Rubavu: Minisitiri w’Uburezi yahagaritse mu kazi abarimu batanu n’umuyobozi w’ikigo

Yanditswe na Mukwaya olivier
Kuya 12 Gicurasi 2018 saa 04:47
Yasuwe :
0 0

Minisitiri w’Uburezi, Dr Eugène Mutimura, yahagaritse mu kazi abarimu batanu n’umuyobozi w’ikigo bo mu Karere ka Rubavu, nyuma yo kugaragaraho ko batuzuzaga inshingano zabo uko bikwiye.

Aba barimu bahagaritswe ubwo Minisitiri Dr Mutimura yagiranaga ibiganiro n’abarezi bo muri ako Karere ku wa 11 Gicurasi 2018, muri gahunda yo kugenzura amashuri Minisiteri ayoboye imazemo iminsi mu gihugu.

Aba bahagaritswe ni aba Centre Scolaire Kinogo mu Murenge wa Busasamana n’Umuyobozi wa Kanembwe wa Mbere mu Murenge wa Cyanzarwe.

Aba barezi ngo basanzwe bigisha nabi, rimwe na rimwe bagata abanyeshuri bakajya muri gahunda zabo, kugeza n’ubwo intumwa za Minisiteri y’Uburezi zahageze zigasanga badahari.

Uyu mwanzuro, Dr Mutimura yawufashe nyuma y’aho Umuyobozi Mukuru w’Ikigo cy’igihugu gishinzwe guteza imbere uburezi ( REB), Dr Ndayambaje Irené, amugaragarije imbogamizi zagaragaye muri iryo ngenzura, aho yatunze agatoki imiyoborere idahwitse ya bimwe mu bigo, biha icyuho imyitwarire idakwiye mu burezi.

Dr. Ndayambaje ati “Ikibazo kijyanye n’imyambarire idasobanutse y’abana mu bigo bimwe na bimwe, aho usanga icyitwa ipantaro cyarabaye ikabutura igera mu mavi, ibintu abana bitera mu maso ‘maquillage’ ugasanga barisize ku ngohe bambaye imikufi, amaherena ukibaza niba aba bantu ari abanyeshuri!”

Minisitiri w’Uburezi, Dr Eugène Mutimura, yahagaritse mu kazi abarimu batanu n’umuyobozi w’ikigo bo mu Karere ka Rubavu, nyuma yo kugaragaraho ko batuzuzaga inshingano zabo uko bikwiye

Uyu muyobozi kandi yagiye asoma amazina y’abo barezi bagaragaweho imyitwarire idahwitse, maze Minisitiri w’Uburezi Dr. Mutimura, ahita avuga ko nta mwanya bafite mu burezi bw’abana b’u Rwanda.

Ati “Bariya barimu ntabwo ari ukubirukana kuko n’ubundi basanzwe badakora. Ntabwo twabirukanye kuko n’ubundi basanzwe bariyirukanye, niba bavuga ngo n’ubundi abarimu basanzwe batigisha koko, bajya no kubasura bagasanga badahari ntabwo ari ukubirukana ni ukubafasha kugira ngo bakomeze gahunda zabo by’ukuri kuko icyemezo cyatinzwe gufata.’’

Umuyobozi w’Akarere ka Rubavu wungirije ushinzwe Imibereho myiza y’Abaturage, Uwampayizina Marie Grace, yabwiye IGIHE ko amategeko ateganya ko baba bahagaritswe amezi atatu yo kugenzura no gusesengura amakosa bakoze, ariko nyuma bashora no kwirukanwa burundu.

Yanavuze ko iyo myifatire ya bamwe mu barezi igira ingaruka mbi ku burezi zirimo guta ishuri kw’abana. Ni mu gihe mu Karere ka Rubavu, abanyeshuri 3,533 mu 98,259 biga mu mashuri abanza bangana 3,5%, barivuyemo naho mu yisumbuye abarivuyemo bagera kuri 2,1%.

Ku kibazo cy’abanyeshuri bataye ishuri, Minisitiri w’Uburezi yasabye ko bagarurirwa mu maguru mashya.

Ati “Birabashimishije kuba mutubwira abana 3500 bataye amashuri [biga mu mashuri abanza], abana 485 [bo mu yisumbuye] bataye amashuri ntabwo ari imihigo mutugaragariza hano mwakabaye mutubwira ngo abana 3500 bataye ishuri tumaze kugarura aba n’aba.’’

Bimwe mu bibazo by’ingutu iri genzura ryagaragaje, harimo icy’imfashanyigisho n’integanyanyigisho zihabwa bimwe mu bigo by’amashuri byagaragaye ko bidakoreshwa, ibibikwa aho gushyirwa mu masomero ngo bifashe abanyeshuri n’abarimu mu gutegura amasomo yabo, imicungire mibi y’umutungo n’ibindi.

Ibigo by’amashuri 20 abanza ndetse n’ayisumbuye mu Karere ka Rubavu nibyo byagenzuwe muri gahunda Minisiteri y’Uburezi ifite yo kurushaho kwimakaza uburezi bufite ireme.

Ni icyiciro cyayo cya kabiri cyatangiye tariki ya 2 kikazasozwa ku ya 15 Gicurasi 2018.

Abari bitabiriye ikiganiro cyatanzwe na Minisitiri w'Uburezi bandika impanuro bahawe
Aho Minisitiri w'Uburezi yasuye, yahasanze imfashanyigisho zikibitswe mu biro
Minisitiri w’Uburezi yasabye ko abanyeshuri bataye amasomo bagarurirwa mu maguru mashya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza