rwanda ifite gahunda yo kubaka umudugudu w’icyitegererezo muri buri Karere, muri 30 tugize igihugu.

Abaturage bishimiye umudugudu w'icyitegererezo wubatswe mu karere ka Bugesera
Abahagarariye abaturage bo ku Nyundo batambagizwa umudugudu w'icyitegererezo wa Rweru muri Bugesera
Umudugudu w'icyitegererezo uzubakwa mu karere ka Rubavu mu murenge wa Nyundo uzaba ufite inzu zigezweho nk'izo mu Murenge wa Rweru

Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Friday 2 Ukuboza 2016
Copyright © 2009 -2014 - IGIHE Ltd - All Rights Reserved