00:00:00 IGIHE NETWORK KN KINYARWANDA EN ENGLISH FR FRANCAIS

Rubavu: RIB yafunze umuyobozi wakaga abagore ruswa y’igitsina kugira ngo bahembwe

Yanditswe na Mukwaya Olivier
Kuya 30 Nyakanga 2021 saa 03:53
Yasuwe :
0 0

Urwego rw’Igihugu rushinzwe Ubugenzacyaha, RIB, rwataye muri yombi Umuyobozi mu kigo cy’abasekirite mu Mujyi wa Rubavu, akurikiranyweho icyaha cyo gusaba abakozi b’igitsinagore akoresha, gukorana na we imibonano mpuzabitsina, kugira ngo abone gutanga nimero zabo za konti ngo bahembwe.

Uyu mugabo yafashwe nyuma y’uko abakobwa batatu batanze ibirego muri RIB bavuga ko yabasabye ko baryamana.

Amakuru IGIHE ifite ni uko aba batatu barimo ufite imyaka 19, uwa 22 na 26 bose bari bamaze amezi asaga atatu badahembwa kuko bari baranze kuryamana na we.
Umwe w’imyaka 26 avuga ko yamusabye ko baryamana akamwangira kugeza ubwo byaje kugera n’aho ashaka kumufata ku ngufu bakamugwa gitumo.

Ati “Njyewe nasabye akazi anyaka amafaranga ibihumbi 25 y’imyambaro.
Yarampamagaye nuzuza impapuro, mpageze atangira kunkorakora ndabyanga. Yahoraga ampindurira aho nkorera bigeze aho arambwira ngo kugira ngo azanshyire ku rutonde rwo guhembwa ngomba kuryamana na we kuko ngo umukozi wese uje bagomba kuryamana ngo bajye ku rutonde ndetse ampereza icyumweru ngo ntabikora agahita anyirukana mu kazi.’’

Yavuze ko yumvaga bimurenze kugeza ahisemo kugisha bagenzi be inama, bamubwira ko na bo yabazonze ndetse bamaze amezi ane batazi uko umushahara usa.

Yakomeje ati “Nabibwiye muganga n’umukozi wa RCS noneho ndamwemerera, nuko umusaza wakoreraga ku marembo y’ibitaro amuha konji ku cyumweru abonye hari abantu ansaba kujya muri ES Gisenyi ni ho yagiraga akazu yasambanyirizagamo abakobwa. Nagezeyo nsanga yambaye ubusa nanjye ntangira gukuramo [imyenda] nitinzatinza nuko muganga n’umukozi wa RCS batugwaho.’’

Mu buhamya bwe, avuga ko ababibonye bashatse kumuhishira bituma uwo mugabo afata icyemezo cyo kwirukana abakobwa bose bamwangiye ko baryamana, na bo bahitamo kubimenyesha RIB.

Umuvugizi w’Urwego rw’Igihugu rushinzwe Ubugenzacyaha, RIB, Dr. Murangira B Thierry, yemeje amakuru avuga ko ikirego cyatanzwe n’abo bakobwa kiri gukurikiranwa.

Ati “Ni byo ku wa 20 Nyakanga 2021 twakiriye ikirego cy’umukobwa arega ko Umuyobozi muri HIGH SEC CO. Ltd wamusabye ko basambana kugira ngo amushyire ku rutonde rw’abahembwa.”

Ubugenzacyaha bwahise butangira iperereza, bukusanya ibimenyetso, bubaza abatangabuhamya, ndetse ku wa 27 Nyakanga 2021, uwo mugabo arafatwa arafungwa.

Uyu mugabo akekwaho gusaba cyangwa gukora ishimishamubiri rishingiye ku gitsina. Kuri ubu afungiye kuri Sitasiyo ya RIB ya Gisenyi mu gihe iperereza rikomeje.

Dr. Murangira yaburiye abitwaza umwanya bafite mu kazi, bakanga gutanga serivisi cyangwa kuzuza inshingano bafite, hanyuma bakaka ruswa kugira ngo babone ibyo bemererwa n’amategeko.

Yagize ati “RIB iributsa abaturarwanda ko itazihanganira umuntu wese uzafatirwa muri ruswa iyo ari yo yose.’’

Yashimye ko abantu batinyuka gutanga ibirego nubwo bikiri ku kigero cyo hasi ugereranyije na ruswa y’amafaranga.

Ati “Ibi birerekana icyizere abantu bagirira Ubugenzacyaha mu rwego rwo gukurikirana ruswa ishingiye ku gitsina. RIB irasaba abantu bose gutinyuka bagatanga amakuru ndetse n’ikirego igihe cyose hari ubasabye ruswa iyo ariyo yose ndetse n’iy’igitsina.’’

Umuvugizi wa RIB yakebuye abakeka ko batanga ruswa y’igitsina ngo babone ibyo bifuza.

Yagize ati “RIB iboneyeho gushimira umukozi wanze kwemera gutanga iriya ruswa. Ibi bibere isomo n’abandi. Kwemera gutanga ruswa y’igitsina kugira ngo uhabwe akazi cyangwa uzamurwe mu ntera, biragayitse, ni uguhinduka igikoresho, ni iteshagaciro, birasuzuguritse. Abo bayitanga bakwiriye kumva ukuntu bigayitse, bibatesha agaciro. Hari abatanga ruswa kugira ngo bahabwe akazi, kuzamurwa mu ntera, cyangwa indi nyungu. Uyaka cyangwa uyitanga bose barahanwa.”

Ingingo ya 6 y’itegeko N°54/2018 ryo ku wa 13/08/2018 ryerekeye kurwanya ruswa ivuga ko gukora ishimishamubiri rishingiye ku gitsina ari icyaha, ugihamijwe ahanishwa igifungo kirenze imyaka itanu ariko kitarenze irindwi n’amafaranga y’u Rwanda atari munsi ya miliyoni 1 Frw ariko atarenze miliyoni 2 Frw.

RIB yerekana ko mu myaka itatu ishize, yakiriye dosiye 1541 zifitanye isano no gusaba, kwakira cyangwa gutanga indonke mu gihe dosiye 19 zijyanye no gusaba cyangwa gukora ishimishamubiri rishingiye ku gitsina.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .