Kwamamaza

Rubavu: Isoko rya Kanzenze rimaze imyaka itatu ryarahinduwe gereza y’amatungo

Yanditswe kuya 4-09-2016 saa 10:17' na Mukwaya Olivier


Abaturage batuye mu Murenge wa Kanzenze, mu Karere ka Rubavu bavuga ko isoko ry’amatungo bubakiwe rimaze imyaka itatu ritarema ahubwo ngo ryahindutse gereza y’amatungo yabo.

Iri soko ry’amatungo rya Kabali riherereye mu Murenge wa Kanzenze, abaturage barituriye bemeza ko rimaze imyaka igera kuri itatu ritagira abaza kurirema, ibyo baheraho bavuga ko nta kamaro ribafitiye ahubwo ko ryabaye nk’umutako.

Aba baturage bavuga ko iri soko riramutse riremye barikoreramo imirimo inyuranye yabateza imbere.

Ni mu gihe abaturage bo mu mirenge igize akarere ka Rubavu bahitamo kujyana amatungo yabo mu isoko ry’amatungo rya Bigogwe mu karere ka Nyabihu basize iryo ryo mu karere kabo.

Aba baturage biganjemo abatuye mu Mudugudu wa Rwamikungu, mu Kagali ka Nyamikongi, mu Murenge wa Kanzenze, bagaragaza ko bishimira ko Leta yabubakiye isoko ry’amatungo ariko kandi ngo bakaba babangamiwe n’uko ritagira abarirema ahubwo ryirirwa rifungiyemo amatungo yafashwe.

Bizimungu Gerard ni umwe mu baturage aragira ati "Iri soko nyuma yo kuryubaka ryaremwe rimwe gusa ubundi nta muntu wongeye kugaruka,ahubwo ubu ryahindutse gereza ifungirwamo amatungo afatiwe mu ishyamba rya Gishwati byaratuyobeye.”

Akomeza avuga ko amatungo yafashwe n’abashinzwe umutekano ngo barayazana akaguma aho ngaho muri iryo soko akahakurwa ba nyirayo bamaze kwishyura amande.

Undi muturage agira ati "Iyi yabaye gereza y’inka n’amatungo magufi yafatiwe mu mirima ya Leta, isoko ryaremye inshuro imwe gusa,yewe bagerageje no gutanga poromosiyo bagabanyiriza abacuruzi ariko biranga;ntabwo tuzi niba ryarashyizweho ridakwiye. Turifuza ko ryashyirwamo ibindi wenda hagakorerwamo ubundi bucuruzi aho kugira ngo ripfe ubusa kandi ryarubatswe.”

Mu gihe abatuye mu murenge wa Kanzenze bavuga ko isoko ry’amatungo ryabuze abarirema , abo mu kagali ka Nkomane, mu Murenge wa Kanama bo bavuga ko batagira isoko ry’amatungo bakaba babangamiwe no gukora urugendo rurerure barongoye inka zabo bazijyana mu isoko ryo mu Karere ka Nyabihu.

Ubuyobozi bw’akarere ka Rubavu bwemeza ko koko iri soko ry’amatungo ryagize imbogamizi kuva rigitangira.

Murenzi Janvie, Umuyobozi w’akarere ka Rubavu wungirije ushinzwe ubukungu agira ati "Iri soko ryagize imbogamizi, iya mbere kuba ryegeranye n’irya Nyabihu ryatangiye kurema mbere y’irya Rubavu byatumye abacuruzi n’abaturage barimenyera,ariko ubu ngubu tugiye kongera ubukangurambaga tuganire n’aborozi turebe ko barigana rigacuruza kuko kutarema kwaryo biraduhombya cyane.”

Aha hubatswe ari isoko ry'amatungo, ariko nyuma ryabuze abaricururizamo rihindurwa gereza y'amatungo

[email protected]


Kwamamaza

Kwamamaza
IZINDI NKURU WASOMA
TANGA IGITEKEREZO

ANDIKA ICYO UTEKEREZA KURI IYI NKURU

AMATEGEKO AGENGA IYANDIKA RY'IGITEKEREZO CYAWE:
Witandukira kubijyanye n'iyi nkuru; wikwandika ibisebanya, ibyamamaza cyangwa bivangura; wikwandika ibiteye isoni,
Wifuza kubona byihuse ibivugwa/ibisubizo ku gitekerezo cyawe, andika email yawe ahabugenewe.
Igitekerezo cyawe kigaragara nyuma y'isuzuma rikorwa na IGIHE.com
Ibi bidakurikijwe igitekerezo cyanyu gishobora kutagaragara hano cyangwa kigasibwa, Murakoze!
ANDIKA ICYO UTEKEREZA KURI IYI NKURU
Kwamamaza
IBITEKEREZO
Join Us

Socialize with Us
Contacts

Marketing
4546
Editor
078 827 26 21
Management
0788 74 29 08 / 0788 49 69 15

Emails: [email protected], [email protected]

Website Developped by

Uru Rubuga Ruheruka Gushyirwaho Amakuru Saturday 10 Ukuboza 2016
Copyright © 2009 -2014 - IGIHE Ltd - All Rights Reserved