Rubavu:Amakimbirane akaze mu miryango akomoka ku buharike

Yanditswe na Ishimwe Israel
Kuya 30 Nzeri 2016 saa 04:04
Yasuwe :
0 0

Akarere ka Rubavu by’umwihariko imirenge y’icyaro hakunze kugaragara ibibazo by’amakimbirane yo mu ngo, ahanini bishingiye ku ngeso y’ubuharike ituma havuka umwuka mubi hagati y’abashakanye.

Aya makimbirane ya hato na hato mu miryango itandukanye aturuka ku bana bavutse muri ubwo buryo, bagatereranwa n’ababyeyi ndetse n’abagore b’inshoreke bagashaka kwigwizaho imitungo.

Urwego rushinzwe kugenzura iyubahiriwa ry’Uburinganire n’Ubwuzuzanye,Ikigo cya Polisi y’igihugu,Umuryango urwanya ruswa n’akarengane, Transparency International Rwanda na Isange One Stop Center, ubwo basuraga abaturage bo mu Murenge wa Busasamana, kuri uyu wa Kane tariki ya 29 Nzeri 2016, bamwe mu baturage bagarutse ku kibazo cy’ubuharike mu biteza amakimbirane.

Sinayobye David yatanze ubuhamya bw’imibanire ye n’abagore be babiri avuga ko umuto muri bo amuhoza ku nkeke.

Yagize ati “Umugore wanjye mukuru twaraburanye ubwo twari muri Congo mu 1996, ngarutse nshaka undi tubyarana abana batatu,mukeba we yaje guhunguka amubonye arigendera, amusigira urugo ariko ntiyigeze ampa amahoro ubu twibera mu manza zidashira.”

Nyirahabimana Vestine asobanura akarengane yagiriwe n’umugabo we kugeza ubwo amwirukana akanasuzugura ubuyobozi bwabungaga.

Ati “Ubu maze icyumweru mu gasozi umugabo wanjye yarankingiranye ubuyobozi butegeka ko ngaruka mu rugo none n’ubu yaranze, mumfashe kuko ndi mu bibazo.”

Umugenzuzi Mukuru w’Urwego rw’Igihugu rushinzwe kugenzura iyubahirizwa ry’Uburinganire n’Ubwuzuzanye mu Iterambere, Rwabuhihi Rose yakanguriye aba baturage gusezerana byemewe n’amategeko kuko bibaha uburenganzira busesuye mu miryango.

Yagize ati “Umugabo mutasezeranye si uwawe. Ikibazo gikomeye ni abana batanditse usanga ntaho babarizwa ariko ibi bigomba gukurikiranwa bigakemuka.”

Umuyobozi w’Akarere wungirije ushinzwe Ubukungu n’Imibereho myiza, Uwampayizina Marie Claire avuga ko ikibazo cy’ubuharike cyakunze kugaragara mu Mirenge y’icyaro ariko ubu bagiye kongera ubukangurambaga ku bagore.

Ati “ Abantu babigize umuco cyane cyane mu mirenge y’icyaro aho usanga umugabo afite umugore urenze umwe, ubu tugiye gukangurira abagore ubwabo kumva uburenganzira bwabo. Ufite amasezerano akaba yadutabaza tugacyemura ikibazo hakiri kare n’uwo mugore muto tukamuvana muri urwo rugo kuko itegeko rirabiteganya.”

Muri iyi nama, abaturage bagaragarije Polisi ibibazo by’ihohoterwa bakorerwa bitewe n’amakimbirane akomoka mu miryango.

Imirenge ikunze kuvugwamo ikibazo cy’ubuharike ni Busasamana, Bugeshi, Rubavu, Cyanzarwe, Kabaya, Nyundo, Nyakiriba, Mudende na Kanzenze yo mu Karere ka Rubavu.

Abaturage bavuga ko ubuharike buri mu bituma amakimbirane mu miryango arushaho kwiyongera
Abaturage bagaragarije Polisi ibibazo by'ihohoterwa bakorerwa mu ngo
Umuturage abwira umupolisi ikibazo cye
Visi Meya, Uwampayizina Marie Claire, Rwabuhihi Rose na Ingabire Marie Immaculée uyobora umuryango Transparency International mu Rwanda
Umugenzuzi Mukuru w’Urwego rw’Igihugu rushinzwe kugenzura iyubahirizwa ry’Uburinganire n’Ubwuzuzanye mu Iterambere, Rwabuhihi Rose yasabye imiryango gusezerana imbere y'amategeko
Umuyobozi w’Akarere wungirije ushinzwe Ubukungu n’Imibereho myiza, Uwampayizina Marie Claire

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza