Rubavu: Kaminuza ya UTB yibutse Jenoside yakorewe Abatutsi, abanyeshuri basabwa kwiyubaka biga neza

Yanditswe na Mukwaya Olivier
Kuya 22 Kamena 2019 saa 05:08
Yasuwe :
0 0

Abanyeshuri bo muri Kaminuza y’ikoranabuhanga n’ubucuruzi (UTB) ishami rya Gisenyi ubwo basabwe gukomeza kwiyubaka nyuma ya Jenosie yakorewe Abatutsi baharanira kwiga neza kugira ngo bubake u Rwanda rwiza ruzira amacakubiri.

Babisabwe kuri uyu wa Kane ubwo bibukaga ku nshuro ya 25 Jenoside yakorewe Abatutsi. Uyu muhango bawukoze bashyira indabyo mu mugezi wa Sebeya, hibukwa abatutsi bishwe bakajugunywa muri uwo mugezi.

Bagabo James warokotse Jenoside wiga muri iyi Kaminuza, yavuze ko kujya kwibukira ku mugezi wa Sebeya bigamije guha icyubahiro abatutsi bishwe muri Jenoside bakajugunywa mu mazi.

Yagize ati “Ni iby’ingenzi kuri twe kuko bidufasha kwibuka abacu bishwe muri jenoside yakorewe abatutsi mu 1994. Nk’ubu kujya kuri Sebeya binyibutsa ukuntu babataga mu migezi amazi akabatembana, numva umubyeyi wange ndimo kumuha agaciro yambuwe n’abatarashakaga ko abaho’’.

Umunyamabanga Nshingwabikorwa w’umurenge wa Gisenyi,Uwimana Vedaste,yasabye aba banyeshuri kwandika gukangukira kwandika amateka no gukora ubushakashatsi kuri Jenoside yakorewe Abatutsi kugira ngo atazibagirana cyangwa akagorekwa.

Umuyobozi Mukuru wungirije ushinzwe amasomo muri UTB, Dr Tombola Gustave, yihanganishije abarokotse Jenoside yakorewe Abatutsi, by’umwihariko asaba abanyeshuri kuzirikana ayo mateka baharanira kwiga neza.

Yavuze ko kwiga nez ariko guha agaciro abazize Jenoside yakorewe Abatutsi.
Ati “Niba uri umunyeshuri kwiyubaka ni ukwiga neza, ukurikira amasomo neza, ugatsinda mu buryo bwiza uko niko kwiyubaka. Bizanaheshe ishema umubyeyi umuvandimwe cyangwa inshuti yazize jenoside kubera uko yaremwe.”

Mu gihe cya Jenoside hari imibiri y’abatutsi yajugunywe mu mugezi wa Sebeya no mu kiyaga cya Kivu, umuhengeri ukayitwara muri Repubulika Iharanira Demokarasi ya Congo. Abanyamuryango ba FPR, babaga i Goma babashije gushyingura igera ku 100 ahitwa Kituku ku nkengero z’ikiyaga cya Kivu.

Hakozwe urugendo rwo kwibuka bagana ku mugezi wa Sebeya
Hacanywe urumuri rw'icyizere rushushanya ko ejo h'u Rwanda ari heza
Umuyobozi wa brigade ya 201 ikorera mu turere twa Rubavu na Nyabihu, Colonel Muhizi Pascal, ashyira indabyo mu mugezi wa Sebeya wajugunywemo abatutsi muri Jenoside
Umugezi wa Sebeya wajugunywemo abatutsi babaga bamaze kwicwa muri Jenoside
Umunyamabanga Nshingwabikorwa w'Umurenge wa Gisenyi, Uwimana Vedaste
Hacanywe urumuri rw'icyizere rushushanya ko ejo h'u Rwanda ari heza
Hatanzwe ubutumwa bunyujijwe mu mikino bugaruka ku mateka ya Jenoside
Prof Tombola yibukije abanyeshuri ko guha agaciro abazize Jenoside ari ukwiga neza bagateza imbere igihugu
Umuyobozi wa Ibuka mu Karere ka Rubavu, Kabanda Innocent

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza