Rubavu:Ubuyobozi bwasohoye Abayisilamu basengeraga mu nzu y’umuturage

Yanditswe na Kanamugire Emmanuel
Kuya 12 Nzeri 2016 saa 02:17
Yasuwe : XX
0

Mu gitondo cyo kuri uyu wa Mbere, ubuyobozi bw’Umurenge wa Gisenyi na polisi basohoye Abayisilamu bagera kuri 50 basengeraga mu rugo rw’umuturage babasaba ko bagomba kujya basengera mu misigiti nk’uko bisanzwe.

Ubwo Minisitiri w’umutekano Sheikh Musa Fazil yagiranaga ibiganiro n’abasilamu bo mu Karere ka Rubavu yabasabye kujya basengera mu misigiti kuko ngo byagaragaye ko mu bayisilamu basengera mu dutsiko two mu ngo ari ho hakunze gutangirwa inyigisho z’ubutagondwa.

Gato Hamiss, Umuyobozi w’Abashia mu karere ka Rubavu yavuze ko kuba basohowe byaturutse ku makosa yabo kuko basengeraga muri iyi nzu batabimenyesheje inzego z’umutekano.

Yagize ati “Baduhagaritse badusaba kujya tumenyesha inzego z’umutekano,kuko twatangiye tubimenyesha ubuyobozi bw’akagari gusa, nta handi twagiye.Ikosa si iry’abadufungiye ahubwo ikosa ni iryacu kuko twasengeraga aha. Ibyangombwa bya RGB turabifite ariko ntabwo twabisobanuriye inzego zo hasi.”

Gato yakomeje avuga ko iyi nzu bayisengeramo ku wa Kabiri no ku wa Gatanu, kandi ko impamvu badasengera mu musigiti ari uko badashobora gusengana n’Abasuni mu gihe hari imyemerere imwe badahuza.

Sibomana Habib Juma, Umuyisilamu ubarizwa mu Bashia avuga ko kimwe mu byatumye bava mu misigiti ari uko Abasuni bahoraga babahohotera bakabakubita.

Ati “Impamvu tudashobora gusengera hamwe n’Abasuni ni uko batubangamira bakadukubita bitewe n’uko hari imyemerere tudahuza, ni yo mpamvu twahisemo gushaka ahantu hihariye dusengera.”

Aba bayisilamu batangaje ko iki gikorwa cyatumye umunsi mukuru w’Igitambo wizihijwe kuri uyu wa 12 Nzeri, ubagendekera nabi.

Twagerageje kuvugana n’Ubuyobozi bw’Umurenge wa Gisenyi ntibyadukundira kuko telefoni y’Umunyamabanga Nshingwabikorwa itari iri ku murongo ubwo iyi nkuru yakorwaga.

Iyi nzu ni yo basengeragamo
Umuyobozi w'Abayisilamu b'Abashia mu Karere ka Rubavu, Gato Hamiss

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza